ޖުޑީޝަލް ސަރވިސް ކޮމިޝަން (ޖޭއެސްސީ) ގެ މެންބަރުކަމަށް ސުޕްރީމް ކޯޓުގެ ފަނޑިޔާރު އަލްއުސްތާޛު ޙުސައިން ޝަހީދު އައްޔަންކުރުމަށް ނިންމާފައިވެއެވެ. މި އައްޔަންކުރުން ވަނީ ޖުޑީޝަލް ސަރވިސް ކޮމިޝަނުގެ ޤާނޫނުގެ 3 ވަނަ މާއްދާގެ 2 ވަނަ ނަންބަރުގައިވާ ގޮތުގެ މަތިން، ސުޕްރީމް ކޯޓުގެ ފަނޑިޔާރުންގެ ތެރެއިން، އުއްތަމަ ފަނޑިޔާރު ފިޔަވައި އެހެން ފަނޑިޔާރެއްގެ ހައިސިއްޔަތުން ކުރެވިފައެވެ.
އަލްއުސްތާޛު ޙުސައިން ޝަހީދު ސުޕްރީމް ކޯޓުގެ ފަނޑިޔާރުކަމުގެ މަޤާމަށް އައްޔަންކުރެވިފައިވަނީ ކޮރަޕްޝަންގެ މައްސަލަތަކެއް ޖޭއެސްސީން ބެލުމަށް ފެށުމާ ގުޅިގެން، ކުރީގެ ފަނޑިޔާރު ޙުސްނުއް ސުޢޫދު އެ މަޤާމުން އިސްތިއުފާ ދެއްވުމާ ގުޅިގެންނެވެ. ޝަހީދު ސުޕްރީމް ކޯޓުގެ ފަނޑިޔާރުކަމަށް އައްޔަންކުރެވިފައިވަނީ މި މަހުގެ 19 ވަނަ ދުވަހުއެވެ.
އަލްއުސްތާޛު ޙުސައިން ޝަހީދަކީ ޝަރުޢީ އަދި ޤާނޫނީ ދާއިރާއިން މަތީ ތަޢުލީމު ހާސިލުކުރައްވާފައިވާ ބޭފުޅެކެވެ. އޭނާ ވަނީ މިޞްރުގެ އަލްއަޒުހަރު ޔުނިވަރސިޓީއާއި ކުއްލިޔަތުލް ދިރާސާތުލް އިސްލާމިއްޔާއިން ޝަރީޢަތާއި ޤާނޫނުގެ ރޮނގުން މަތީ ތަޢުލީމު ހާސިލުކުރައްވާފައެވެ. މީގެއިތުރުން، ދިވެހިރާއްޖޭގެ އިސްލާމީ ޔުނިވަރސިޓީން މާސްޓަރ އޮފް އިސްލާމިކް ޖުޑީޝަލް ސައިންސް އެންޑް ޝަރީއާ ޕޮލިސީ ހާސިލުކުރައްވާފައިވެއެވެ.
ޙުސައިން ޝަހީދުގެ މި އައްޔަންކުރުން ވަނީ ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީގެ 148 ވަނަ މާއްދާގެ (ހ) ގައި ބަޔާންކޮށްފައިވާ ގޮތުގެމަތީން ކުރެވިފައެވެ. ސ. ހިތަދޫ، ބާޒީގޭ އަލްއުސްތާޛު ޙުސައިން ޝަހީދުގެ މި އައްޔަންކުރުމާއެކު، އޭނާ މިހާރު ވަނީ ޖޭއެސްސީގެ މެންބަރުކަމުގެ މަސްއޫލިއްޔަތު އަދާކުރަން ފައްޓަވާފައެވެ.