ކުދީނާ ގޯޅީގައި ހުންނަ ފުޑް ބިސްޓްރޯގެ ދުންހޮޅިން ޒިކުރާ މިސްކިތުގެ އެތެރެއަށް ދުމާއި ވަސް އަންނާތީ، އެކަން ރަނގަޅު ކުރަންދެން އެ ކެފޭ ބަންދުކޮށްފި އެވެ.
ވީ ކިހިނެއް؟ - މާލޭ ސިޓީ ކައުންސިލުން ފުޑް ބިސްޓްރޯ ބަންދުކުރީ މިއަދު ހުކުރު ނަމާދަށްފަހު އެވެ.
ތަފްސީލު - ސިޓީ ކައުންސިލުން ބުނީ ފުޑް ބިސްޓްރޯގެ ދުންހޮޅި ރަނގަޅުކުރަން ކައުންސިލްގެ ކޮމިއުނިޓީ އެންގޭޖްމަންޓް ޔުނިޓުން ތަކުރާރުކޮށް ނަސޭހަތްތެރިވި ނަމަވެސް އެ މައްސަލަ ހައްލުކޮށްފައިނުވާ ކަމަށެވެ.
މިއަދު ފުޑް ބިސްޓްރޯ ބަންދުކުރީ ހުކުރު ނަމާދު ގަޑީގައި އެތަނުން ކައްކާ އެއްޗެހީގެ މިރުސް ވަހާ ހުރެ ޒިކުރާ މިސްކިތުގައި ނަމާދަށް ތިބި މީހުން ކޮށިއަރާވަރުން ނަމާދަށް ތިބެން އުނދަގޫ ވާތީ ހުށަހެޅި ޝަކުވާއަކާ ގުޅިގެންނެވެ.
"ކޮމިއުނިޓީ އެންގޭޖްމަންޓް ޔުނިޓުގެ މުވައްޒަފުން މިތަނަށް ވަނުމުން، މިތަނުގައި ކައްކަން ތިބި ބިދޭސީންނާއި ހިދުމަތް ހޯދަން އައިސް ތިބި ބިދޭސީންގެ ތެރެއިން ގިނަ ބަޔަކު ވަނީ ދުވެ ފިލާފައި،" ސިޓީ ކައުންސިލުން ބުނެފައިވެ އެވެ.
އެ ކެފޭ ބަންދުކުރީ ދުންހޮޅީގެ މައްސަލަ ހައްލު ކުރަންދެން، ވަގުތީ ގޮތުންނެވެ.