އަނބިމީހާ ކޮޓަރިއެއްގައި ބަންދުކޮށް އޭނާގެ ނުރުހުމުގައި ހަށިވިއްކުވާ ކަމުގެ ތުހުމަތުގައި ބަގްލަދޭޝް މީހަކު ހައްޔަރުކޮށްފި އެވެ.
ވީ ކިހިނެއް؟ - މި މައްސަލާގައި ހައްޔަރުކޮށްފައިވަނީ މުހައްމަދު ނަހީދުލް އިސްލާމް، 30، އެވެ. އޭނާ ހައްޔަރުކޮށް ބަންދުގެ މުއްދަތު ޖަހަން އިއްޔެ ކްރިމިނަލް ކޯޓަށް ގެންދިއުމުން 10 ދުވަހުގެ މުއްދަތެއް ވަނީ ޖަހާފަ އެވެ. 
ތަފްސީލް - އޭނާގެ ބަންދު އަމުރުގައިވާ ގޮތުން، އޭނާ ހައްޔަރުކޮށްފައިވަނީ މީހުން ޓްރެފިކް ކުރުމުގެ ކުށުގަ އެވެ. މި ކުށް އޭނާ ކުރިކަމުގެ ކޮންމެވެސް މިންވަރެއްގެ ހެކި ލިބިފައިވާ ކަމަށް ބަންދު އަމުރުގައިވެ އެވެ.
ފުލުހުން ކޯޓުގައި ބުނެފައިވަނީ، އޭނާގެ އަނބިމީހާ ކޮޓަރިއެއްގައި ބަންދުކޮށްފައި ބަހައްޓައިގެން ހަށިވިއްކުމުގެ ކަންކަން ކުރުވާކަމަށް ފުލުހުންނަށް މައުލޫމާތުދީފައިވަނީ އެ އަންހެންމީހާ ކަމަށެވެ. އެގޮތުން، އަނިޔާ ލިބުނު މީހާއާ ގުޅޭ ލިޔެކިއުންތައް ވެސް ފުލުހުން ކޯޓަށް ހުށަހަޅާފައިވެ އެވެ.