އެމެރިކާގެ ކުރީގެ ރައީސް ޖޭމްސް އަރލް ކާޓަރ ޖޫނިއަރ، އަވަހާރަވުމާ ގުޅިގެން އެމެރިކާގެ ރައީސް ހިޒް އެކްސެލެންސީ ޖޯސެފް އާރް ބައިޑަން ޖޫނިއަރއަށް ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު، ތަޢުޒިޔާގެ މެސެޖެއް ފޮނުއްވައިފިއެވެ.
ރައީސުލްޖުމްހޫރިއްޔާގެ މެސެޖުގައި، އެމެރިކާގެ ކުރީގެ ރައީސް ކާޓަރގެ ޙަޔާތްޕުޅު ޚާއްޞަކުރެއްވީ ރިޔާސީ ދައުރުގައިވެސް އަދި ރިޔާސީ ޙަޔާތްޕުޅަށް ފަހުގައިވެސް އިންސާނިއްޔަތަށް ޚިދުމަތް ކުރެއްވުމަށްކަން ފާހަގަކުރައްވާފައިވެއެވެ. ލީޑަރެއްގެ ގޮތުގައި އަދި އިންސާނީ އެހީތެރިއެއްގެ ގޮތުގައި ރައީސް ކާޓަރ ދެއްކެވި ނަމޫނާ، މުޅި ދުނިޔެއަށް މިސާލެއްގެ ގޮތުގައި ދެމިއޮންނާނެ ކަމަށް އުންމީދު ކުރައްވާކަމުގައިވެސް ރައީސުލްޖުމްހޫރިއްޔާގެ މެސެޖުގައި ވިދާޅުވެފައިވެއެވެ.
ރައީސުލްޖުމްހޫރިއްޔާގެ މެސެޖު ނިންމަވާލައްވާފައި ވަނީ، ރައީސް ކާޓަރގެ އާއިލާއާއި، އެމެރިކާގެ ސަރުކާރާއި، އެމެރިކާގެ ރައްޔިތުންނަށް އިޚްލާޞްތެރިކަމާއެކު ތަޢުޒިޔާ ވިދާޅުވަމުންނެވެ.