އީރާނުގެ ރޫހާނީ ލީޑަރު އާޔަތުﷲ އަލީ ޚާމަނާއީ އަވަހާރަކޮށްލުމުގެ މަސްތަކެއް ކުރިން އެމެރިކާއާއި އިޒްރޭލުގެ ޖާސޫސީ ބާރުތަކުން އެ މަނިކުފާނަށް ފާރަލަމުންދިޔަ ކަމަށް ރިޕޯޓުތަކުން ހާމަވެއްޖެއެވެ. ސީއެންއެންއިން އެ ނޫހަށް އެ މައުލޫމާތު ހިއްސާކުރި މަސްދަރުތަކާ ހަވާލާދީ ބުނާގޮތުގައި، އިޒްރޭލާއި އެމެރިކާގެ ޖާސޫސީ އިދާރާތަކުން ދިޔައީ ޚާމަނާއީގެ އާދަތަކާއި، އެމަނިކުފާނު ބައްދަލުކުރައްވާ މީހުންނާއި، މުއާސަލާތީ ވަސީލަތްތަކުގެ އިތުރުން ނުރައްކާތެރި ހާލަތްތަކުގައި ރައްކާތެރިކަން ހޯއްދަވާނެ ތަންތަން ވަރަށް ގާތުން ބަލަމުންނެވެ. މީގެއިތުރުން، އީރާނުގެ ސިޔާސީ އަދި އަސްކަރީ އިސްވެރިންގެ ހަރަކާތްތަކަށް ވެސް އެ ފަރާތްތަކުން ދިޔައީ ފާރަލަމުންނެވެ. މަސްދަރުތަކުން ބުނި ގޮތުގައި މިދިޔަ މަދު ދުވަސްކޮޅުގެ ތެރޭގައި ޖާސޫސީ އިދާރާތަކަށް ވަނީ ރަނގަޅު ފުރުސަތެއް ލިބިފައެވެ. އެގޮތުން ތެހެރާންގައި ހުންނަ ޚާމަނާއީގެ އޮފީހާއި، ރިޔާސީ ގަނޑުވަރާއި، ގައުމީ ސަލާމަތާބެހޭ އިދާރާތައް ހުންނަ ސަރަހައްދުގައި ހޮނިހިރު ދުވަހުގެ ހެނދުނު އީރާނުގެ އެންމެ އިސްވެރިންގެ ބައްދަލުވުމެއް ބޭއްވުމަށް ހަމަޖެހިފައިވާކަން ޖާސޫސީ އިދާރާތަކަށް އެނގުނެވެ. އިސްރާއިލުގެ މަސްދަރަކުން ބުނިގޮތުގައި، އާންމުކޮށް ސަލާމަތީ ފިޔަވަޅުތައް ވަރުގަދަކުރައްވާ ޚާމަނާއީއަށް، ރޭގަނޑަށްވުރެ ދުވާލުގެ ވަގުތުތަކުގައި ނުރައްކާ ކުޑަކަމަށް ގަބޫލުކުރެއްވި، ސަލާމަތީ ކަންކަމަށް ކޮންމެވެސް ވަރެއްގެ ލުޔެއް ދެއްވުނެވެ. މިއީ އިޒްރޭލާއި އެމެރިކާގެ އިސް އޮފިޝަލުން ދެކުނުގޮތުގައި ހަމަލާދިނުމަށް ލިބުނު ރަނގަޅު ފުރުސަތެކެވެ. އެމެރިކާއިން އީރާނުގެ ރޫހާނީ ލީޑަރު ޚާމަނާއީ ހުންނެވި އޮފީސް ކޮމްޕައުންޑަށް ހަމަލަ ދިނުމަށްފަހުގައި (ކ) އަދި ކުރިން އޮތް ގޮތް (ވ) -- މިކަމާ ގުޅިގެން، ކުރިން ރޭގަނޑު ދޭން ރޭވި ހަމަލާ ދުވާލުގެ ވަގުތަށް ބަދަލުކުރެވުނުކަމަށް ސީއެންއެންގެ ރިޕޯޓުގައިވެއެވެ. އިސްރާއިލުގެ އަސްކަރީ އިސްވެރިޔާ، ވައިގެ ސިފައިންގެ ޕައިލެޓުންނަށް ފޮނުއްވި މެސެޖެއްގައި "އޮޕަރޭޝަން ރޯރިން ލަޔަން" ހޮނިހިރު ދުވަހުގެ ފަތިހު ފެށޭނެކަމަށާއި، ކަނޑައެޅިފައިވާ އަމާޒުތަކަށް ހަމަލާދިނުމުގެ ހުއްދަ ދީފައިވާކަން އެންގެވިއެވެ. އިސްރާއިލު ގަޑިން ހެނދުނު ހައެއް ޖަހާކަންހާއިރު، އިސްރާއިލާއި އެމެރިކާ ގުޅިގެން ދިން ވަރުގަދަ ހަމަލާތަކުގައި، އިސްރާއިލުގެ ހަނގުރާމަމަތީ މަތިންދާބޯޓުތަކުން އެ ސަރަހައްދަށް ހަމަލާދިނެވެ. މި ހަމަލާތަކުގައި ބޭނުންކުރީ އަމާޒަށް ސީދާ ވާސިލްވާ ޒަމާނީ ހަތިޔާރާއި ދުރު ރާސްތާގެ މިސައިލްތައް ކަމަށް މަސްދަރުތަކުން ބުންޏެވެ. އިސްވެރިން ތިއްބެވި ތިން ތަނަކަށް އެއްވަގުތެއްގައި ހަމަލާ އެރިއެވެ. އޭގެ ގަޑިއިރުތަކެއް ފަހުން، އޭރުގެ ރައީސް ޑޮނަލްޑް ޓްރަމްޕް ވަނީ ޚާމަނާއީ އަވަހާރަވެފައިވާކަން އިއުލާންކުރައްވާފައެވެ. ޓްރަމްޕް އޭނާގެ ޓްރުތު ސޯޝަލް މީޑިއާގައި ވިދާޅުވީ، އެމެރިކާއާއި އިޒްރޭލުގެ ވަރުގަދަ ޖާސޫސީ ނިޒާމުތަކުގެ ކުރިމަތީގައި، ޚާމަނާއީއަށާއި އީރާނުގެ އެހެން ވެރިންނަށް ސަލާމަތްވުމުގެ އެއްވެސް ފުރުސަތެއް ނުލިބުނު ކަމަށެވެ.މި ހަމަލާގައި ޚާމަނާއީގެ އިތުރުން އީރާނުގެ ޑިފެންސް މިނިސްޓަރާއި، މިލިޓަރީ ކައުންސިލްގެ ވެރިޔާ އަދި ރިވޮލިއުޝަނަރީ ގާޑްސްގެ އިސް ކޮމާންޑަރުން އަވަހާރަވިއެވެ. ނަމަވެސް، މި ހުރިހާ ބޭފުޅުން އެއްތަނަކަށް އެއްވީ ކޮން ސަބަބަކާ ހުރެކަން އަދި ސާފެއް ނުވެއެވެ. ސީއެންއެން ރިޕޯޓުކުރި ގޮތުގައި މި އޮޕަރޭޝަނުން ހާމަވެގެން ދިޔައީ، އީރާނުގެ އެތެރޭގައި އިސްރާއިލާއި އެމެރިކާގެ ޖާސޫސީ ނިޒާމު އޮތް ވަރުގަދަކަމެވެ. އެ ނޫހަށް އިސްރާއިލުގެ އަސްކަރީ އޮފިޝަލަކު ވިދާޅުވިގޮތުގައި، އިޒްރޭލުން އަބަދުވެސް ދުޝްމަނުންގެ އިސްވެރިންގެ ހަރަކާތްތައް ބަލައެވެ. މި އޮޕަރޭޝަނަކީ އިސްރާއިލާއި އެމެރިކާ ގުޅިގެން ހަފުތާތަކެއް ވަންދެން ރޭވި ކަމެކެވެ. ބޮޑުވަޒީރު ނަތަންޔާހޫއާއި ޓްރަމްޕް ބޭއްވި ބައްދަލުވުމެއްގައި، އީރާނުގެ ނިއުކްލިއާ މަސައްކަތްތަކާ ގުޅޭ މައުލޫމާތު ހިއްސާކުރެވުނުއިރު، އީރާނުގެ މިސައިލް ސައިޓްތަކަށް ހަމަލާދިނުމަށް ޓްރަމްޕް ތާއީދުކުރެއްވިކަމަށް ވެސް ސީއެންއެންގެ މަސްދަރުތަކުން ބުނެއެވެ. އެގޮތުން މި ހަމަލާއަށް ތައްޔާރުވުމަށް އެމެރިކާއިން ވަނީ މެދުއިރުމައްޗަށް އިތުރު އަސްކަރީ ވަސީލަތްތައް ވެސް ފޮނުވާފައެވެ. މި މުއްދަތުގައި އިސްރާއިލުގެ އަސްކަރީ އަދި ޖާސޫސީ އިދާރާތަކުގެ ވެރިން ތަކުރާރުކޮށް ވޮޝިންޓަނަށް ޒިޔާރަތްކޮށް، އޮޕަރޭޝަންގެ ފަހުގެ ތައްޔާރީތައް ނިންމާފައިވާކަމަށް ވެސް ރިޕޯޓުތައް ބުނެއެވެ.