ދ.ހުޅުދެލީގައި ފެނަކައިން ކަރަންޓު ދޭން ބޭނުން ކުރާ ޖަނަރޭޓަރުތަކުގައި މައްސަލަ ޖެހި ކަރަންޓު ކެނޑޭތާ މަހަކަށްވުރެ ގިނަ ދުވަސްވެފައިވާ ކަމަށާއި މިރޭ ވެސް ރަށުގެ ބޮޑު ބައެއް އޮތީ ކަނު އަނދިރީގައި ކަމަށް ހުޅުދެލީ ކައުންސިލުން ބުނެފިއެވެ.
ހުޅުދެލީ ކައުންސިލުގެ ރައީސް އިސްމާއީލު ނިޒާމު ވިދާޅުވީ އެރަށަށް ކަރަންޓު ދޭން ބޭނުން ކުރާ އިންޖީނުތަކުގައި މައްސަލަ ޖެހޭތާ ތިން މަހަށް ވުރެ ގިނަ ދުވަސްވެފައިވާ ކަމަށެވެ.
"ޖަނަރޭޓަރުތައް މައްސަލަ ޖެހި ކަރަންޓު ކޮންމެ ދުވަހަކު ވެސް ކެނޑޭތާ މަހަކަށްވުރެ ގިނަ ދުވަސްވީ. މިހާރު 10 ދުވަސްވަނީ ކަރަންޓު ބޭނުން ނުކުރެވޭ ވަރަށް ކެނޑޭތާ. މިރޭ ރަށުގެ ބޮޑު ބަޔަކުން ވަނީ ކަރަންޓު ގޮސްފައި،" ނިޒާމު ވިދާޅުވިއެވެ.
ނިޒާމް ވިދާޅުވީ އެރަށަށް ކަރަންޓު ދިނުމަށް ތިން ޖަނަރޭޓަރު ބޭނުން ކުރަމުން ދަނިކޮށް އޭގެތެރެއިން އެއް ޖަނަރޭޓަރު ބޭނުން ނުކުރެވޭތާ ދުވަސްތަކެއް ވެފައިވާ ކަމަށެވެ. އަދި ފަހުން ހުރި ދެ ޖަނަރޭތަރުގެ ތެރެއިން އެއް ޖަނަރޭތަރު ހަލާކުވެ މިހާރު ހުރި ޖަނަރޭޓަރުން ރަށަށް ބޭނުންވާ ވަރަށް ކަރަންޓު ނުއުފެއްދޭ ކަމަށެވެ.
އާބާދީގައި 900 އަށް ވުރެ ގިނަ މީހުން އުޅެ ހުޅުދެއްޔަށް ކަރަންޓުގެ ހިދުމަތް ދެނީ ފެނަކަ ކޯޕަރޭޝަނުންނެވެ. ފެނަކައިގެ ބަހެއް އަދިވަނީ ލިބޭ ގޮތް ނުވެފައެވެ.
ނިޒާމު ވިދާޅުވީ ވޭތުވެ ދިޔަ މަހެއްހާ ދުވަހު ރަށުން ކަރަންޓު ކެނޑެމުން ދިއުމާއި ގުޅިގެން އިލްކްޓްރޯނިކް ބައެއް ސާމާނު ހަލާކުވެ ބޮޑެތި ގެއްލުންތަކާއި ރައްޔިތުން ކުރިމަތިލާން ޖެހިފައިވާ ކަމަށެވެ.