ބެލުންތެރިންގެ މެދުގައި ވަރަށް ބޮޑު މަގުބޫލުކަމެއް ހޯދި ހޮލީވުޑް ކޮމެޑީ ފިލްމު "ހޯމް އެލޯން"ގެ ބަތަލާ ކެތެރީން އޮ ހާރާ މަރުވެއްޖެއެވެ. ހޮލީވުޑްގެ ޚަބަރުތައް ގެނެސްދޭ ޕީޕަލް މެގަޒިންގެ ރިޕޯޓެއްގައި ބުނެފައިވާ ގޮތުން އުމުރުން 71 އަހަރުގެ ބަތަލާ މަރުވީ އިއްޔެގެ ވަގުތެއްގައެވެ. ހޮލީވުޑްގެ ބައެއް ރިޕޯޓުތަކުން ބުނެފައިވާ ގޮތުން ކެތެރިން ދިރިއުޅޭ ގެއިން މިދިޔަ ހުކުރު ދުވަހު ފަތިހުގެ ވަގުތެއްގައި ލޮސް އެންޖެލެސްގެ ފަޔަ ޑިޕާޓްމަންޓަށް ކޯލެއް އައި ކަމަށާއި ގަބޫލުކުރެވެނީ އެއީ ބަތަލާ ކެތެރީންގެ ފަރާތުން ލިބުނު ކޯލެއް ކަމަށެވެ. ކެތެރީން ފިލްމު "ހޯމް އެލޯން"ގެ މަންޒަރެއްގައި--ފޮޓޯ/ޕީޕަލް އެ ޑިޕާޓްމަންޓުގެ އޮފިޝަލުންގެ އެހީގައި ކެތެރީން ހޮސްޕިޓަލަށް ގެންދެވުނު ކަމަށާއި ހޮސްޕިޓަލަށް ގެންދިޔައިރުވެސް ބަތަލާގެ ހާލަތު ރަނގަޅު ނޫން ކަމަށް ލޮސް އެންޖެލެސްގެ ފަޔަ ޑިޕާޓްމަންޓުގެ ސްޕޯކްސްޕާސަން ވަނީ މީޑިއާގައި ބުނެފައެވެ. ނަމަވެސް ކެތެރީންގެ އެޖެންސީ ކްރިއޭޓިވް އާޓިސްޓްސް އެޖެންސީ (ސީއޭއޭ)އިން ފަހުން ނެރުނު ބަޔާނެއްގައި ހާމަކުރި ގޮތުގައި ބަތަލާ މަރުވީ ބަލިވެ އުޅޭތާ ދުވަސްތަކެއް ވެފައި ވަނިކޮށް ކަމަށެވެ. ނަމަވެސް އެއީ ކޮންކަހަލަ ބައްޔެއް ކަމެއް ހާމަކޮށްފައެއް ނުވެއެވެ. ކެނެޑާއަށް ނިސްބަތްވާ ކެތެރީންގެ މަރުގެ ޚަބަރާ ގުޅިގެން ހޮލީވުޑުގެ ގިނަ ބަޔަކު ހިތާމަ ކުރަމުން އަންނައިރު ބަތަލާއަށް ސަޕޯޓުކުރާ ވަރަށް ގިނަ ބަޔަކު އަންނަނީ ސޯޝަލް މީޑިއާގައި ހިތާމައިގެ ޝުއޫރުތައް ފާޅުކުރަމުންނެވެ. ކެތެރީން ފިރިމީހާ ރޮބަޓް ބޯ ވެލްޗްއާ އެކު--ފޮޓޯ/އިންސްޓަފްރާމް ކެތެރީންއާ އެކު 1990އިގެ ފިލްމު "ހޯމް އެލޯން"ގައި މަސައްކަތްކުރި ހޮލީވުޑް އެކްޓަރު މެކޯލޭ ކަލްކިން ބަތަލާގެ ހަނދާންތައް އާ ކުރަމުން ބުނީ ކެތެރިންގެ ވަކިވެ ދިއުމަކީ އާއިލާ މެމްބަރަކު ވަކިވެ ދިއުމުގެ އިހުސާސް ކުރުވި ކަމެއް ކަމަށެވެ. "ހޯމް އެލޯން"ގެ ދެ ފިލްމުގައި ވެސް ކެތެރީން ކުޅެފައި ވަނީ މެކޯލޭގެ މަންމަގެ ރޯލެވެ. އެމީ އެވޯޑްސްގެ އިތުރުން ގޯލްޑަން ގްލޯބް އެވޯޑު ކާމިޔާބުކޮށްފައިވާ ބަތަލާގެ ކެރިއަރުގައި ކުޅުނު ގިނަ ފިލްމުތަކުގައި ފެނިފައި ވަނީ ކޮމެޑީ ރޯލްތަކުންނެވެ. ފިލްމީ ދާއިރާގައި 50އަށް އަހަރަށްވުރެ ދިގު މުއްދަތެއްގައި މަސައްކަތްކޮށްފައިވާ ބަތަލާގެ ކެރިއަރުގެ މަގުބޫލު ފިލްމުތަކުގެތެރޭ 1988ގެ ފިލްމު "ބީޓްލް ޖޫސް"، "ހާޓް ބާން"، "އާފްޓަ އަވާސް" އަދި ޓެލެވިޒަން ސީރީސް "ޝިޓްސް ކްރީކް"، "ބެސްޓް އިން ޝޯ" އަދި "އަ މައިޓީ ވިންޑް" ހިމެނެއެވެ. އޭނާ އެންމެފަހުން ބެލުންތެރިންނަށް ފެނިފައި ވަނީ މިދިޔަ އަހަރު ރިލީޒްކުރި ޓެލެވިޒަން ސީރީސް "ދަ ލާސްޓް އޮފް އަސް"ގެ ރޯލަކުންނެވެ. އެމެރިކަން ޕްރޮޑަކްޝަން ޑިޒައިނަރު އަދި އާޓް ޑައިރެކްޓަރު ރޮބަޓް ބޯ ވެލްޗްގެ އަންހެނުން މަރުވިއިރު ދެ މީހުންގެ ކައިވެންޏަށް ދެ ފިރިހެން ކުދިން ވަނީ ލިބިފައެވެ.