އައްޑޫ ސިޓީގައި މަސްތުވާތަކެތި ވިޔަފާރި ކުރުމުގައި އިސްކޮށް ހަރަކާތްތެރިވާ ކަމަށް ތުހުމަތު ކުރެވޭ ބަޔެއްގެ މައްޗަށް ހިންގި ތުހުމަތުގެ މުއްދަތު ހަމަވިއިރު އެ މީހުންނަށް ދައުވާ ކުރެވޭ ވަރަށް ހެކި ހޯދިފައި ނުވާތީ، ބަންދުގައި ތިިބި މީހުން ދޫކޮށްލަން ޕްރޮސެކިއުޓާ ޖެނެރަލް (ޕީޖީ) އޮފީހުން ލަފާދީފިއެވެ. އައްޑޫގައި މަސްތުވާތަކެތީގެ ވިޔަފާރީ ހިންގާ ބޮޑުންކަމަށް ތުހުމަތުކޮށް، މި ސަރުކާރުން އޮޕަރޭޝަން އަލިމަގުގެ ނަމުގައި ހިންގި ހަރަކާތެއްގައި މިދިޔަ ޑިސެންބަރު މަހުގެ ހަތަރުވަނަ ދުވަހު ވަނީ ފަސް މީހަކު ހައްޔަރުކޮށްފައެވެ. އެ މައްސަލައިގައި ތުހުމަތު ކުރެވޭ މީހުންނަކީ: ސ. ހިތަދޫ، ކޮންމުލި، ޢަލީ ނަދީމް (މައިލޯ ނަދަމާ) ސ. ހިތަދޫ، ވެޔޮފެހެބުރުގެ، އިބްރާހީމް ސިރާޖް ސ. ހިތަދޫ، ދޮރުފޮތިމާގެ، ހަސަން އަލްފާފު ސ. ހިތަދޫ، ކެކުރިމާގެ، އަމީން މުހައްމަދު ސ. ހިތަދޫ، ލޮބްސްޓަމް، ސަލާމް ސަޢީދު ސ. ހިތަދޫ، ފަލާހް، ހާފިޘް ފައުޒީ ދ. ހުޅުދެލި، ޢަންބަރީގެ، ޒަހްނާ އަހްމަދު ޕީޖީ އޮފީހުން ބުނީ އެ މީހުންގެ މައްޗަށް ކުރެވެނީ މައިގަނޑު ދެ ތުހުމަތެއް ކަމަށެވެ. އެއީ ކުށް ކުރާ ޖަމާޢަތެއްގައި ބައިވެރިވުމާއި މަނީ ލޯންޑްރިންގެ ތުހުމަތު ކަމަށެވެ. އެ އޮފީހުން ބުނީ އެ މައްސަލައިގެ ތަހުގީގުކުރުމަށް ގާނޫނުގައި ކަނޑައެޅިފައިވާ މުއްދަތު އިއްޔެއަށް ހަމަވެފައިވާ ކަމަށެވެ. އެ މުއްދަތުގައި ލިބިފައިވާ ހެކި ގަރީނާ ވަޒަންކޮށް ބެލިއިރު، އެ މައްސަލައިގައި ތުހުމަތުކުރެވޭ މީހުން، ކުށްކުރާ ޖަމާޢަތެއްގައި ބައިވެރިވިކަން ނުވަތަ މަނީ ލޯންޑާކުރިކަން ގާނޫނުގައި ކަނޑައެޅިފައިވާ މިންގަނޑަށް ސާބިތުކޮށްދެވޭ މިންވަރަށް ހެކި ގަރީނާ ލިބިފައި ނުވާ ކަމަށް ޕީޖީ އޮފީހުން ބުންޏެެވެ. އެ މައްސަލައިގެ ތަހުގީގު މުއްދަތު ގާނޫނު ތަންދޭ އެންމެ ދިގު މުއްދަތާ ހަމައަށް އެކި ފަހަރުމަތިން އިތުރުކޮށްދިންކަން އެ އޮފީހުން ފާހަގަކުރިއެވެ. ނަމަވެސް، އެ މުއްދަތުގެ ތެރޭގައި ތަހުގީގު އެކަށީގެންވާ ވަރަށް ފުރިހަމަކުރެވި، ދަޢުވާކުރެވޭ މިންވަރަށް ހެކި ގަރީނާ ހޯދިފައި ނުވާ ކަމަށް އެ އޮފީހުން ބުންޏެވެ. ޕީޖީ އޮފީހުން ބުނީ ޖިނާއީ އިޖުރާއަތުގެ ގާނޫނުގައި، ތަހުގީގުކުރުމަށް ކަނޑައެޅިފައިވާ މުއްދަތުގެ ތެރޭގައި ދަޢުވާކުރެވޭ މިންވަރަށް ހެކި ލިބިފައިނުވާނަމަ، ތަހުގީގީ އިދާރާއިން އެ މީހަކު ބަންދުން ދޫކޮށްލަންވާނެކަމަށް ބަޔާންކޮށްފައިވާ ކަމަށެވެ. އެހެންކަމުން، އެ ނިންމުމާއެކު މައްސަލައިގައި ތުހުމަތުކުރެވޭ މީހުންގެ ތެރެއިން ބަންދުގައި ތިބި މީހުން ބަންދުން ދޫކޮށްލުމަށް ފުލުހުންނަށް ލަފާދީފައިވާނެ ކަމަށް އެ އޮފީހުން ބުންޏެވެ. އެ މައްސަލައިގައި ދަޢުވާކުރެވޭ މިންވަރަށް ހެކި ގަރީނާ ލިބިފައި ނުވާތީ، މައްސަލަ ޑިކްލައިންކުރި ނަމަވެސް، އައު ހެކި ލިބިއްޖެ ހާލަތެއްގައި، ޖިނާއީ އިޖުރާއަތުގެ ގާނޫނުގެ ދަށުން އަލުން ދަޢުވާކުރުމަށް އެދި ހުށަހެޅުމަށް ދިވެހި ފުލުހުންގެ ޚިދުމަތަށް ލަފާދީފައިވާނެ ކަމަށް ޕީޖީ އޮފީހުން ބުންޏެވެ. https://sun.mv/216269 އެ މައްސަލައިގައި ހައްޔަރުކޮށްފައިވާ މީހުންގެ ބަންދުގެ މުއްދަތު އެކި ފަހަރު މަތިން އިތުރުކޮށްފައިވާއިރު، އައްޑޫގައި އެންމެ ހަރަކާތްތެރި އެއް ގްރޫޕު ކަމަށްވާ "މައިލޯ"ގެ ކުރީ ސަފުން ފެންނަ އެއް މޫނު ކަމަށްވާ ނަދަމާގެ ބަންދުގެ މައްސަލަ ހައިކޯޓަށް ވެސް ހުށަހެޅިއެވެ. ހައިކޯޓުން މިދިޔަ މަހުގެ ހަތަރު ވަނަ ދުވަހު ނިންމީ ނަދަމާގެ ބަންދުގެ މުއްދަތު އިތުރުކުރީ ރަނގަޅަށް ކަމަށެވެ. ސަރުކާރުން ގޭންގްތައް ހުއްޓުވަން މިދިޔަ އަހަރު ތަންފީޒުކުރަން ފެށި އާ ގާނޫނުގެ ދަށުން ގޭންގެއްގެ ގޮތުގައި ކަނޑައަޅަން ޕްރޮސެކިއުޓާ ޖެނެރަލް (ޕީޖީ)ގެ އޮފީހުން ހުށަހެޅި ފުރަތަމަ ގްރޫޕެއްގެ ގޮތުގައި ހުށަހަޅައިފައިވަނީ ވެސް އައްޑުއަށް ނިސްބަތްވާ ގުރޫޕެކެވެ. 'ސްކޫޕު'ގެ ނަމުގައި ހިންގާ އެ ގުރޫޕުގެ މައްސަލަ ހައިކޯޓަށް ވަނީ ހުށަހަޅައިފައެވެ. https://sun.mv/218585 އެ މައްސަލަ ބަލާ ހައިކޯޓުގެ ބެންޗު އެ ކޯޓުން އާއްމުކޮށްފައިވާއިރު، ބެންޗުގައި ހިމެނެނީ، ފަނޑިޔާރު މުހައްމަދު ޝަނީޒު އަބްދުﷲ، އަބްދުލްމާނިއު ހުސެއިން އަދި އިބްރާހީމް މާހިރެވެ.