ބޭންކް އޮފް މޯލްޑިވްސް (ބީއެމްއެލް) އިސްލާމިކްގެ “ކޮމިއުނިޓީ އިމްޕެކްޓް ގްރާންޓް”ގެ ދަށުން، އެ ބޭންކުގެ މުވައްޒަފުން އިސްނަގައިގެން ކުރިއަށް ގެންދިޔަ ފަސް މަޝްރޫއެއްގެ މަސައްކަތް ކާމިޔާބުކަމާއެކު ނިންމާލައިފިއެވެ. އަދި މި ގްރާންޓުގެ ދަށުން ހިންގާ އިތުރު ދެ މަޝްރޫއެއްގެ މަސައްކަތް މިހާރު ވެސް ބާރަށް ކުރިއަށްދާ ކަމަށް ބީއެމްއެލްއިން ބުންޏެވެ.
މި ގްރާންޓަކީ ބީއެމްއެލް އިސްލާމިކްގެ ހިދުމަތަށް 10 އަހަރު ފުރުމާ ގުޅިގެން، މުޖުތަމައާ އޮންނަ ގުޅުން ބަދަހިކުރުމުގެ މަގުސަދުގައި މުވައްޒަފުންނަށް ހުޅުވާލި ހާއްސަ ފުރުސަތެކެވެ. މި މަޝްރޫއުތައް މައިގަނޑު ގޮތެއްގައި އަމާޒުކޮށްފައިވަނީ ތައުލީމާއި ތިމާވެއްޓާ ގުޅުންހުރި އިޖުތިމާއީ ކަންކަން ކުރިއެރުވުމަށެވެ.
މި އެހީގެ ދަށުން ނިންމާލި މަޝްރޫއުތަކުގެ ތެރޭގައި ސ. އަތޮޅު ތައުލީމީ މަރުކަޒުގައި ދަރިވަރުންނަށް ހާއްސަކޮށް ހަދާފައިވާ ސްޓަޑީ އަދި ރީޑިން ސަރަހައްދު ހިމެނެއެވެ. ގުދުރަތީ ފެހިކަން ހިމެނޭ ގޮތަށް ފަރުމާކޮށްފައިވާ މި ތަނުގައި ވޯޓާ ރެސިސްޓެންޓް ބެންޗާއި މޭޒު ބަހައްޓައި، ފޮތް ކިޔުމަށް ހިތްފަސޭހަ މާހައުލެއް ވަނީ ގާއިމުކޮށްފައެވެ. މީގެ އިތުރުން ތ. އަތޮޅު މަދަރުސާގެ ކުޅޭ ސަރަހައްދުގެ ވަށާ ފާރު ރޭނުމާއި، ފެނާއި ވެލި ކުޅޭ ސަރަހައްދެއް ތަރައްގީކުރުން ވެސް ހިމެނެއެވެ.
ސްކޫލްތަކަށް އަމާޒުކޮށް ހިންގި އެހެން މަޝްރޫއުތަކަށް ބަލާއިރު، ގދ. އަތޮޅު ސްކޫލުގައި ބެލެނިވެރިންނާއި ދަރިވަރުންނަށް އިށީނދެ ތިބެވޭނެ ބެންޗުތަކެއް ވަނީ ބަހައްޓައިފައެވެ. އަދި ހއ. މުރައިދޫ ސްކޫލުގައި ކްލާސްރޫމްތަކާއި އިދާރީ ބައިތައް ގުޅުވާލުމަށް ހާއްސަ ވޯކްވޭއެއް ހަދައި، ކޮންމެ މޫސުމެއްގައި ވެސް ފަސޭހައިން ހިނގާބިނގާވެ އުޅެވޭނެ ރައްކާތެރި އިންތިޒާމު ވަނީ ހަމަޖައްސައިފައެވެ.
މި މަޝްރޫއުތަކުގެ ތެރޭގައި މާލޭގެ ދަރުމަވަންތަ ހޮސްޕިޓަލުގައި “ސްޓޫޑަންޓް ރިސޯސް ހަބް”އެއް ގާއިމުކުރުން ވެސް ހިމެނެއެވެ. މިއީ ސިއްހީ ދާއިރާއިން ކިޔަވާ ކުދިންނަށް ހާއްސަ ތަނެކެވެ. މިތަނުގައި ބޭސްފަރުވާއާ ގުޅޭ މުހިންމު ފޮތްތަކާއި، “ތްރީ-ޑީ އެނަޓޮމީ އެޓްލަސް” ފަދަ ޑިޖިޓަލް ވަސީލަތްތަކުގެ އިތުރުން މައިކްރޮސްކޯޕް ފަދަ ލެބޯޓްރީ ސާމާނު ވެސް ލިބެން ހުންނާނެ ކަމަށް ބޭންކުން ބުންޏެވެ.