ކެންސަރު ބަލީގެ ދުވަސް ފާހަގަކުރުމުގެ ގޮތުން, ވިލު ރީފް ފެމިލީ ކްލަބް (ވީއެފްސީ)އިން ބަނޑިދޫ ކައުންސިލާއި އެ ރަށު އަންހެނުންގެ ތަރައްގީއަށް މަސައްކަތްކުރާ ކޮމެޓީ(ޑަބްލިއުޑީސީ) އާ ގުޅިގެން ކެންސަރަށް ހޭލުންތެރިކުރުމުގެ ޚާއްސަ ހަރަކާތެއް އިއްޔެ ކުރިއަށް ގެންގޮސްފިއެވެ. މި ހަރަކާތުގައި ހަވީރީ ހިނގުމެއް ބޭއްވިއިރު، ހޭލުންތެރިކުރުމުގެ ސެޝަނެއް އެ ރަށު ސްކޫލުގައި ވަނީ ކުރިއަށް ގެންގޮސްފައެވެ. މި ހަރަކާތްތަކުގައި ގިނަ އަދަދެއްގެ ރިސޯޓް މުވައްޒަފުންނާއި، ރަށުގެ ރައްޔިތުންނާއި، ރަށުގައި މަސައްކަތްކުރާ ފެނަކަ، ބަނޑިދޫ ޕޮލިސް، ބަނޑިދޫ ސްކޫލް އަދި ބަނޑިދޫ ހެލްތު ސެންޓަރުގެ މުވައްޒަފުން ވަނީ ބައިވެރިވެފައެވެ. ދުވަހުގެ ޚާއްސަ ހަވީރު ފެށިގެން އައީ ބަނޑިދޫގެ މަގުތަކުގައި އޮތް ހިނގާލުމަކުންނެވެ. މި ހިނގައިލުމުގައި ކެންސަރުން ރައްކާތެރިވުމާއި، އަވަހަށް ބަލި ދެނެގަތުމަށް ހޭލުންތެރިކުރުމުގެ މުހިންމުކަން ރަމްޒުކޮށްދޭ ޝިއާރުތައް ބޭނުންކޮށްފައިވެއެވެ. ވިލު ރީފް ފެމިލީ ކްލަބް އިން ކެންސަރު ބަލީގެ ދުވަސް ފާހަގަކުރުމުގެ ގޮތުން ބޭއްވި ހިނގާލުމުގެ ތެރެއިން--- އެ ހިނގާލުމަށް ފަހު ހެލްތު ޕްރޮޓެކްޝަން އެޖެންސީ (އެޗްޕީއޭ)ގެ ދެ އޮފިޝަލަކު ވަނީ ކޮމިއުނިޓީ ސެންޓަރުގައި ހޭލުންތެރިކުރުމުގެ ސެޝަނެއް ކުރިއަށް ގެންގޮސްފައެވެ. މި ސެޝަންގައި ބައިވެރިންނަށް ގަވާއިދުން ސްކްރީން ކުރުމާއި، ދުޅަހެޔޮ ދިރިއުޅުމެއް އުޅުމާއި، ކެންސަރުގެ އަލާމަތްތައް އަވަހަށް ދެނެގަތުމަށް ޓަކައި ބައިވެރިންނަށް ވަނީ އިރުޝާދުދީފައެވެ. އަދި މި ސެޝަންގައި ބައިވެރިންނަށް ސުވާލުކޮށް، ރައްކާތެރިވުމުގެ ގޮތްތަކާއި، ފަރުވާކުރެވޭނެ ގޮތްތަކާ ބެހޭ ތަޖުރިބާކާރުންނާ ސީދާ ގުޅިގެން މަސައްކަތް ކުރެވޭނެގޮތް ވަނީ ކިޔާދީފައެވެ. ​​"މިކަހަލަ އިވެންޓްތައް އިންތިޒާމްކުރުމުގެ މަގްސަދަކީ ރައްކާތެރިކަމުގެ ފިޔަވަޅުތަކަށް ހޭލުންތެރިކަން އިތުރުކޮށް، ހިތްވަރު ދިނުން. މުޖުތަމައަށް ތަފާތު ގެނައުމަށް ހޭލުންތެރިވުމަކީ މުހިންމު ކަމެއް،" ވިލު ރީފް ރިސޯޓް މެނޭޖަރު ތޯހާ ޔޫސުފް ވިދާޅުވިއެވެ. މި ކާމިޔާބު އިވެންޓަކީ ވިލު ރީފް ފެމިލީ ކްލަބުން އިޖުތިމާއީ ޒިންމާއާއި މުޖުތަމައުގެ ދުޅަހެޔޮކަމަށް ކުރިއަށް ގެންދާ ޚިދުމަތްތެރިކަމުގެ ހެކިތަކެއްކަން ވަނީ ފާހަގަކޮށްފައެވެ.