ސައުދީ އަރަބިއްޔާގެ ވެރިރަށް ރިޔާޟްގައި ހުންނަ އެމެރިކާގެ އެމްބަސީއަށް އަމާޒުކޮށް ދެ ޑްރޯން ހަމަލާއެއް ދީފި ކަމަށް ސައުދީ ޑިފެންސް މިނިސްޓްރީން ބުނެފިއެވެ.
ސައުދީ ޑިފެންސް މިނިސްޓްރީގެ ތަރުޖަމާނު ވިދާޅުވި ގޮތުގައި، މިހާތަނަށް ހޯދި ހޯދުންތަކުން އެނގޭ ގޮތުގައި މި ހަމަލާ ދީފައިވަނީ ދެ ޑްރޯން ބޭނުންކޮށްގެންނެވެ. މި ހާދިސާގެ ސަބަބުން އެމްބަސީގެ އިމާރާތުގައި ކުޑަ އަލިފާނުގެ ހާދިސާއެއް ހިނގައި، އިމާރާތަށް ކޮންމެވެސް ވަރެއްގެ ގެއްލުންތަކެއް ލިބިފައިވާ ކަމަށް އޭނާ ފާހަގަކުރެއްވިއެވެ.
މި ހަމަލާ ދީފައިވަނީ މިއަދުގެ ފަތިހުގެ ވަގުތެއްގައެވެ. ހާދިސާ ހިނގި ވަގުތަކީ އެމްބަސީ ބަންދު ގަޑިއަކަށް ވުމުން، އެ ވަގުތު އިމާރާތުގައި މީހަކު ނެތުމުގެ ސަބަބުން އެއްވެސް މީހަކަށް އަނިޔާއެއް ލިބިފައި ނުވާ ކަމަށް މިކަމާ ގުޅުންހުރި ފަރާތްތަކުން މައުލޫމާތު ދެއެވެ.
މަންޒަރު ދުށް ބައެއް ފަރާތްތަކުން ބުނި ގޮތުގައި، ރިޔާޟްގެ ޑިޕްލޮމެޓިކް ކުއާޓަރ ސަރަހައްދުން ބާރުގަދަ ގޮވުމެއްގެ އަޑު އިވި، އެމްބަސީ ހުންނަ ސަރަހައްދުން ކަޅު ދުން އަރަމުންދާ މަންޒަރު ވަނީ ފެނިފައެވެ.
މި ހަމަލާއަކީ ފާއިތުވި ހޮނިހިރު ދުވަހު އެމެރިކާ އާއި އިޒްރޭލުން އީރާނަށް ދިން ހަމަލާތަކާ ގުޅިގެން، އެމެރިކާގެ އަސްކަރީ މަރުކަޒުތައް ހުންނަ ގަލްފުގެ ގައުމުތަކަށް އަމާޒުކޮށް އީރާނުން ދެމުންދާ މިސައިލް އަދި ޑްރޯން ހަމަލާތަކުގެ ތެރެއިން ދިން ހަމަލާއެއް ކަމަށް ބެލެވެއެވެ.
މި ހާދިސާއާ ގުޅިގެން އެމެރިކާ އެމްބަސީން ވަނީ ރިޔާޟް، ޖިއްދާ އަދި ދަހްރާންގައި ދިރިއުޅޭ އެމެރިކާގެ ރައްޔިތުން ރައްކާތެރި ތަންތަނުގައި މަޑުކުރުމަށް އަންގާފައެވެ. އަދި ވަކި ގޮތެއް އަންގަންދެން އެމްބަސީގެ ސަރަހައްދަށް ނުދިއުމަށް ވެސް ވަނީ އިރުޝާދު ދީފައެވެ.