ކުރިއަށް އޮތް އެއް އަހަރު ތެރޭގައި ގައުމީ ތަރައްގީގެ ޕްލޭން އެކުލަވައިލާ ނިންމުމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ނިންމަވައިފި އެވެ. 
20 އަހަރު ދުވަހުގެ ގައުމީ ތަރައްގީގެ ޕްލޭނެއް އެކުލަވައިލާ އެ ޕްލޭނަށް ގާނޫނީ ހިމާޔަތް ލިބޭނެ އިންތިޒާމު ހަމަޖެއްސެވުމަކީ ރައީސުލްޖުމްހޫރިއްޔާ ރިޔާސީ އިންތިހާބުގައި ވެވަޑައިގެންފައިވާ ވައުދުފުޅެކެވެ.
ރިޔާސީ ވައުދުފުޅާ އެއްގޮތަށް ގައުމީ ތަރައްގީގެ ޕްލޭން އެކުލަވައިލާ އެއް އަހަރު ތެރޭގައި ނިންމުމަށް ވަޒީރުންގެ މަޖިލީހުގެ މަޝްވަރާގެ މަތިން ރައީސް ނިންމެވީ އިއްޔެ އެވެ. އެ ނިންމުމާ ގުޅޭ ބައެއް ތަފުސީލުތައް މިއަދު އެމަނިކުފާނުވަނީ ރައީސް އޮފީހުގެ މުވާސަލާތީ މަންސައްތަކުގެ ޒަރީއާއިން އާންމުކުރައްވާފަ އެވެ. 
މީސްމީޑިޔާގައި ރައީސް އޮފީހުން އާންމުކުރި ވީޑިޔޯއެއްގައި ރައީސް ވިދާޅުވީ ގައުމީ ތަރައްގީގެ ޕްލޭނުގެ މަސައްކަތް އެއް އަހަރު ތެރޭ ނިންމާނީ ރައްޔިތުންގެ ބައިވެރިވުމާއި މަޝްވަރާ ހިމަނުއްވައިގެން ކަމަށެވެ. 
"ކުރިއަށް އޮތް އެއް އަހަރު ދުވަހުގެ ތެރޭގައި ރައްޔިތުންގެ ފުރިހަމަ ބައިވެރިވުން ހިމެނޭ ގޮތަށް، ހުރިހާ ސިޔާސީ ޕާޓީތަކާއި ޖަމްއިއްޔާ ޖަމާއަތްތަކާއި، އެކިއެކި ސްޓޭކް ހޯލްޑަރުންނާއި އެކްސްޕާޓުން ހިމެނޭ ގޮތަށް ވަރަށް ފުރިހަމަ މަޝްވަރާ ހިމެނޭ ގޮތަށް ގައުމީ ތަރައްގީގެ މާސްޓާ ޕްލޭނެއް ކުރިއަށް އޮތް 20 އަހަރު ދުވަހަށް އެކުލަވައިލުމުގެ މަސައްކަތް މި ފަށަނީ،" ރައީސް ވިދާޅުވި އެވެ. 
އިތުރަށް ރައީސް ވިދާޅުވީ އެމަނިކުފާނު ވައުދުވެވަޑައިގެންފައިވާ ފަދައިން އެ މާސްޓާ ޕްލޭނަށް ގާނޫނީ ހިމާޔަތް ދެއްވާނެ ކަމަށެވެ. އެ ހިމާޔަތް ފޯރުކޮށްދިނުމަށް ގާނޫނުއަސާސީއަށާއި ގާނޫނުތަކަށް ގެންނަންޖެހޭ އިސްލާހުތައް ގެންނަވައި އެކަމަށް ހާއްސަ ވަކި ގާނޫނެއް އެކުލަވައިލައްވާނެ ކަމުގައި ރައީސް ވިދާޅުވި އެވެ. 
އަދި އެފަދައިން އެ ޕްލޭނަށް ގާނޫނީ ރައްކާތެރިކަމާއި ހިމާޔަތް ދެއްވުމުގެ މަގުސަދަކީ ރައްޔިތުންގެ ބައިވެރިވުމާއި ހިޔާލާއެކު އެކުލަވައިލާ ކުރިއަށް އޮތް 20 އަހަރު ދުވަހުގެ ތަސައްވުރަކީ އެއަށް އިތުބާރު އޮންނަ ރައްޔިތުންގެ ޔަގީންކަން އެއާމެދު އޮންނަ ތަސައްވުރަކަށް ހެއްދެވުން ކަމަށްވެސް އެމަނިކުފާނު ވިދާޅުވި އެވެ. 
ރައީސް ވިދާޅުވީ ހުރިހާ ރަށެއްގައި އެންމެން ބައިވެރިވާހެން ވަރަށް ތަފުސީލުކޮށް ފުޅާ ދާއިރާއެއްގައި މާސްޓަ-ޕްލޭނާ ގުޅޭ މަޝްވަރާތައް ކުރެވިގެންދާނެ ކަމަށެވެ. އަދި ރާއްޖޭގެ ތަރައްގީ ދިވެހި ރައްޔިތުން އެދޭ ގޮތަށް ބައްޓަންކުރެވިގެންދާނެ ކަމަށެވެ. 
އިތުރަށް އެމަނިކުފާނު ވިދާޅުވީ ރާއްޖެއާމެދު އެމަނިކުފާނު ދެކެވަޑައިގަންނަވާ ތަސައްވުރު ރިޔާސީ އިންތިހާބުގެ ކެމްޕެއިނުން ފެށިގެން ހިއްސާކުރައްވާފައިވާނެ ކަމަށެވެ. އަދި އެދިވަޑައިިގަންނަވަނީ ރައްޔިތުންގެ ބައިވެރިވުމާއެކު އެއަށްވުރެވެސް ގައުމީ ކުރިމަގުގެ ތަސައްވުރު ފުރިހަމަކުރެއްވުން ކަމަށް ރައީސް ވިދާޅުވި އެވެ. 
"މިކަމަކީ އަޅުގަނޑުމެން އެންމެންގެ މަސައްކަތެއް. އެންމެންގެ ބައިވެރިވުމާއެކު އެންމެންގެ ކުރިއެރުމަށްޓަކައި، އަޅުގަނޑުމެންގެ ދަރިންގެ މުސްތަގުބަލަށްޓަކައި ކުރާ މަސައްކަތަކަށް ގެންދާނެ އިރާދަކުރެއްވިއްޔާ،" ރައީސް ވިދާޅުވި އެވެ. 
އަދި އެމަނިކުފާނު ދެކިވަޑައިގަންނަވަން ބޭނުންފުޅުވަނީ ހުރިހާ ރައްޔިތުންވެސް މި މަސައްކަތުގައި ބައިވެރިވެވަޑައިގަތުން ކަމަށެވެ. އަދި އެކަމުގައި ބޭރުގެ މާހިރުން ބައިވެރިވި ނަމަވެސް އެ މަސައްކަތުގައި އިސްކޮށް ތިއްބަވާނީ ދިވެހި ގައުމާމެދު ލޯބިކުރާ، ދިވެހިވަންތަކަށް ވަފާތެރި ދިވެހި ބޭފުޅުންކަމަށްވެސް އެމަނިކުފާނު ވިދާޅުވި އެވެ. 
މި މަސައްކަތުގައި އަހަރެމެން ހަމަ ހަމަ ވާނެ، އިންސާފުވެރި ވާނެ، އިތުބާރު ދަމަހައްޓާނެ