ރައްޔިތުންގެ މަޖިލީހުގެ އަޣުލަބިއްޔަތު ސަރުކާރަށް ލިބިއްޖެނަމަ ތަރައްގީގެ އާ އުސްމިންތަކަކަށް ގެންގޮސްދޭނެ ކަމަށް ހޯމް މިނިސްޓަރު އުމަރު ނަސީރު ވިދާޅުވެއްޖެއެވެ.
އައްޑޫ ސިޓީގެ ހިތަދޫ އުތުރު ދާއިރާއަށް ޕީޕީއެމްގެ ޓިކެޓްގައި ވާދަކުރައްވާ އަލީ އިބްރާހިމްގެ ކެމްޕެއިން ޖަގަހަ ހުޅުވުމަށް މާލޭގައި ބޭއްވި ޖަލްސާގައި ވާހަކަދައްކަވަމުން މިނިސްޓަރު ވިދާޅުވި ގޮތުގައި ރައްޔިތުންގެ މަޖިލީހުގެ އިންތިހާބުގައި އިގްތިސާދީ ކެކުޅުންތަކާއި ނާމާންކަމާއި ހަރުމުދާތައް ވިއްކުމާއި ދެކޮޅަށް ވާދަކުރަނީ ތިރީސް އަހަަރުގެ ރަންޒަމާނަކާއި ވޭތުވެދިޔަ 100 ދުވަސްތެރޭގައި ގެނެސްދީފައި އޮތް އުފާވެރިކަމާއި އެވެ.
"މިއީ ވަރަށް ސާފު ވާދަވެރިކަމެއް، މިއީ ދޮން އަނބަކާއި ދޮން ދުނބުރިއަކާއި ދޭތެރޭގައި އަޅުގަނޑުމެންނަށް ފެންނަ ވާދަވެރިކަމެއް، ދޮން ދުނބުރިއަށް ވެސް ބަލާލީމަ ހީވާނީ ދޮން އަނބެއްހެން، އެކަމަކު ދަންނަ މީހާއަށް އެނގޭނެ ދޮން ދުނބުރިއަކާއި ދޮން އަނބަކާއި ދޭތެރޭގައި ހުރި ތަފާތު،" މިނިސްްޓަރު އުމަރު ވިދާޅުވި އެވެ.
އެމްޑީޕީގެ ވެރިކަމުގައި ރައްޔިތުންގެ މަޖިލީސް ބޭނުންކުރީ މެންބަރުން ގަނެވިއްކާ ތަނެއްގެ ގޮތުގައި ކަމަށާއި މެންބަރުން ގަންނަމުން ގަންނަމުން ގޮސް އެމްޑީޕީން އެކަން ނިންމީ މަޖިލީސްގެ ރައީސް އަބްދުﷲ ޝާހިދުގެ ގޮނޑި ވެސް ގަނެފައި ކަމަށެވެ.
މީގެއިތުރުން މަޖިލީހުގައި ވެސް އެމްޑީޕީ މެންބަރުން ނުބައި އަހުލާގެއް ދައްކާފައިވާ ކަމަށާއި އެގޮތުން މަޖިލީހުގައި އެ ޕާޓީ އަށް ނިސްބަތްވާ މީހުން ކުނިވަށިގަނޑު ބޮލުގައި އަޅައިގެން ރައްޔިތުން މަޖިލިސް ތެރޭގައި ހިނގާ، ޓައީން ނަގޫ ހަދައިގެން މަޖިލިސް ތެރޭގައި ދުވެ ހަދާފައިވާ ކަމަށް ވެސް އުމަރު ވިދާޅުވި އެވެ.
"މިކަހަލަ ކޮށްފަނުކުރާނެ އެއްވެސް ކަމެއް ނެތް، އަޅުގަނޑުމެން ދުށީމު، މިފަހަރު ރައްޔިތުންގެ މަޖިލީހުގެ މެންބަރުން ހޮވާއިރު އަޅުގަނޑުމެން ބަލަންވީ، އަޅުގަނޑުމެން ރައްޔިތުންގެ މަޖިލީހަށް ހޮވަންވީ ކުނި ވަށިގަނޑު ބޮލުގައި އަޅާ މެންބަރުންތޯ ނޫނީއްޔާ އަހުލާގާއި ސުލޫކުގެ ތެރޭގައި ތިބެެގެން، ގައުމަށް ވަކާލާތުކޮށްދޭ މެންބަރުންތޯ، މިއީ މިދަންނަވާ ދޮން އަނބާއި ދޮން ދުނބުރި އާއި ހުރި ތަފާތަކީ." މިނިސްޓަރު ވިދާޅުވި އެވެ.
އެމްޑީޕީ އަށް ގާނޫނީ އެއްވެސް ބާރެއް ލިބިއްޖެ ނަމަ ރާއްޖޭގައި އަނެއްކާ ވެސް ހަމަނުޖެހުން އިތުރުވެ އިގްތިސާދީ ވަޅުގަނޑަކަށް ވެއްޓޭނެ ކަމަށް ވެސް އުމަރު ވިދާޅުވި އެވެ.
އަދި 2004 ވަނަ އަހަރުން ފެށިގެން މިދިޔަ އަހަރުގެ ރިޔާސީ އިންތިހާބާ ހަމައަށް ރާއްޖޭ އޮތީ ވަރަށް ހަލަބޮލި ކަމެއްގެ ތެރޭގައި ވަރަށް ބޮޑަށް ބައިބައިވެފައިވާ ކަމަށާއި އެ ވާދަވެރިކަން ދޫކޮށް އިގްތިސާދީ އަޑިގަނޑުން އަރައިގަންނަންޖެހިފައިވާ ކަމަށާއި ގައުމައިގެން އެންމެން ދަތުރުކުރަންޖެހިފައިވާ ކަމަށް ވެސް އޭނާ ވިދާޅުވި އެވެ.
އުމަރު ވިދާޅުވީ ރައްޔިތުންގެ މަޖިލީހުގެ އަޣުލަބިއްޔަތު އިދިކޮޅު އެމްޑީޕީއަށް ލިބުމުގެ ފުރުސަތު އެބައޮތްކަމަށާއި އެއީ މި ފަހަރުގެ މަޖިލީހުގައި ޕީޕީއެމް ކޯލިޝަނަށް ލިބޭ ވޯޓު ބައިބައިވާ ގޮތަށް ބައެއް ކަންކަން ހިނގަމުންދާތީ ކަމަށެވެ.
އެގޮތުން 66 ދާއިރާއެއްގައި ވޯޓު ބައިބައިވާ ގޮތަށް ކަން ހިނގާ ކަމަށާއި ކޯލިޝަންގެ މެންބަރުން ވާދަކުރާ ދާއިރާތަކަށް ކޯލިޝަންގެ ޕާޓީތަކުން ކަމަށް ބުނެ އަމިއްލަ ގޮތުން ބައެއް ކެންޑިޑޭޓުން އެބަ ވާދަކުރާ ކަމަށް އުމަރު ވިދާޅުވި އެވެ. އެހެންކަމުން އެމްޑީޕީއަށް ފައިދާ ލިބޭ ކަންކަން ނުކުރުމަށް އުމަރު ގޮވާލެއްވި އެވެ.