ބާރުގެ ބޭނުން ނަހަމަ ގޮތުގައި ހިފުމާއި މަސްލަހަތު ފުށުއަރާ ކަންކަމުގައި އޭނާގެ މައްޗަށް ކުރެވުނު ކުށްތަކުގެ ހުކުމަށް ލުއި ދިނުމަށް ފަހު، ގާތްގަނޑަކަށް އަށް މަސްދުވަހު ޖަލުގައި ހޭދަކުރެއްވުމަށް ފަހު، ތައިލެންޑުގެ ކުރީގެ ބޮޑުވަޒީރު ތަކްސިން ޝިނަވަޓްރާ މިއަދު ޖަލުން މިނިވަންވެއްޖެ އެވެ.
އުމުރުން 76 އަހަރުގެ ބިލިއަނަރު ތަކްސިން، ބެންކޮކްގެ ކްލޮންގް ޕްރެމް މަރުކަޒީ ޖަލުން ނުކުމެވަޑައިގަތީ މިއަދު ހެނދުނުގެ ވަގުތެއްގަ އެވެ. އޭނާ ޖަލުން ނުކުމެވަޑައިގަތުމުން، "ތަކްސިންދެކެ އަހަރެމެން ލޯބިވޭ"އޭ ބުނެ އަޑުއުފުލަމުންދިޔަ އެތައް ސަތޭކަ ސަޕޯޓަރުންނެއް އޭނާއަށް މަރުހަބާ ކިޔާފައިވެ އެވެ. އެ ވަގުތު އޭނާގެ އަރިހުގައި އޭނާގެ އަންހެން ދަރިފުޅު ޕައެޓޮންގްޓާން ޝިނަވަޓްރާ ހިމެނޭހެން އާއިލާގެ ބޭފުޅުން ތިއްބެވި އެވެ.
އަމިއްލައަށް އަރުވާލެވިގެން 15 އަހަރު ގައުމުން ބޭރުގައި އުޅުއްވުމަށް ފަހު، ތަކްސިން ތައިލެންޑަށް އެނބުރި ވަޑައިގަތީ 2023ގަ އެވެ. އޭނާގެ މައްޗަށް އިއްވާފައިވާ އަށް އަހަރުގެ ޖަލު ހުކުމް، ތައިލެންޑުގެ ރަސްގެފާނު ދެއްވި މާފާ އެކު ފަހުން ވަނީ އެއް އަހަރަށް ކުޑަކޮށްދެއްވާފަ އެވެ.
ޖަލުގައި މަދު ގަޑިއިރުތަކެއް ހޭދަކުރެއްވުމަށް ފަހު، ހިތުގެ މައްސަލަތަކާއި މޭގައި ރިއްސާތީ އޭނާ ވަނީ ހޮސްޕިޓަލަށް ބަދަލުކޮށްފަ އެވެ. އަދި ޕެރޯލްގެ ދަށުން މިއަދު ދޫކޮށްލުމުގެ ކުރިން އޭނާ ހަ މަސްދުވަހު އޮންނެވީ ހޮސްޕިޓަލުގެ ވީއައިޕީ ވޯޑެއްގަ އެވެ.
މިދިޔަ އަހަރު ތައިލެންޑުގެ ސުޕްރީމް ކޯޓުން ވަނީ، ޖަލު ހުކުމުން ބަރީއަވުމަށްޓަކައި ތަކްސިން ހޮސްޕިޓަލުގައި އޮންނެވި މުއްދަތު ނަހަމަ ގޮތުގައި އިތުރުކޮށްފައިވާ ކަމަށް ނިންމާފަ އެވެ. އަދި ބައެއް މެޑިކަލް ފަރުވާތަކަކީ ކޮންމެހެން ބޭނުންތެރި ފަރުވާތަކެއް ނޫން ކަމަށް ވެސް ކޯޓުން ވަނީ ކަނޑައަޅާފަ އެވެ. ކަމާބެހޭ ފަރާތްތަކުން ބުނާ ގޮތުގައި، ހުކުމުގެ ބާކީ އޮތް ބައިގައި އޭނާ ހުންނަވަން ޖެހޭނީ ފައިގައި އިލެކްޓްރޯނިކް މޮނިޓަރިން ޑިވައިސްއެއް އަޅުއްވައިގެންނެވެ.
ވޭތުވެދިޔަ 20 އަހަރަށް ވުރެ ގިނަ ދުވަހު ތައިލެންޑުގެ ސިޔާސީ މައިދާނުގައި ނުފޫޒުގަދަ ބޭފުޅެއްގެ ގޮތުގައި ހުންނެވި ތަކްސިންގެ ސިޔާސީ ބާރު، އޭނާ ޖަލަށްލުމާ ގުޅިގެންނާއި މި އަހަރު ބޭއްވި އިންތިހާބުގައި 'ފިއު ތައި' ޕާޓީއަށް ލިބުނު ނަތީޖާ ދަށްވުމުގެ ސަބަބުން މިހާރު ވަނީ ވަރަށް ބޮޑަށް ކުޑަވެފަ އެވެ.