ރައީސް ޑރ. މުހައްމަދު މުއިއްޒުގެ ރިޔާސީ ވައުދުފުޅާ އެއްގޮތަށް އުފެއްދެވި ޑިވެލޮޕްމެންޓް ބޭންކް އޮފް މޯލްޑިވްސްއަށް ބޭންކިން ވިޔަފާރި ފެށުމަށްޓަކައި ބޭނުންވާ ހުއްދަ، މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން މިއަދު ދީފިއެވެ. 2024 ވަނަ އަހަރުގެ މެއި މަހުގެ 16 ވަނަ ދުވަހު އުފެއްދެވި މި ބޭންކަކީ ސަރުކާރުގެ 100 ޕަސަންޓު ހިއްސާވާ ބޭންކެކެވެ.
އެމްއެމްއޭއިން ބުނި ގޮތުގައި އެ ބޭންކް ރާއްޖޭގައި ހުޅުވުމަށް ބޭނުންވާ ބޭންކިން ލައިސެންސް އެ އޮތޯރިޓީން ދޫކޮށްފައިވަނީ 2024 ވަނަ އަހަރުގެ އޮކްޓޯބަރު މަހުގެ 13 ވަނަ ދުވަހުއެވެ. މިއީ ސަރުކާރުގެ ސިޔާސަތުތަކާ އެއްގޮތަށް، ރާއްޖޭގެ ތަރައްގީގެ މަޝްރޫއުތަކަށް ފައިސާ ހޯދުމަށް މަގުފަހިކުރުމުގެ ގޮތުން އުފެއްދި މުހިންމު ބޭންކެކެވެ.
މި ބޭންކުގެ ހިދުމަތް ފެށުމުން، ދިގު މުއްދަތުގެ މާލީ އެހީތެރިކަން ހޯދުމަށް މަގުފަހިވެ، ރާއްޖޭގެ އިގްތިސާދު ދެމެހެއްޓެނިވި ގޮތެއްގައި ކުރިއެރުވުމަށް ބޮޑު އެހީތެރިކަމެއް ލިބިގެންދާނެ ކަމަށް އެމްއެމްއޭއިން ގަބޫލުކުރެއެވެ. އަދި މިއީ ރާއްޖޭގެ މާލީ ދާއިރާ ފުޅާކޮށް، ހަރުދަނާ ކުރުމަށް ކުރެވޭ މަސައްކަތުގައި ލިބުނު މުހިންމު ކުރިއެރުމެއް ކަމަށް ވެސް އެމްއެމްއޭއިން ފާހަގަކުރެއެވެ.