މަޝްވަރާތަކުގައި ބައިވެރިވެވަޑައިނުގަންނަވާނެ ކަމަށް ޕީޕީއެމްގެ ލީޑަރ ރައީސް މައުމޫނު އަބުދުލް ގައްޔޫމު ވިދާޅުވުމަކީ ދެރަކަމެއް ކަމަށް އެމްޑީޕީން ބުނެފިއެވެ.
ރޭ ޕީޕިއެމުން އައްޑުގައި ބޭއްވި ޖަލްސާގައި ވާހަކަ ދައްކަވަމުން ރައީސް މުހައްމަދު ނަޝީދާއެކު މަޝްވަރާތަކުގައި ބައިވެރިވެވަޑައި ގެންނެވުމަށް ދެކޮޅު ހައްދަވާކަން މައުމޫނުވަނީ އިއުލާން ކުރައްވާފައެވެ.
މައުމޫނުގެ ވާހަކަތަކާއި ބެހޭ ގޮތުން އެމްޑީޕީގެ ތަރުޖަމާނު އިމްތިޔާޒު ފަހުމީ މީޑީއާތަކަށް ފޮނުއްވި މެސެޖެއްގައި ވިދާޅުވެފައިވަނީ މަޝްވަރާތަކުގައި ބައިވެރިވުމަށް ރައީސް މައުމޫނު ދެކޮޅު ހެއްދެވުމަކީ ދެރަކަމެއް ކަމަށާއި، ގައުމުގެ މަސްލަހަތާއި ގުޅިފައިވާ ކަންކަމުގައި އަބަދުވެސް ހުއްޖަތު ދައްކަވަމުން ގެންދަވާ ކަމަށާއި، މަޝްވަރާތަކުގައި ބައިވެރިވެވަޑައި ނުގެންނެވުމަކީ ގައުމަށް އެންމެ ރަނގަޅު ގޮތަކަށް ނުވާނެ ކަމަށެވެ.
އަދި އެމްޑީޕީން އޮތީ މަޝްވަރާތަކުގައި ބައިވެރިވާން ތައްޔާރަށް ކަމަށް ވެސް އިމްތިޔާޒު ފަހުމީގެ މެސެޖުގައި ވިދާޅުވެފައިވެއެވެ.
ޕީޕީއެމުން ރޭ ބޭއްވި ޖަލްސާގައި ވާހަކަ ދައްކަވަމުން ރައީސް މައުމޫނު ވިދާޅުވީ، މަޝްވަރާތަކުގައި ބައިވެރިވެވަޑައިނުގެންނެވުމަށް ނިންމެވީ، އެމަނިކުފާނާއި ބެހޭ ގޮތުން ބޭރު ދުނިޔޭގައި ދޮގު ވާހަކަތަކެއް ރައީސް ނަޝީދު ފަތުރުއްވަވަމުން ގެންދަވާތީ ކަމަށެވެ.
ރައީސް މައުމޫނު މިގޮތަށް ވިދާޅޚުވެފައިވާ އިރު، މަޝްވަރާތައް ކުރިއަށް ގެންދިއުމަށް އެމްޑީޕީން މައުމޫނާ މެދު ކޮށްފައިވާ ތުހުމަތުތައް އަނބުރާ ގެންދިއުމަށް ތައްޔާރަށް އޮތް ކަމަށް އެޕާޓީންވަނީ ބުނެފައެވެ.