ފަހު ނޭވަ އާ ޖެހެން ދެންވެސް ޖުމްހޫރީ ޕާޓީގެ ލީޑަރު ގާސިމް އިބުރާޙިމްގެ ދިފާއުގައި ދެމި ހުންނާނެ ކަމަށް ކުރީގެ ރައީސް އަދި އެމްޑީޕީގެ ރައީސް މުހައްމަދު ނަޝީދު ވިދާޅުވެއްޖެއެވެ.
މިރޭ ކާނިވާ ސަރަހައްދުގައި ބޭއްވި އެމްޑީޕީގެ ޖަލްސާގައި ވާހަކަ ދައްކަވަމުން ރައީސް ނަޝީދު ވިދާޅުވީ އެމްޑީޕީ އަކީ ވެރިކަމުގެ ދަހިވެތިކަމުގައި މަސައްކަތް ކުރާ ބައެއް ނޫން ކަމަށާއި ރައީސް ޔާމީން އެގޮތަށް ހީފުޅު ކުރައްވާ ނަމަ އެއީ ދޮގު ހީއެއް ކަމަށެވެ. އަދި އެމްޑީޕީން، ރާއްޖޭގައި، ރާއްޖޭގެ ގާނޫނު އަސާސީ ދަމަހައްޓާނެ ކަމަށެވެ. އެމަނިކުފާނު ވިދާޅުވީ އެމްޑީޕީ ފުރަތަމަވެސް ނުކުތީ ރައްޔިތުންނަށް ހެޔޮ ވެރިކަމެއް ހޯދައިދިނުމަށް ކަމަށާއި އެ މަގްސަދުގައި އަދިވެސް މަސައްކަތް ކުރައްވާނެ ކަމަށެވެ.
"އަޅުގަނޑުގެ ސިޔާސީ ހަތުރަކަށް ވެދާނެ ގާސިމް އިބްރާހިމް. އެހެން ނަމަވެސް އަޅުގަނޑުމެން މިރޭ މިވަނީ އެމަނިކުފާނުގެ ދިފާއުގައި ކުރެވެން ހުރި ހުރިހާ މަސައްކަތެއް އަޅުގަނޑު ކުރާނެ. ގާސިމްގެ މުދަލަކަށް އަރައެއް ނުގަނެވޭނެ. ގާސިމްގެ ޒާތަކާ އެއް ނުބެހެވޭނެ. އަޅުގަނޑުމެން ނުކުންނާނަން ގާސިމްގެ ދިފާއުގައި،" ނަޝީދު ވިދާޅުވިއެވެ.
އެމަނިކުފާނު ވިދާޅުވީ އިންސާފަށް، އެޕާޓީން ފެށި ދަތުރުގައި އަދިވެސް ސާބިތު ކަންމަތީގައި ހުންނެވި ކަމަށެވެ.
"ޖުމްހޫރީ ޕާޓީއަށާއި އަދާލަތް ޕާޓީ އަށް އަދި މަދަނީ ޖަމިއްޔާތައް. އަދި އަޅުގަނޑުމެނާ އެކީގައި ގާނޫނު އަސާސީގެ ހިމާޔަތުގައި މަސައްކަތް ކުރައްވަން އެހީތެރިވެދެއްވަން ނުކުންނަވަން ތައްަޔާރަށް ތިބި އެންމެނަށް އަޅުގަނޑުގެ ހިތުގެ އެންމެ ފުން މިނުން ޝުކުރު ދަންނަވަން. އަދި ތިބޭފުޅުންނާ އެކުގައި އަބަދުވެސް އަޅުގަނޑު ހުންނާނެ ކަމުގެ ފުރިހަމަ ޔަގީންކަން އަރުވަން،" ޖަލްސާ ނިންމަވާލައްވަމުން ރައީސް ނަޝީދު ވިދާޅުވިއެވެ.