ހުޅުމާލޭގައި މިހާރު ހަދަމުން އަންނަ ސްކޫލަކީ ރާއްޖޭގެ ތާރީޚުގައި ސަރުކާރުން އެއް ފަހަރާ އެންމެ ބޮޑު ހޭދައެއް ކޮށްގެން އިމާރާތްކުރާ ތައުލީމީ ބިނާ ކަމަށް އެޑިޔުކޭޝަން މިނިސްޓްރީން މިއަދު ބުނެފި އެވެ. އަމީން ކޮންސްޓްރަކްޝަނާ ހަވާލުކޮށްގެން ހަދާ ސްކޫލަށް ސަރުކާރުން 110 މިލިއަން ރުފިޔާ ހޭދަކުރެ އެވެ. ސަރުކާރުން ނިންމާފައި ވަނީ އެ ސްކޫލަކީ އަންނަ އަހަރު ފާހަގަކުރާ ރާއްޖޭގެ މިނިވަންކަމުގެ ރަން ޔޫބީލްގައި ތައުލީމީ ދާއިރާގެ "އެންމެ ބޮޑު ރަމްޒު" ކަމަށެވެ. ޑިޕިއުޓީ މިނިސްޓަރު ޑރ. އަބްދުﷲ ނަޒީރު ވިދާޅުވި ގޮތުގައި ރާއްޖޭގެ ތާރީޚުގައި ވެސް ތައުލީމީ އެއް މަޝްރޫއުއަކަށް އެއް ފަހަރާ އެހާ ބޮޑު އަދަދެއް މިހާތަނަށް ހޭދަކޮށްފައެއް ނުވެ އެވެ. "ބައްލަވާ، 110 މިލިއަން ރުފިޔާ، 46 ކްލާސް ރޫމް، އޮފީހާއި ހޯލާއި މިހެން ގޮސް މުޅި ޕްރޮޖެކްޓަށް ބަލާ އިރު މިއީ ތައުލީމީ ގޮތުން ހިންގާ އެންމެ ބޮޑު ޕްރޮޖެކްޓް،" ނަޒީރު ވިދާޅުވި އެވެ. ހުޅުމާލޭގައި އެންމެ ފަހުން ޗައިނާ ސަރުކާރުން އިމާރަތްކުރި ފްލެޓްތައް ހިމެނޭ ނެއިބަހުޑް-3 ގައި ފަސް ބުރިއަށް ހަދާ ސްކޫލްގެ ކިޔެވުން ރާއްޖޭގެ އެހެން ސްކޫލްތަކެކޭ އެއްގޮތަށް އާ ތައުލީމީ އަހަރު ފަށާނެ އެވެ. އެޑިޔުކޭޝަން މިނިސްޓްރީން މިހާރު ވަނީ ކުދިން ނެގުމުގެ ފުރުސަތު ހުޅުވާލައިފަ އެވެ. ނަޒީރު ވިދާޅުވި ގޮތުގައި ޑިސެމްބަރު 10 ގައި ފޯމު ހުށަހެޅުމުގެ ފުރުސަތު ބަންދުވުމާ އެކު ޑިސެމްބަރު 15 ގައި ކުދިން ނެގުމުގެ ހުރިހާ މަސައްކަތެއް ނިމޭނެ އެވެ. ހުޅުމާލޭގައި އިމާރާތްކުރާ އާ ސްކޫލް: މިތަނުގައި 46 ކްލާސް ރޫމް ހިމެނޭ --ފޮޓޯ/އެޑިޔުކޭޝަން މިހާ ބޮޑު މަޝްރޫއުއެއް ހިންގަނީ، އެޑިޔުކޭޝަނުން ބުނި ގޮތުގައި، ވަރަށް ބާރަށް ހުޅުމާލެ ތަރައްގީވަމުން އަދި އާބާދީ ބޮޑުވަމުން އަންނަ އިރު މިހާރު ހުރި ސަރުކާރުގެ ހަމައެކަނި ސްކޫލް، ގާޒީ ސްކޫލްގެ ޖާގަ ފުލްވެގެންނެވެ. އާ ސްކޫލަށް މިހާރު ވެސް ވަނީ ގާޒީ ސްކޫލުން 750 ކުދިން ބަދަލުކޮށްފަ އެވެ. އާ ސްކޫލްގެ ޖާގައެއް ކަމަށް ބެލެވެނީ 1500 ދަރިވަރުންނެވެ. އެކަމަކު އެޑިޔުކޭޝަންގެ ފުރަތަމަ އަމާޒަކީ އަންނަ އަހަރު ކިޔެވުން ފަށާ އިރު ގްރޭޑް 1-8 އަށް ކިޔަވައިދޭށެވެ. އެކަމަކު މިހާރު ހުޅުވާލައިފައިވާ ފުރުސަތުގައި އެއަށް ވުރެ މަތީ ގްރޭޑްތަކަށް އެކަށީގެންވާ ވަރަށް ކުދިން ލިބިއްޖެ ނަމަ ގްރޭޑް 9-10ގައި ވެސް ކިޔަވައިދޭން ފަށަން އެޑިޔުކޭޝަނުން ވިސްނަ އެވެ. "ގާޒީ ސްކޫލްގައި ތިބި 9-10 ގެ ދަރިވަރުން އާ ސްކޫލަށް ބަދަލުކުރާކަށް އަޅުގަނޑުމެން ބޭނުމެއް ނޫން. އެއީ އޯލެވެލްގެ ފައިނަލް މަރުހަލާގައި ތިއްބާ އެހެން ހަދައިފިއްޔާ ނުބައި އަސަރެއް ކޮށްފާނެތީ،" ނަޒީރު ވިދާޅުވި އެވެ. އެޑިޔުކޭޝަން މިނިސްޓަރު ޑރ. އައިޝަތު ޝިހާމް ވަނީ ބުދަ ދުވަހު ހުޅުމާލެ އަށް ވަޑައިގެން އާ ސްކޫލްގެ މަސައްކަތް ހިނގާނުހިނގާ ގޮތް ބައްލަވައިފަ އެވެ. މިނިސްޓަ ވިދާޅުވި ގޮތުގައި އެ ސްކޫލް ވާނީ އަންނަ އަހަރު ފާހަގަކުރާ މިނިވަން ރަން ޔޫބީލްގައި އެޑިޔުކޭޝަން ދާއިރާގެ ރަމްޒަށެވެ.