ކޮންމެ މީހަކަށްވެސް ﷲ ތަޢާލާ ވަނީ އިޚްތިޔާރުތަކެއް ދެއްވަވައިފައެވެ. ހަމައެއާއިއެކު އަހުރެމެން އުޅެންވީ ގޮތާއި ކުރަންވީ ކަންތައްތަކާއި ނުކުރަންވީ ކަންކަން ﷲ ތަޢާލާ ވަނީ ވަރަށް ސާފުކޮށް ބަޔާންކޮށް ދެއްވަވައިފައެވެ.  
ﷲ ތަޢާލާ ރުހިވޮޑިގަންނަވާނެ ޢަމަލުތަކާއި ލަޢުނަތް ލައްވަވާނެ ކަންކަން ވަނީ އަންގަވައި ދެއްވަވައިފައެވެ. އެމީހެއްގެ ދިރިއުޅުމުގައި ބަރަކާތް ލައްވަވާނެ ގޮތް (އެކަމަށް އެދިގެން ކުރަންވީ ކަންކަން) ވަނީ ބަޔާންކޮށް ދެއްވަވައިފައެވެ. ވީމާ އަހުރެމެންނަށް އޮތީ އެގޮތަށް ޢަމަލުތައް ބަހައްޓަން މަސައްކަތްކުރުމެވެ. ހަމައެގޮތަށް އެކަންކަން ކުރުމުން ﷲ ތަޢާލާގެ ކޯފާ ޙައްޤުވާނެ ކަންކަންވެސް ވަނީ ބަޔާންކޮށް ދެއްވަވައިފައެވެ.  
ނިކަން ވިސްނައިލަބަލާށެވެ! ކައިވެނިކޮށްގެން ދެމީހުން އުޅެން އޮތް މަގުވެސް ވަނީ ދައްކަވައި ދެއްވަވައިފައެވެ. އެމަގުން ޢަމަލުތައް ބެހެއްޓުމުން ނިޢުމަތްތައް އިތުރުކޮށް ދެއްވަވާނެކަންވެސް ވަނީ އަންގަވައި ދެއްވަވައިފައެވެ. އެމަގު އަމިއްލައަށް ދޫކޮށްލުމުން ދެރަގޮތް މެދުވެރިވެ ހިތާމަކުރަން ޖެހުމުން އެކަން އެއީ އިޜާދަކުރެއްވެވި ގޮތްކަމަށް ބުނެވޭނީ ކިހިނަކުން ހެއްޔެވެ؟  
އަދިވެސް ވިސްނައިލާށެވެ! ތިމާއަށް ރަނގަޅު ވަޒީފާއެއް ލިބުނީއެވެ. އިޚްލާޞްތެރިނުވެ، ކަންނެތްވެ މަކަރުހެދުމުން ވަޒީފާ ގެއްލިއްޖެ ނަމަ އެއީ އިރާދަކުރެއްވެވި ގޮތް ކަމަށް ބުނެވޭނެ ހެއްޔެވެ؟ ވަޒިފާގައި ތެދުވެރިވާން ﷲ ތަޢާލާ އަންގަވާފައި ނުވަނީ ހެއްޔެވެ؟  
އިތުރަށްވެސް ސުވާލުކޮށްލާނަމެވެ. ޒަވާޖީ ހަޔާތެއް ފެށުމަށްފަހު ތެދުވެރިނުވެވުމުންނާއި އަނިޔާވެރިވުމުންނާއި ފަރުވާކުޑަކުރުމުން ނުވަތަ އެނޫންވެސް ނުބައި ގޮތްގޮތަށް ޢަމަލުކުރެވުމުން ކައިވެނި ރޫޅި އެކަނިވެރިވީމާ އެއީ އިރާދަކުރެއްވެވި ގޮތް ކަމަށް ބުނެވޭނީ ކިހިނަކުން ހެއްޔެވެ؟  
ކޮންމެ ކަމެއްވެސް އިރާދަފުޅާއި އަޅުވަންވާނީ ތިމާ އިޚްލާޞްތެރިވުމަށްފަހުގައެވެ. ﷲ ތަޢަލާއަށް ކިޔަމަންތެރިވުމަށްފަހުގައެވެ. ނޫންނަމަ އެކުވެރިވެނީ އިތުރު ފާފައެކެވެ. އެންމެ ބޮޑެތި ފާފަތަކުގެ ތެރެއިން ފާފައެކެވެ. ވީމާ މިކަންކަމަށް ހޭލުންތެރިވުމަށް އިލްތިމާސްކުރަމެވެ.  
- އިސްލާމީ ތިލަފަތުގެ ދަރުސަކުން