މިއަދު ފާހަގަ ކުރަމުންދާ ބައިނަލްއަޤުވާމީ އޯޓިޒަމް ދުވަހާއި ގުޅިގެން އޯޓިޒަމަށް ރައްޔިތުން ހޭލުންތެރިކުރުމަށްޓަކައި " އޯޓިޒަމް ސުކޫލް ކުދިންނަށްޓަކައި 1 ރުފިޔާ " ގެ ނަމުގައި ހާއްސަ ކެމްޕެއިނެއް އޯޓިޒަމް އެސޯސިއޭޝަނުން އިފްތިތާހުކޮށްފިއެވެ.
" އޯޓިޒަމް އެވެއަރނެސް ޑޭ " ގެ ރަސްމިއްޔާތު ފެށުމުގެ ގޮތުން މިރަސްމިއްޔާތު ޝަރަފްވެރިކޮށްދެއްވާ 1ރ ކެމްޕޭން ލޯންޗްކޮށްދެއްވާފައި ވަނީ އެފްއޭއެމް ގެ ޖެނެރަލް ސެކްރެޓަރީ ބަސާމް އަދީލް ޖަލީލާއި ޑިސްއެބިލިޓީ އެމްބެސެޑަރު، އަދި ޖުމްހޫރީޕާޓީގެ ކާށިދޫ ދާއިރާގެ މަޖިލިސް މެންބަރު ފައިސަލް ނަސީމްއެވެ.
އޯޓިޒަމް އާއި ބެހޭ ގޮތުން މީހުން ހޭލުންތެރިކުރުވުމުގެ ގޮތުން ބާއްވާ މި ހަރަކާތުގެ މައިގަނޑު މަގުސަދަކީ އޯޓިޒަމް އާއި ބެހޭ އެކި މައުލޫމާތު ރާއްޖޭގެ އެކި ކަންކޮޅުތަކުގައި ތިބި މީހުންނަށް މި ހަރަކާތުގެ ޒަރީއާއިން ފޯރުކޮށްދިނުން ކަމަށް އޯޓިޒަމް އެސޯސިއޭޝަނުން ބުނެއެވެ.
އޯޓިޒަމް އެސޯސިއޭޝަނުން އިސްނަގައިގެން މިއަދު ކުރިއަށް ގެންދިޔުމަށް ނިންމާފައިވާ ހަރަކާތާއި ބެހޭގޮތުން ފައިސަލް ވިދާޅުވީ، އަމާން މުޖުތަމައަކަށް ވާސިލުވުމަށް ނުކުޅެދުންތެރިކަން ހުންނަމީހުންނަ މީހުންނާއި ހާއްސަ އެހީއަށް ބޭނުންވާ މީހުންގެ ހައްގުތަކަށް ވަކާލާތުކުރުމަށް ގިނަ ބަޔަކު މަސައްކަތުގައި އިސް ނަގައިގެން ނިކުންނަން ޖެހިފައިވާ ކަމަށެވެ.
އަދި މިފަދަ ކަންކަމަކީ މުޖުތަމައުގެ ހުރިހާ ފަންތިއެއްގައި ހިމެނޭ މީހުންގެ އެހީތެރިކަމާއި އެއްބާރުލުމާއި އެކު ކުރެވޭނެ ކަންކަމަށް ވުމުން އުފެދުމުގައި ހުންނަ މިފަދަ ތަފާތުތަކާއި މެދު މުޖުތަމައުގެ ހޭލުންތެރިކަން އިތުރުކުރުމަކީ ވަރަށް ބޭނުންތެރިކަމެއް ކަމަށް ފައިސަލް ވިދާޅުވި އެވެ.
މީގެ އިތުރުން ރާއްޖޭގައި ނުކުޅެދުންތެރިކަން ހުންނަ ކުދިން ތިބި ނިސްބަތަށް ބަލައި އެކުދިންނަށް ދޭންޖެހޭ އަޅައިލުމާއި ތައުލީމު ދިނުމަށް މަސައްކަތްކުރާ މީހުން މަދުކަން ފާހަގަކުރައްވަމުން ފައިސަލް ވިދާޅުވީ، ނުކުޅެދުންތެރިކަމެއް ހުއްޓަސް އެފަދަކުދިންނަކީ މުޖުތަމައު ބަލައިގަނެވޭ ފަދަ ކުދިން ތަކަކަށް ހެދިދާނެ ކަމަށާއި އެހެންކަމުން މިކަމަށް ހުރިހާ މީހުންވެސް ސަމާލުކަން ދިނުމަކީ މުހިއްމު ކަމެއް ކަމަށެވެ.
"ބަދަލަކަށް އުންމީދު ކުރާއިރު، އަމިއްލަޔަށް ލިބިފައިވާ ރީތި އެއްޗިއްސާއި ތަކެތީގެ އުފަލުގައި ދުވަސްތައް ނަގާާލުމުގެ ބަދަލުގައި އެ ނިއުމަތްތަކުގެ ބޭނުން ހެޔޮގޮތުގައި ހިފައި، އެހެންމީހުންނަށް ދިމާވާ ދަތި ކަންތައްތައް ހައްލުކޮށްދިނުމަކީ އުފަލެއް ކަމުގައި އަޅުގަނޑުމެން ދެކެން ޖެހޭ" ފައިސަލް ވިދާޅުވިއެވެ.
މިއަދުގެ ރަސްމިއްޔާތުގައި ވާހަކަފުޅު ދައްކަވަމުން ބައްސާމް ވިދާޅުވީ، އޯޓިސްޓިކް ކުދިންނަކީވެސް އެހެންކުދިންނެކޭ އެއްފަދައިން ތައުލީމުގެ ފުރުސަތުތަކާއި، ވަޒީފާގެ ފުރުސަތުތަކާއި ތަފާތު އެކި ދާއިރާތަކުގައި ހަމަހަމަ ފުރުސަތުތަކެއް ލިބެންޖެހޭ ކުދިންނަށް ހަދަން އެބަ ޖެހޭ ކަމަށެވެ. އަދި އެކަން ކުރެވެން އޮތީ އޯޓިޒަމްއާއި ބެހޭގޮތުން އާންމު ފަރާތްތަކުގެ އިތުރުން އާންމު ފަރާތްތަކުގެ ހޭލުންތެރިކަންވެސް އިތުރު ކުރެވިގެން ކަމަށް ބައްސާމް ވިދާޅުވިއެވެ.
ދުނިޔޭގެ އޯޓިޒަމް ދުވަސް ފާހަގަކުރުމުގެ ގޮތުން އޯޓިޒަމް އެސޯސިއޭޝަނުގެ ފަރާތުން ގިނަ ހަރަކާތްތަކެއް ބޭއްވުމަށް ވަނީ ހަމަޖެހިފައެވެ. ދުނިޔޭގެ އޯޓިޒަމް ދުވަހަކީ ކޮންމެ އަހަރެއްގެވެސް އޭޕްރީލް މަހުގެ 2 ވަނަ ދުވަހަ އެވެ.
އެގޮތުން އޯޓިޒަމް އަށް މީހުން ހޭލުންތެރިކުރުވުމުގެ ގޮތުން ބާއްވާ ވޯލްކް ރަން ޓެލެތޯން އެއް މިއަދު ހަވީރު ހަތަރެއް ހަޖާއިރު ޔޫތު ސެންޓަރު ކައިރިން ފެށުމަށް ވަނީ ހަމަޖެހިފައެވެ.
މި ހަރަކާތުގައި ވީހާވެސް ގިނަ ބަޔަކު ބައިވެރިވުމަށް އެދި އޯޓިޒަމް އެސޯސިއޭޝަނުން ވަނީ އިލްތިމާސްކޮށްފައެވެ.