އިސްރާއީލުގެ އަސްކަރިއްޔާއިން ޣައްޒާ ސިޓީގެ އިރުމަތީގައި އޮންނަ ތޫފާގައި ހުންނަ އަލް ބަތުޝް ސަހަރާ ކޮނެ މުޅިތަން ސުންނާފަތިކޮށްލި ހަނދާން ފާތިމާއަށް އަދިވެސް ފޮހެނުލެވެއެވެ. އެ ސަހަރާގައި އިސްރާއީލުން ޣައްޒާއާ ދެކޮޅަށް ހިންގި ނަސްލު ނައްތާލުމުގެ ހަނގުރާމައިގައި މަރާލި ފިރިމީހާގެ ގަބުރާއި ފަނާވެފައިވާ ސަރަހައްދުގެ ދިރިއުޅޭ އާއިލާތަކަށް ނިސްބަތްވާ އެތައް ހާސް ގަބުރުތަކެއްގެ ހަނދާނެވެ. ތިން ކުދިންގެ މަންމައެއް ކަމަށްވާ ފާތިމާ ވަނީ އިސްރާއީލުން އެ ސަހަރާގައި އޮޕަރޭޝަން ކުރިއަށްގެންދާނެކަން އެނގުމުން އޭނާއަށް ކުރި އިހްސާސްތަކުގެ ވާހަކަ އަލް ޖަޒީރާއަށް ކިޔާދީފައެވެ. "އަހަރެމެން އެންމެންނަށް އެނގޭ އޮޕަރޭޝަން ކުރިއަށް ގެންދިޔައީ އަލް ބަތުޝް ސަހަރާގައިކަން. އަހަރެންގެ ފިރިމީހާގެ ކަށްވަޅު މެޝިންތަކުން ކޮނުނު ވަގުތު ތަސައްވަރުކުރެވުނު," ފާތިމާގެ ފިރިމީހާ މުހައްމަދު އަލް ޝަރަވީ މަރުވީ 2024 ވަނަ އަހަރު ޑިސެމްބަރު މަހުގެ 11 ވަނަ ދުވަހު އިސްރާއީލުން ދިން ޑްރޯން ހަމަލާއެއްގައެވެ. އޭރު ފާތިމާއާއި އޭނާގެ ދަރިން ތިބީ ޣައްޒާގެ ދެކުނުގައި ގެދޮރު ނެތިފައެވެ. ގަބުރު ވަޅުލާފައިވާ މަހާނައެއް ކައިރީ އަންހެނަކު އިށީދެގެން. ފޮޓޯ/އަލް ޖަޒީރާ "މަރުވެފައިތިބި މީހުންނަށް ވެސް ސަލާމަތެއް ނެތް. ހިތާމަކުރުމާއި ކަރާމާތް ހިފެހެއްޓުމުގެ ހައްގު ވެސް ނިގުޅައިގެންފައި. ހަށިތައް އެކި ދިމަ ދިމާލުގައި. އެމީހުން ތިބީ ގަބުރުތައް ބުލްޑޯޒްކޮށްގެން. އެއީ އެއްވެސް އެއްޗެއް ނޫން ކަމަށް ދެކި އުކާލާފައި." ހިފައްހައްޓާފައިހުރި އިސްރާއީލުގެ ފުލުސް އޮފިސަރު، ރަން ގްވިލީގެ ހަށިގަނޑު ހޯދަނީ ކަމަށް ބުނެ ކުރު މުއްދަތެއްގެ ތެރޭގައި ބޮޑެތި މެޝިނަރީތަކާއި ބުލްޑޯޒަރުތައް ބޭނުންކޮށްގެން ގާތްގަނޑަކަށް 250 ކަށްވަޅު އިސްރާއީލުގެ އަސްކަރީއްޔާއިން ކޮނެފައިވެއެވެ. މި އޮޕަރޭޝަންގައި ކުރީގެ ކަށްވަޅުތަކާއި ފަހުގެ ކަށްވަޅުތައް ވެސް ކޮނެ، ގިނަ މަހާނަ ހިލަތަކެއް ނައްތާލައި، ސަހަރާގެ ބިމަށް ބޮޑު ބަދަލެއް އައިސްފައިވާ ކަމަށް އެތަނުގެ އޭރިއަލް ފޮޓޯތަކުން ދައްކައެވެ. "އަހަރެން އަބަދުވެސް ކުދިންނާއެކު އޭނާއަށް ޒިޔާރަތްކުރަން. ބަންދު ދުވަސްތަކުގައި، އޭނާގެ އުފަންދުވަހު," ފާތިމާ ބުންޏެވެ. ނަމަވެސް 2024 ވަނަ އަހަރު ވަނަ އަހަރުގެ ޖޫން މަހު އިސްރާއީލުން ދިން ވަރުގަދަ ހަމަލާތަކަށްފަހު ޣައްޒާ ސިޓީގެ ޝުޖާޔޭއިން ދިހަހާސް މީހުން މަޖުބޫރުކޮށްގެން ނެރުމުން ފާތިމާއަށް ދެން ސަހަރާއަކަށް ނުވަދެވުނެވެ. ޣައްޒާގެ އަލް ޝިފާ ހޮސްޕިޓަލަގައި ވަޅުލާފައިވާ މީހެއްގެ ކަށްވަޅު ކޮނެފައި. ފޮޓޯ/އަލް ޖަޒީރާ އޭގެފަހުން މިދިޔަ އަހަރު އޮކްޓޫބަރު މަހު ހަނގުރާމަ ހުއްޓާލަން އިއުލާނު ކުރުމުންވެސް އެ ނުރައްކަލައް ނިމުމެއްނައެވެ. ސަބަބަކީ އެ ސަހަރާ އޮތީ އިސްރާއީލުގެ އަސްކަރީ ކޮންޓްރޯލްގެ ދަށުގައި އޮންނަ "ރީނދޫ ރޮނގު" ކިޔާ ސަރަހައްދު ކައިރީގައި ކަމަށްވާތީއެވެ. ހަނގުރާމަ ހުއްޓާލުމުގެ ދެވަނަ މަރުހަލާގައި ސަހަރާއަށް ޒިޔާރަތް ކުރުމުގެ ފުރުސަތު ލިބޭނެ ކަމަށް ފާތިމާ އަދިވެސް އުންމީދު ކުރެއެވެ. ވޭތުވެދިޔަ އަހަރުތަކުގައި އިސްރާއީލުގެ އަސްކަރިއްޔާއިން ވަނީ ފަލަސްތީނުގެ އެތައް ބައެއްގެ ގަބުރުތަކަަށް ރަހުމު ކުޑަކޮށް ބައިނަލްއަގްވާމީ އިންސާނީ ގާނޫނުތަކާ ފާޅުކަން ބޮޑު ގޮތެއްގައި ހިލާފުވެފައެވެ. ޔޫރޯ-މެޑް ހިއުމަން ރައިޓްސް މޮނިޓާގެ ލިޔެކިޔުންތަކުން ދައްކާ ގޮތުގައި އިސްރާއީލު ސިފައިން ވަނީ ޣައްޒާގެ 60 ސަހަރާގެ ތެރެއިން ގާތްގަނޑަކަށް 21 ސަހަރާ ހަލާކުކޮށް ނުވަތަ ބޮޑެތި ގެއްލުންދީ، ކޮނެ ސުންނާފަތިކޮށްފައެވެ. ބިން އެއްވަރުކުމުގެ ނަމުގައި ޣައްޒާގެ ދެކުނުގައި އިސްރާއީލުން ފުޅާދާއިރާއެއްގައި ހިންގަމުން ގެންދާ ޖަރީމާ، އެ ސަރަހައްދުގައި ވަޅުލާފައިވާ މީހުންގެ ހަށިތައް ދެނެގަނެ، ކަރާމާތާއެކު ވަޅުލެވެންދެން ހުއްޓުވުމަށްވެސް ޔޫރޯ-މެޑުން ގޮވާލާފައިވެއެވެ. އިސްރާއީލުގެ އަސްކަރީ އޮޕަރޭޝަންތަކުގައި ސަހަރާތައް ބުލްޑޯޒްކޮށް ނުވަތަ ނައްތާލުމަށް ފަހު ގެއްލިފައިވާ ހަށިގަނޑުތަކާއި މީހުން ވަޅުލާފައިވާ ތަންތަން ހަލާކުވެފައިވާކަމުގެ އެތައް މައްސަލައެއް އދ އާއި އިންސާނީ ހައްގަށް މަސައްކަތްކުރާ ޖަމާއަތްތަކުން ވަނީ ރެކޯޑުކޮށްފައެވެ.