މަޤާމުން ސަސްޕެންޑް ކުރެވިފައިވާ ދެކުނު ކޮރެއާގެ ރައީސް ޔޫން ސުކް ޔެލް ހައްޔަރުކޮށްފިއެވެ.
ދެކުނު ކޮރެއާގެ މަތީ ފަންތީގެ އޮފިޝަލުންގެ ކޮރަޕްޝަން ތަޙުޤީޤު އޮފީސް (ސީ.އައި.އޯ) އިން ބުދަ ދުވަހު ވަނީ އެ ގައުމުގެ ރައީސް ޔޫން ސުކް ޔެލް ހައްޔަރުކޮށްފިކަން ކަށަވަރު ކޮށްދީފައެވެ. މިއީ ދެކުނު ކޮރެއާގެ ތާރީޚުގައި މަޤާމުގައި ހުރި ރައީސަކު ހައްޔަރުކުރި ފުރަތަމަ ފަހަރެވެ
މިއީ ރައީސް ޔޫން ހައްޔަރުކުރުމަށް ކުރެވުނު ދެވަނަ މަސައްކަތެވެ. ޖެނުއަރީ 3 ވަނަ ދުވަހު ކުރެވުނު ފުރަތަމަ މަސައްކަތް ނާކާމިޔާބުވީ ރައީސްގެ ސެކިއުރިޓީ ބާރުތަކުން ތަޙުޤީޤު އޮފިސަރުން ރައީސްގެ ގެއަށް ވަނުން ހުއްޓުވުމުންނެވެ. ޔޮންހަޕް ނިއުސް އެޖެންސީގެ ރިޕޯޓުގައި ބުނާ ގޮތުން މިފަހަރު ރައީސްގެ ގެއަށް ވަދެވޭތޯ މަސައްކަތްކުރުމުގައި 3،000 އަށްވުރެ ގިނަ ފުލުހުން ބައިވެރިވިއެވެ.
ދެކުނު ކޮރެއާގެ މީޑިއާތަކުން ރިޕޯޓުކުރާ ގޮތުގައި، ކުރިން ރެކޯޑުކޮށްފައިވާ ވީޑިއޯއެއްގައި ރައީސް ޔޫން ވަނީ "ގައުމުގެ ޤާނޫނު ވަނީ ފުނޑުފުނޑުވެފައި" ކަމަށް ބުނެ، ސީ.އައި.އޯގެ ތަޙުޤީޤަކީ "ޣައިރު ޤާނޫނީ" ތަޙުޤީޤެއް ކަމަށް ބުނެފައެވެ. "ނޭދެވޭ ލޭއޮހޮރުވުމެއް ހުއްޓުވުމަށްޓަކައި" ސީ.އައި.އޯ އަށް ޙާޟިރުވާނެ ކަމަށްވެސް އޭނާ ބުނެފައިވެއެވެ.
ރައީސް ޔޫން އާ ދެކޮޅަށް އުފުލިފައިވާ އެންމެ ބޮޑު ދައުވާއަކީ ޑިސެންބަރު 3 ވަނަ ދުވަހު އޭނާ މާޝަލް ލޯ (އަސްކަރީ ގާނޫނު) އިއުލާނުކުރަން މަސައްކަތްކުރި ކަމުގެ ދައުވާއެވެ. ރައީސްގެ އިމްތިޔާޒު ލިބިގެންނުވާ މި ކުށުގެ އެންމެ ބޮޑު އަދަބަކީ މަރުގެ އަދަބެވެ.
ޔޫން ވަނީ "އުތުރު ކޮރެއާގެ ކޮމިއުނިސްޓު ބާރުތަކާއި ދައުލަތާ ދެކޮޅު ބާރުތަކުން" ގައުމު ސަލާމަތްކުރުމަށް ކަމަށް ބުނެ ކުއްލި އަމުރެއް ނެރެ މާޝަލް ލޯ އިއުލާނުކުރި ކަމަށް ބުނެފައެވެ. މިއީ 40 އަހަރަށްވުރެ ގިނަ ދުވަހުގެ ތެރޭގައި ދެކުނު ކޮރެއާގައި މާޝަލް ލޯ އިއުލާނުކުރި ފުރަތަމަ ފަހަރެވެ.
ނަމަވެސް ޕާލިމަންޓް މެންބަރުން ވަނީ ފުލުހުންގެ ބެރިކޭޑްތައް ފަހަނައަޅައި ގޮސް، މާޝަލް ލޯ އިއުލާނުކުރި އިއުލާނު ބާތިލުކޮށް، އަދި ޔޫންގެ މައްޗަށް އިމްޕީޗްމަންޓް ހުށަހަޅައި ފާސްކޮށްފައެވެ. ޑިސެންބަރު 14 ވަނަ ދުވަހު އިމްޕީޗްކުރެވުނު ރައީސް ވަނީ ވަގުތީގޮތުން މަޤާމުން ވަކިކުރެވިފައެވެ.
ދެކުނު ކޮރެއާގެ ކޮންސްޓިޓިއުޝަނަލް ކޯޓުން ވަނީ ޖެނުއަރީ 14 ވަނަ ދުވަހު އިމްޕީޗްމަންޓް މައްސަލައިގެ ޝަރީއަތް ފަށައި، ޔޫން ޝަރީއަތަށް ހާޒިރުނުވުމާ ގުޅިގެން ޖެނުއަރީ 16 އަށް މައްސަލަ ފަސްކޮށްފައެވެ.