މުއިއްޒު އާއި އެއްވެސް ގުޅުމެއް ނެތް، މުއިއްޒުގެ ސަރުކާރުގެ އެއްވެސް ވުޒާރާއަކާއި ގުޅުމެއް ނެތް ދަނޑެއް ރަށު ކައުންސިލުން އެޅުމުން އެތަން ހުޅުވުމަށް ރަސްމިއްޔާތެއް ބާއްވައި އެކަމުގައި ކުޑަ ކުދިން ތަކެއް ސިޔާސީ ބޭނުމަށް މުއިއްޒު ވަނީ ބޭނުން ކޮށްފައެވެ.
ކުޑަކުދިން ސިޔާސީ ކަންކަން ހާސިލް ކުރަން ބޭނުމަށް ބޭނުން ކުރުމަކީ ޤާނޫނީ ގޮތުން މަނާ ކަމެކެވެ. ހާއްސަކޮށް 11 އަހަރުގެ ކުޑަ ކުއްޖަކު ގޯލުގައި ބަހައްޓައި ބޮޑު ފިރިހެނަކު، ގަޔަށް ލެވުނުހާ ބާރެއް ލާފައި ކުޑަ ކުޑަ ގޯލަކާއި ދިމާލަށް އަމާޒު ކޮށް ބޯޅައެއް ޖެހުމަކީ، އެ ކުއްޖާ ޖިސްމާނީ އަނިޔާއަކަށް ހުށައެޅުމެވެ. ކުޑަ ކުއްޖަކު ޖިސްމާނީ އަނިޔާއަކަށް ހުށައެޅި ކަމުގެ ދައުވާ މިކަން ކުރި މީހުންގެ މައްޗަށް އުފުލޭން ޖެހޭނެއެވެ. އެ ބޯޅަ އެކުއްޖާ ހަށިގަނޑަށް ނޭރީ ހަމަ ކިރިޔާއެވެ. އިއްތިފާގުންނެވެ. ނަސީބު ރަނގަޅު ކަމުންނެވެ. ވީޑިޔޯ އިން ފްރޭމް ނަގައިގެން ބަލާލި އިރު، ހަށިގަނޑަށް ބޯޅަ ނާރައި އިނީ އެންމެ އިންޗިއެއް ހާވަރެވެ.
ވެރިއަކު ދުނިޔެއިން ރަންވެ ބުއްދި ގޯސްވިޔަސް މިއީ ބޮޑުވަރެވެ. މުއިއްޒު ކުޑަ ކުޑަ ތުއްތު ކުޖަކު ހުރި ގޯލަށް ބޯޅަ ޖެހުމުން އެކަމާއި އަތް ޖަހާ، މުއިއްޒަށް ތާޢީދު ކޮށް، ސަލާން ގަލާން ކޮށް، އެކަން ސެލެބްރޭޓް ކުރި މަަންޒަރު ސޯޝަލް މީޑިޔާގައި އާންމު ކުރި ވީޑިޔޯ ތަކުން ފެންނަން އެބަހުއްޓެވެ. މިއީ ކޮންކަހަލަ މީހެއް ތޯއެވެ. މީނާ އާއި އެކު މި އުޅެނީ ކޮންކަހަލަ ނުބައި ބައެއްތޯއެވެ. ބަޔަކު ހައިރާންވެ އަންތަރީސް ވެދާނެއެވެ.
ސިޔާސީ މެޑަލް ޖެހުމާއި، ސިޔާސީ ސްޓަންޓް ޖައްސައި، މާލޭގައި މުޒާހަރާއެއް އޮތަތީވެ، އެއަށް އޮތް ތާޢީދު ކުޑަ ކުރަން މިވަރަށް ތެޅި ފޮޅި އަތުން ފައިން އެންމެ ފަހުން ގޯސް ހެދޭ އިރުވެސް ނޭނގެއެވެ. މުއިއްޒުގެ ވެރިކަން މި އޮތީ ވެއްޓިފައެވެ. ކިތަންމެ ރަށަކަށް ދިޔަޔަސް، ކިތަންމެ ބާރުތަކެއް މުށަށް ނެގިއަސް، ދެނެއް ރައްޔިތުންގެ ތާޢީދާއި ވޯޓެއް މުއިއްޒަށް ލިބޭނެ ގޮތެއް ނެތެވެ.