ރާއްޖެއަށް ކުރިމަތިވެފައިވާ މަސްތުވާތަކެތީގެ މައްސަލަ ކޮންޓްރޯލް ނުކުރެވިއްޖެނަމަ މަރުގެ މައްސަލަތައް ދާނީ އިތުރުވަމުން ކަމަށް ކުރީގެ ހޯމް މިނިސްޓަރު އުމަރު ނަސީރު ވިދާޅުވެއްޖެއެވެ. އަނިޔާވެރިކޮށް ދަނގެތީގެ ވިޔަފާރިވެރިއަކު މަރާލި މައްސަލައާ ގުޅޭގޮތުން "ސަން"އާ ވާހަކަ ދައްކަވަމުން އުމަރު ވިދާޅުވީ ކޮންމެ މަރެއްގެ ފަހަތުގައި ވެސް އޮތް ހަގީގީ މައްސަލައަކީ މަސްތުވާތަކެތީގެ މައްސަލަ ކަމަށެވެ. "ރާއްޖޭގައި މި ހިނގައިދިޔަ ކޮންމެ މަރެއްގެ ފަހަތުގައި ވެސް އަސްލު އޮތީ މަސްތުވާތަކެތި. އެއީ މަސްތުވެގެން ނުކުމެ މީހަކު މަރާލަނީ ނުވަތަ މަސްތުވާތަކެތި ހޯދުމަށް ޓަކައި ނުވަތަ އެކަމުގެ ތެރޭގައި. އެއީ ދަނގެތީގެ މައްސަލަ ވިޔަސް، މި ފަހުން ކުޑަކުއްޖަކު މަރާލި މައްސަލައަށް ބެލިޔަސް،" އުމަރު ވިދާޅުވިއެވެ. އޭނާ ވިދާޅުވީ މަސްތުވާތަކެތީގެ މައްސަލަ ހައްލު ކުރެވޭނެ ސިޔާސަތެއް އަދި އެއްވެސް ސަރުކާރަކުން ތަންފީޒު ކޮށްފައި ނުވާ ކަމަށެވެ. މީގެ އިތުރުން މީހުން މަރާ މީހުންނަށް ހަރުކަށި އަދަބު ދިނުމަށް ސިޔާސީ ފަރާތްތަކުން ގޮވާލަމުންދާތީ، އުމަރު ވަނީ އެ ފަރާތްތަކަށް ފާޑުވިދާޅުވެފައެވެ. އުމަރު ވިދާޅުވީ ސިޔާސީ ފަރާތްތަކުން ހަރުކަށި ކަމަށް އެ ބުނާ އަދަބަކީ ޖަލަށް ލުން ކަމަށެވެ. "ރާއްޖޭގައި ޖަލަށް ލާނެ ޖަލަށް ލެވޭ މީހުން. އެކަމަކު އެއްވެސް ބަދަލެއް ނާދޭ. ސިޔާސީ މީހުން ހަރުކަށި އަދަބޭ އެ ކިޔަނީ، ވަގުތީ ގޮތުން އެކަން ބޮލުން ނައްޓާލަން ވެގެން. މިހާ ހިސާބަށް ރާއްޖޭގެ އެއްވެސް ސަރުކާރަކަށް ނެތް ގިސާސް ހިފިފައެއް. އިސްލާމްދީނުގައި ވެސް އޮންނަނީ މީހުން މަރާ މީހުންނަށް ގިޞާސް ހިފަން،" އުމަރު ވިދާޅުވިއެވެ. "ހަމަ ގައިމުވެސް ގިޞާސް ހިފުމެއް ނޫން، ތިޔަ ސިޔާސީ މީހުން އެ ބުނާ ހަރުކަށި އަދަބަކީ. އެއީ މައްސަލަ ހިނދެންދެން ބޭނުން ކުރާ ބަހެއް، ހަރުކަށި އަދަބަކީ،" އޭނާ ވިދާޅުވީ މަސްތުވާތަކެތީގެ ވިޔަފާރިކުރާ މީހުންނަށް ވެސް ދޭންވީ އިސްލާމީ ޝަރީއަތުގައިވާ އަދަބު ކަމަށެވެ. އެހެންނޫންނަމަ ދުވަހަކުވެސް ރާއްޖެއިން އެ މައްސަލަ ހައްލުނުވާނެ ކަމަށް އުމަރު ވިދާޅުވިއެވެ. އުމަރަކީ ގިސާސް ހިފުމަށް މީގެ ކުރިން ވެސް އެތައް ފަހަރެއްގެ މަތިން ގޮވާލެއްވި ބޭފުޅެކެވެ. އަދި ހޯމް މިނިސްޓަރުކަމުގައި ހުންނެވިއިރު މަރުގެ ހުކުމް ތަންފީޒު ކުރުމަށް ޓަކައި ވެސް އޭނާ ވަނީ މަސައްކަތަކެއް ކުރައްވާފައެވެ.