ޒުވާނުންނަށް ވަޒީފާގެ ފުރުސަތުތަކަށް މަގުފަހިކޮށްދިނުމަށްޓަކައި ޔޫތު މިނިސްޓްރީއިން ކުރިއަށް ގެންދާ ‘ކިއްސަރު’ ޕްރޮގްރާމް މޫސުން ގޯސްވުމުގެ ސަބަބުން އަންނަ މަހު  ތިންވަނަ ދުވަހު ފަށާ ގޮތަށް ލަސްކޮށްފިއެވެ.
ޔޫތް މިނިސްޓްރީން މައުލޫމާތު ދެއްވި ގޮތުގައި އދ. މަހިބަދޫގައި އޮންނަ ކިއްސަރު ފެއަރ މިހާރު ހަމަޖެހިފައވާ ގޮތުން އޮންނާނީ ސެޕްޓެމްބަރ މަހުގެ 3 އަދި 4 ވަނަ ދުވަހުއެވެ.
ފެއަރ ފެށޭނީ ސެޕްޓެމްބަރ މަހުގެ 3 ވަނަ ދުވަހު ހެނދުނު 9:00 ގައެވެ. ނަމަވެސް ފެއަރ ރަސްމީކޮށް ހުޅުވުން އޮންނާނީ ހަމަ އެ ދުވަހުގެ ހަވީރުއެވެ. ފެއަރ ހުޅުއްވައި ދެއްވާނީ ޔޫތް މިނިސްޓަރ އިރުތިޝާމް އާދަމް އެވެ.
މި ފެއާއަކީ މަހިބަދޫގައި ބޭއްވި ނަމަވެސް މުޅި އަތޮޅުގެ ޒުވާނުންނަށް އަމާޒުކޮށްގެން ކުރިއަށް ގެންދާ ފެއާއެއް ކަމަށް އެ މިނިސްޓްރީން ބުނެއެވެ. އެގޮތުން މި ފެއާގައި 100 އަށް ވުރެ ގިނަ ވަޒީފާގެ ފުރުސަތު ތަނަވަސް ވެގެން ދާނެއެވެ. އަދި މިފެއަރގައި އެ އަތޮޅުގެ 10 ރިޒޯޓްތަކާއި އަމިއްލަ ވިޔަފާރިތަކާއި ސަރުކާރުގެ މުވައްސަސާތަކަށް ބައިވެރިވެގެން ޖުމްލަ 20 އާއި 25 ދެމެދުގެ ސްޓޯލް ހުންނާނެއެވެ.
ޔޫތް މިނިސްޓްރީން ވަނީ ފެއަރ އޮންނަ ގަޑިތަކުގައި އަތޮޅުގެ އެހެން ރަށްތަކުން އަންނަ މީހުންނަށް ދަތުރު ފަތުރު ކުރުމުގެ އިންތިޒާމު ވެސް ހަމަޖައްސާފައެވެ. އެގޮތުން ފެރީގެ ހިދުމަތް މެދުރެވިކޮށް މަހިބަދޫ އަށް ހިލޭ ދެވޭނެއެވެ.
މި ފެއާގެ މަގުސަދަކީ ޒުވާނުންނަށް އެމީހުން އުޅޭތަން ދޫކޮށްނުލާ ވީހާވެސް ކައިރިން ވަޒީފާގެ ފުރުސަތުތަކެއް ތަނަވަސްކޮށްދިނުން ކަމަށް އޭނާ ވަނީ ވިދާޅުވެފައެވެ.
ވަޒީފާގެ ފުރުސަތުތަކުގެ އިތުރުން ވަޒީފާއެއް ހޯދުމަށާއި އެކަމަށް ތައްޔާރުވުމުގައި ކުރެވިދާނެ ކަންތައްވެސް އެ ފެއާގައި ކިޔައިދޭނެއެވެ.
މިފެއަރ ގައި ނެގޭ ގުރުއަތުން ތަފާތު އިނާމު ހޯދުމުގެ ފުރުސަތު ވެސް ވަނީ ހުޅުވާލެވިފައެވެ.