ރާއްޖޭގެ ކުރީގެ ރައީސް އަދި ޕީޕީއެމްގެ ވަގުތީ ރައީސް އަލްއުސްތާޒް މައުމޫން އަބްދުލް ގައްޔޫމް އިލެކްޝަންސް ކޮމިޝަނުގެ އިތުބާރު ގެއްލޭ ފަދަ ގޮތަކަށް ވާހަކަފުޅު ދައްކަވާފައި ވާތީ އެކަން ސީރިއަސްކޮށް ބައްލަވާނެ ކަމަށް އެ ކޮމިޝަނުގެ ރައީސް ފުއާދު ތައުފީގު މިއަދު ވިދާޅުވެއްޖެ އެވެ.
އޭނާ ވިދާޅުވީ އިންތިހާބުތަކުގެ ނަތީޖާ މިހާރު ނުކުންނަކީ ރައްޔިތުން ވޯޓު ލާ ގޮތަށް ނޫން ކަމަށް ޕީޕީއެމުން މިދިޔަ ބުރާސްފަތި ދުވަހުގެ ރޭ ބޭއްވި ޖަލްސާއެއްގައި މައުމޫން ވިދާޅުވުމުން އެ ކޮމިޝަނުން ކަންބޮޑުވެ، ހައިރާންވާ ކަމަށެވެ.
ދެ ފުށް ފެންނަ ގޮތަށް، ތެދުވެރިކަމާއި އަމާނާތްތެރިކަމާ އެކު އިންތިހާބުތައް ކުރިއަށް ގެންދަނިކޮށް އެ ކޮމިޝަނުގެ އިތުބާރު ގެއްލޭ ގޮތަށް މައުމޫން ވާހަކަފުޅު ދެއްކެވުމަކީ ސީރިއަސް މައްސަލައެއް ކަމަށް ވެސް ފުއާދު ވިދާޅުވި އެވެ.
"އެއީ ކޮން ކަމަކާ ބެހޭ ގޮތުން، ކޮން ފަހަރެއްގައި، ކިހިނެތް ދިމާވި ކަމެއްތޯ ބެލުމަށް ސިޓީ ފޮނުވައިގެން ސާފުކުރުމަށް އަޅުގަނޑުމެން ވިސްނާފައި އޮތީ. ރައީސް މައުމޫން [ޖަލްސާގައި] ވިދާޅުވި ވާހަކަފުޅުގެ ތަފްސީލް އަންގަވައިދެއްވުމަށް އަޅުގަނޑުމެން އެދޭނަން،" އޭނާ ވިދާޅުވި އެވެ.
ޕީޕީއެމަށް މަޖިލިހުން ޖާގަ ހޯއްދަވައިދެއްވުމުގެ ގޮތުން އެ ޕާޓީގެ ނައިބު ރައީސް އަދި ރައްޔިތުންގެ މަޖިލީހުގެ ފޮނަދޫ ދާއިރާގެ މެމްބަރު އަބްދުއްރަހީމް އަބްދުﷲ އިސްތިއުފާ ދެއްވާ އަދި އަލުން އިންތިޚާބުގައި ވާދަކުރެއްވުމާ ގުޅޭ ގޮތުން ވާހަކަފުޅު ދައްކަވަމުން މައުމޫން ވިދާޅުވީ ޕީޕީއެމް އިން އަބްދުއްރަހީމް ނުކުންނަވައިފި ނަމަ ބޮޑު އަޣުލަބިއްޔަތަކުން ޕީޕީއެމް އަށް ގޮނޑި ކާމިޔާބުވާނެ ކަމަށެވެ. ނަމަވެސް މިހާރު ރާއްޖޭގައި ކަންތައް ހުރި ގޮތުން "އިންތިހާބުގެ ނަތީޖާ ނުކުންނާނީ ވޯޓު ދޭ ގޮތަކަށް ނޫން" ކަމަށް އެމަނިކުފާނު ވިދާޅުވި އެވެ.
ފުއާދު ވިދާޅުވި ގޮތުގައި އެ ކޮމިޝަނާ ގުޅޭ ގޮތުން މައުމޫން ދެއްކެވި ވާހަކަފުޅުތައް ސާފުކުރުމަށް ސުވާލުކުރަން ޖެހޭ ހުރިހާ ފަރާތްތަކާ ސުވާލުކުރުމަށް ފަހު ގާނޫނީ ގޮތުން އަޅަން ޖެހޭ ފިޔަވަޅުތައް ވެސް އަޅުއްވާނެ އެވެ. އެކަން ސާފުކުރުމަށް ވޯޓުލީ މީހުން ވޯޓުލީ ގޮތާ ހިލާފަށް ނަތީޖާ ނެރެވިފައި ވަނީ ކޮން އިންތިހާބެއްގައިތޯ އަދި އެއީ ކޮން ދާއިރާތަކެއްގައި ކަން ވެސް ބައްލަވާނެ ކަމަށް އޭނާ ވިދާޅުވި އެވެ.
ފުއާދު ވިދާޅުވީ އިންތިހާބުތަކާ ގުޅޭ ގޮތުން އެއްވެސް ބަޔަކަށް ތުހުމަތެއް ނުކުރެވޭވަރަށް އެ ކޮމިޝަނުގެ މަސައްކަތްތައް އިންތިޒާމްކޮށްގެން ކުރިއަށް ގެންދާއިރު ރައީސް މައުމޫން އެ ކޮމިޝަނުގެ އިތުބާރާ މެދު ސުވާލު އުފެއްދެވުމުން ރައްޔިތުން ވެސް ކަންބޮޑުވާނެ ކަމަށެވެ.
"އަޅުގަނޑުމެން ހައިރާންވެ ކަންބޮޑުވާން ޖެހުނު ވާހަކަފުޅަކަށް އެ ވާހަކަ ފުޅުވީ. އާދައިގެ މީހަކު އެކަހަލަ އެއްޗެއް ބުންޏަސް ހައިރާނެއް ނުވާނެ. އެކި މީހުން އެކި ކަންތައް ނަގާނީ އެކި ގޮތަށް. އެހެން ނަމަވެސް 30 އަހަރު ވެރިކަން ކުރެއްވި އަދި ކުރިން ޑީއާރްޕީގެ ޒައީމްކަން ވެސް ކުރައްވައި އަދި މިހާރު ވެސް ތިން ވަނަ އަށް އެންމެ ބޮޑު ޕާޓީގެ ރައީސް ކަމަށް ހުންނެވި ބޭފުޅެއް ކަމަށް ވާތީ އަޅުގަނޑު ދެކޭ ގޮތުގައި އެފަދަ ވާހަކަފުޅެއް ދައްކަވަން ޖެހޭނީ ވަރަށް ޒިންމާދާރުކަމާ އެކުގައި،" ފުއާދު ވިދާޅުވި އެވެ.