ޑިވެލޮޕްމަންޓް ބޭންކް އޮފް މޯލްޑިވްސް (ޑީބީއެމް)އަށް ބޭންކިން ވިޔަފާރި ފަށަން ބޭނުންވާ ހުއްދަ، މަރުކަޒީ ބޭންކް އެމްއެމްއޭއިން މިއަދު ދީފި އެވެ.
ވީ ކިހިނެއް؟ - ޑީބީއެމްއަކީ ރާއްޖޭގެ ތަރައްގީގެ މަޝްރޫއުތައް ހިންގުމަށް ބޭރުގެ އިންވެސްޓްމަންޓުތައް ހޯދަން އުފެއްދި، ސަރުކާރުގެ %100 ހިއްސާ އޮންނަ ބޭންކެކެވެ. އެމްއެމްއޭއިން ވަނީ އޮކްޓޫބަރު 2024ގައި އެ ބޭންކަށް ބޭންކިން ލައިސެންސް ދޫކޮށްފަ އެވެ.
ތަފްސީލު - ބޭންކިން ވިޔަފާރި ފަށަން ބޭނުންވާ ހުއްދަ ދޫކޮށް، އެކަމާ ގުޅޭ ގޮތުން ނެރުނު ނޫސްބަޔާނެއްގައި އެމްއެމްއޭއިން ބުނީ ޑީބީއެމްގެ ހިދުމަތް ފެށުމުން ދިގު މުއްދަތުގެ މާލީ އެހީތެރިކަން ހޯދަން މަގުފަހިވެ، ރާއްޖޭގެ އިގްތިސާދު ދެމެހެއްޓެނިވި ގޮތެއްގައި ކުރިއަރުވަން ބޮޑު އެހީތެރިކަމެއް ލިބޭނެ ކަމަށެވެ.
މިއީ ރާއްޖޭގެ މާލީ ދާއިރާ ފުޅާކޮށް، ހަރުދަނާކުރަން ކުރެވޭ މަސައްކަތްތަކަށް ލިބުނު މުހިންމު ކުރިއެރުމެއް ކަމަށް ވެސް އެމްއެމްއޭއިން ފާހަގަކުރެ އެވެ.