އަދާލަތު ޕާޓީގެ އާ ރައީސް ހޮވުމަށް ބޭއްވި އޮންލައިން އިންތިޚާބުގައި ވޯޓުލީ މެންބަރުންގެ އަދަދު ދެ ހާހަށް ވުރެ މަދުކަން، އެ ޕާޓީން އާންމުކުރި އިންތިޚާބުގެ ތަފާސްހިސާބުން ހާމަވެއްޖެއެވެ. އޮންލައިންކޮށް، ފަހިވޯޓު އެޕްލިކޭޝަން މެދުވެރިކޮށް މިއަދު ހެނދުނު ނުވަޔަކުން ފެށިގެން މިރޭ އަށެއް ޖަހަންދެން ބޭއްވި އިންތިޚާބު ކާމިޔާބުކުރެއްވީ އަދާލަތު ޕާޓީގެ މިހާރުގެ ނައިބު ރައީސް ޝައިޚް މުޙައްމަދު ޝިފާނާއި ރަނިން މޭޓު ޝައިޚް ޢަބްދުالله ރަޝީދެވެ. ޝިފާނަށް 99 ޕަސެންޓު ވޯޓު ލިބުނުއިރު، ޝިފާނާއި ރަޝީދާ ވާދަކުރެއްވި ޑރ. އިކްރާމް ޢަބްދުއްސައްތާރާއި ރަނިން މޭޓުގެ ގޮތުގައި ވާދަކުރެއްވި މުޙައްމަދު މުއްޠަލިބަށް ލިބުނީ އެންމެ ޕަސެންޓެކެވެ. https://sun.mv/217398 އަދާލަތު ޕާޓީގެ އިންތިޚާބު ކޮމިޓީން އާންމުކުރި ވަގުތީ ނަތީޖާއިން ދައްކާ ގޮތުގައި، އިންތިޚާބުގައި ވޯޓުލީ ވޯޓުލެވޭ 8،340 މެންބަރުންގެ ތެރެއިން 22 ޕަސެންޓު މެންބަރުންނެވެ. އެއީ 1،835 މެންބަރުންނެވެ. އެ ޕާޓީގެ މިހާރުގެ ނައިބު ރައީސް ޝައިޚް މުޙައްމަދު ޝިފާން، އަދި ނައިބު ރައީސްކަމަށް ޝައިޚް ޢަބްދުالله ރަޝީދު, 99 ޕަސެންޓު ވޯޓާއެކު އިންތިޚާބުވެއްޖެއެވެ. ފާހަގަކުރެވޭ ގޮތުގައި، މިއަދު ބޭއްވި އަދާލަތު ޕާޓީގެ އިންތިޚާބުގެ ވޯޓުލުން ކުރިއަށް ގެންދިޔައީ ވޯޓު ލާނެ ގޮތަކާ މެދު އެޕާޓީގެ އެތެރޭގައި ޚިޔާލު ތަފާތުވުން އުފެދިފައި ވަނިކޮށެވެ. އެގޮތުން، އެ އިންތިޚާބުގައި ވޯޓު ފޮށި ބެހެއްޓުމަށް އެދިވަޑައިގެން މިމަހު 11ގައި، އެ ޕާޓީގެ ރައީސް ކަމަށް ވާދަކުރެއްވި އިކްރާމް ސިޓީއެއް ފޮނުއްވިއެވެ. ނަމަވެސް އިންތިޚާބުގައި ވޯޓު ފޮށި ބަހައްޓަން ޕާޓީގެ އެތެރޭގެ އިންތިޚާބުތަކަށް ހަދާފައިވާ ގަވާއިދުން ޖާގަ ނުދޭ ކަމަށް އަދާލަތު ޕާޓީން ވަނީ ބުނެފައެވެ. އޭގެފަހުން، އިކްރާމް ނެރުއްވި ބަޔާނެއްގައި ވަނީ، އިންތިޚާބާ ގުޅިގެން ހުރިހާ ކަމެއް ކުރަމުން ދިޔައީ، ދެފުށްފެންނަ ޢަދުލު އިންސާފުގެ އުސޫލުތަކާ ޚިލާފަށް ކަމަށް ތުހުމަތުކުރައްވައި، އަދާލަތު ޕާޓީގެ ރައީސަކު ހޮވާ އިންތިޚާބު ބޮއިކޮޓު ކުރާނެ ކަން ހާމަކުރައްވައިފައެވެ. އަދާލަތު ޕާޓީގެ މިހާރުގެ ނައިބު ރައީސް ޝައިޚް މުޙައްމަދު ޝިފާން އިންތިޚާބުގައި ވާދަކުރެއްވީ ފާހަގަކުރެވޭ ގޮތުގައި، އެ ޕާޓީގެ މިހާރުގެ ރައީސް ޢިމްރާން އަބްދުالله އާއި ޑރ. މުޙައްމަދު ޢިޔާޡް ޢަބްދުއްލަޠީފާއި ޝައިޚް އިލްޔާސް ޙުސައިންގެ ތާއީދާއެކުގައެވެ. އިލެކްޝަންސް ކޮމިޝަނުގެ ދަފުތަރުން ދައްކާ ގޮތުގައި އަދާލަތު ޕާޓީގައި މިވަގުތު 8،267 މެންބަރުން އެބަ ތިއްބެވެ.