ނިލަންދޫ ކައުންސިލުން މައުލޫމާތު ދޭ ގޮތުގައި، ކާރުޚާނާ އެޅުމަށް ބޭނުންވާ ބިން ހިއްކުމުގެ 80 އިންސައްތަ މަސައްކަތް މިހާރު ވަނީ ނިމިފައެވެ.
މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) އާ ހަވާލުކޮށްގެން ކުރިއަށްގެންދާ މި މަޝްރޫއުގެ އަމަލީ މަސައްކަތް ފަށާފައިވަނީ މިއަހަރުގެ މާރިޗު މަހުގެ ތެރޭގައެވެ. މި މަޝްރޫއުގެ ދަށުން ބިން ހިއްކުމުގެ އިތުރުން ކާރުޚާނާއަށް ބޭނުންވާ ބަނދަރު ތަރައްގީކުރުމުގެ މަސައްކަތް ވެސް ކުރިއަށްދާނެއެވެ.
ނިލަންދޫ ކައުންސިލްގެ ރައީސް އަލީ އަހުމަދު ވިދާޅުވީ، ބިން ހިއްކުމުގެ މަސައްކަތް ބާރު ސްޕީޑުގައި ކުރިއަށްދާއިރު، ހިއްކާ ސަރަހައްދު ހިމާޔަތްކުރުމަށް ޖަހާ ރިވެޓްމަންޓާއި ބަނދަރު ހެދުމުގެ މަސައްކަތް ވެސް މިހާރު ފަށާފައިވާ ކަމަށެވެ. އަދި މިއީ އެ ރަށުގެ އިގްތިސާދަށް އަންނާނެ ވަރަށް ބޮޑު ކުރިއެރުމެއްގެ ގޮތުގައި އޭނާ ފާހަގަކުރެއްވިއެވެ.
މި މަޝްރޫއުގެ ދަށުން މަސް ކާރުޚާނާ އެޅުމަށްޓަކައި ގާތްގަނޑަކަށް ހަތް ހެކްޓަރުގެ ބިން ހިއްކުމަށް ވަނީ ހަމަޖެހިފައެވެ. މިނިސްޓްރީ އޮފް ފިޝަރީޒް އެންޑް އޯޝަން ރިސޯސަސް އިން ހާމަކޮށްފައިވާ ގޮތުގައި، މި ކާރުޚާނާ ނިމުމުން ދުވާލަކު 50 ޓަނުގެ މަސް ބަންދުކުރުމުގެ ގާބިލުކަން ލިބިގެންދާނެއެވެ.
މަސް ބަންދުކުރާ ފެސިލިޓީގެ އިތުރުން، 1،500 މެޓްރިކް ޓަނުގެ މަސް ރައްކާކުރެވޭނެ ކޯލްޑް ސްޓޯރޭޖެއް ވެސް މި މަޝްރޫއުގެ ދަށުން ގާއިމުކުރެވޭނެއެވެ. މިއީ މަސްވެރިކަމުގެ ސިނާއަތް ފުޅާކޮށް، ރާއްޖޭގެ އިގްތިސާދުގައި އެ ސިނާއަތުގެ ދައުރު ބޮޑުކުރުމަށް ސަރުކާރުން ގެންގުޅޭ ސިޔާސަތުގެ ދަށުން ކުރިއަށްގެންދާ މުހިންމު މަޝްރޫއެކެވެ.