އަދާލަތު ޕާޓީގެ ރައީސަކަށް 99 ޕަސަންޓު ވޯޓާއެކީ އެ ޕާޓީގެ ނައިބުރައީސް ޝައިހް މުހައްމަދު ޝިފާން މިއަދު އިންތިހާބުކޮށްފި އެވެ.
ފަހިވޯޓު މެދުވެރިކޮށް އޮންލައިންކޮށް ކުރިއަށްގެންދިޔަ އަދާލަތު ޕާޓީގެ ރައީސް ހޮވުމަށް ކުރިއަށްގެންދިޔަ އިންތިހާބުގައި ޝައިހް ޝިފާނާ ވާދަކުރެއްވި އިކްރާމް އަބްދުއްސައްތާރަށް ލިބުނީ އެންމެ ޕަސަންޓެކެވެ.
އިންތިހާބުގައި ވޯޓު ލާފައިވަނީ ވޯޓުދިނުމުގެ ހައްގު ލިބިފައިވާ މީހުންގެ ތެރެއިން 22 ޕަސަންޓު މީހުންނެވެ.
އިންތިހާބުގައި ލިބުނު ކާމިޔާބީއާ ގުޅިގެން ޝައިހް ޝިފާން ވަނީ އޭނާއަށް އިތުބާރުކުރައްވައި ވޯޓު ދެއްވި ހުރިހާ އެންމެންނަށް ޝުކުރު އަދާކުރައްވާފަ އެވެ.
ޝައިހް ޝިފާން ވިދާޅުވީ ވިދާޅުވީ އިންތިހާބުގައި އަދާލަތު ޕާޓީގެ މެންބަރުން ގިނަ ހުރިހާ ރަށަކަށް އޭނާގެ ޓީމުން ޒިޔާރަތްކޮށް ސީދާ މެންބަރުންގެ ވާހަކަތައް އަޑު އެހިގެންދިޔުމަކީ ޕާޓީގެ މުސްތަގުބަލު ހަރުދަނާކުރަން އެޅުނު މުހިންމު ފިޔަވަޅެއް ކަމަށެވެ.
ޢަދާލަތު ޕާޓީ އަކީ އިސްލާމްދީނާއި ދިވެހި ގައުމުގެ މަސްލަޙަތު އިސްކޮށް މަސައްކަތް ކުރާ ޕާޓީ އެއްގެ ގޮތުގައި ދަމަހައްޓާ މެމްބަރުންގެ އުއްމީދުތަކާއި އެއްގޮތަށް ކަންކަން ހިންގާ ޕާޓީ އެއްގެ ގޮތުގައި ބައްޓަން ކުރާނެކަމުގެ ޔަގީންކަން ޝަައިހް ޝިފާން ދެއްވި އެވެ.
އިންތިހާބުގައި ވާދަކުރެއްވި އިކްރާމަށް އެއް ޕަސަންޓު ވޯޓުވެސް ނުލިބޭއިރު، އޭނާ ވަނީ މިދިޔަ ހަފްތާގައި ނަން އަނބުރާ ގެންދަވާފަ އެވެ. ނަމަވެސް އެ ޕާޓީން ނިންމީ އިންތިހާބު ކުރިއަށް ގެންދަންށެވެ.
އިކްރާމް ނަން އަނބުރާ ގެންދެވީ ދެފުށް ފެންނަ އަދުލު އިންސާފުގެ އުސޫލުތަކާއި ހިލާފަށް، ހުދުމުހްތާރު ނިޒާމަކަށް މަގުފަހިވާގޮތަށް ހަމަ ބުއްދީގެ މަގުން އެއްކިބާވެ، ކޮންމެ ގޮތެއް ހަދައިގެންވެސް އިންތިހާބުން ބޭނުންވާ ނަތީޖާއެއް ނެރެން ރާވާފައިވާތީ ކަމަށް ވިދާޅުވެ އެވެ.
އަދާލަތު ޕާޓީގެ ރައީސްކަމުގެ މަގާމުގައި އެންމެ ފަހުން ހުންނެވީ މިދިޔަ އެމްޑީޕީ ވެރިކަމުގައި ހޯމް މިނިސްޓަރަކަށް ހުންނެވި އިމްރާން އަބްދުالله އެވެ. އޭނާ ވަނީ އަދާލަތު ޕާޓީގެ ރައީސްކަން ދެ ދައުރު ކުރައްވާފަ އެވެ.