ސަރުކާރުގެ ހަރަދުތައް ހަމަޖެއްސުމަށްޓަކައި 1.7 ބިލިއަން ރުފިޔާގެ ޓީ-ބިލް ވިއްކަން ފިނޭންސް މިނިސްޓްރީން ހުޅުވާލައިފިއެވެ. އެ މިނިސްޓްރީން މައުލޫމާތު ދޭ ގޮތުގައި މި ޓީ-ބިލްތައް ވިއްކަނީ ދައުލަތުގެ އެކި ކަންކަން ހިންގުމަށް ބޭނުންވާ ފައިސާ ހޯދުމުގެ ބޭނުމުގައެވެ.
ފިނޭންސް މިނިސްޓްރީން މި ފަހަރު ވިއްކަން ހުޅުވާލި ޓީ-ބިލުތަކުގެ ތެރޭގައި އެންމެ ބޮޑު އަދަދެއް ހިމެނެނީ މި މަހުގެ 29 ވަނަ ދުވަހަށް އަނބުރާ ދެއްކުމަށް ވިއްކާ އެއް ބިލިއަން ރުފިޔާގެ ޓީ-ބިލެވެ. މީގެ އިތުރުން ސެޕްޓެމްބަރު 7 ވަނަ ދުވަހަށް އަނބުރާ ދެއްކުމަށް ވިއްކާ 70 މިލިއަން ރުފިޔާގެ ޓީ-ބިލަކާއި، ނޮވެމްބަރު 30 ވަނަ ދުވަހަށް އަނބުރާ ދެއްކުމަށް ވިއްކާ 75 މިލިއަން ރުފިޔާގެ ޓީ-ބިލެއްގެ އިތުރުން އަންނަ އަހަރުގެ މޭ 31 ވަނަ ދުވަހަށް އަނބުރާ ދެއްކުމަށް ވިއްކާ 597.9 މިލިއަން ރުފިޔާގެ ޓީ-ބިލެއް ހިމެނެއެވެ.
މި ފަހަރު ވިއްކާ ޓީ-ބިލްތަކުގެ އިންޓްރެސްޓް ރޭޓް އުޅެނީ 3.50 ޕަސަންޓާއި 4.60 ޕަސަންޓާ ދެމެދުގައެވެ. އާންމު ގޮތެއްގައި ސަރުކާރުން ވިއްކާ ޓީ-ބިލްތައް ގަންނަނީ ޕެންޝަން ފަންޑާއި، ރާއްޖޭގައި ހިންގާ ބައެއް ބޭންކުތަކާއި ސަރުކާރު ހިއްސާވާ ބައެއް ކުންފުނިތަކުންނެވެ. އަދި އަމިއްލަ ބައެއް ކުންފުނިތަކުން ވެސް މި ޓީ-ބިލްތައް ގަނެއެވެ.
ޓީ-ބިލް އަކީ ދައުލަތަށް ފައިސާ ހޯދުމަށް ސަރުކާރުން ދޫކުރާ ކުރު މުއްދަތުގެ ސެކިއުރިޓީޒްއެކެވެ. ރާއްޖޭގެ ސަރުކާރުން ދޫކުރާ ޓީ-ބިލަކީ ދިވެހި ރުފިޔާއިން ޑިސްކައުންޓް އަގެއްގައި ވިއްކުމަށް ހުށަހަޅައި، މުއްދަތު ހަމަވުމުން މޫނުމަތީ އަގު ނުވަތަ ފޭސް ވެލިއު އަދާކުރާ ގޮތަށް ނަގާ ފައިސާއެވެ.