ކަރަންޓު ކެނޑުމުގެ މައްސަލަ ހައްލުވެފައިވާ ކަމަށް ބުނިތާ މާގިނަ ދުވަސްތަކެއް ނުވެ އަނެއްކާވެސް މާލޭގެ ބޮޑު ބަޔަކުން މިރޭ ކަރަންޓު ކެނޑިއްޖެ އެވެ.
އެގޮތުން މިރޭ ކަރަންޓު ކެނޑުނު ސަރަހައްދުތަކުގެ ތެރޭގައި ހެންވޭރާއި، މާފަންނާއި މައްޗަންގޯޅީގެ އިތުރުން އެހެނިހެން ސަރަހައްދުތައް ވެސް ހިމެނެ އެވެ. 8:15 ހާއިރު ކަރަންޓު ކަނޑައިގެން ދިޔައިރު ކަރަންޓު އަލުން ލިބިފައިވަނީ 30 ވަރަކަށް މިނެޓު ފަހުންނެވެ.
ސްޓެލްކޯ އިސް އޮފިޝަލަކު މިރޭ ވިދާޅުވީ ކަރަންޓް ކެނޑުނީ އަލަށް ބެހެއްޓި އަށް މެގަވޮޓްގެ ދެ ޖަނަރޭޓަރުގެ ތެރެއިން ރިލައިބިލިޓީ ޓެސްޓަށް ހިންގާފައި ހުރި ޖަނަރޭޓަރަށް ދިމާވި ކުއްލި މައްސަލަ އަކާއި ގުޅިގެން ކަމަށެވެ.
"އަލަށް ބޭނުން ކުރަންފެށި ދެ ޖަނަރޭޓަރުގެ ތެރެއިން އެއް ޖަނަރޭޓަރަށް މިރޭ ދިމާވި ކުއްލި މައްސަލައަކާ ގުޅިގެން ކަރަންޓް ދިޔައީ، އަޅުގަނޑުމެންގެ އިންޖިނިއަރުން ގެންދަނީ އެ މައްސަލަ ދިމާވީ ކީއްވެގެންތޯ ބަލަމުން." ސްޓެލްކޯގެ އޮފިޝަލް ވިދާޅުވި އެވެ.