އާސަންދަ ނިޒާމަށް ގެންނަ ބަދަލުތަކާމެދު ރައްޔިތުން ކަންބޮޑުވާން ނުޖެހޭނެކަމަށް ޞިއްޙީ ވަޒީރު ޢަބްދުﷲ ނާޒިމް އިބްރާހީމް ވިދާޅުވެއްޖެއެވެ. މިއަދު މިނިސްޓްރީ އޮފް ހެލްތުގައި ބޭއްވުނު ނޫސްވެރިންގެ ބައްދަލުވުމެއްގައި ވާހަކަފުޅު ދައްކަވަމުން ވަޒީރު މިހެން ވިދާޅުވިއެވެ. ވަޒީރު ވިދާޅުވީ ޤައުމުގެ އެންމެ ބޮޑު ރައުސުލްމާލަކީ ދުޅަހެޔޮ އާބާދީއެއް ކަމަށާއި، އެހެންކަމުން ބަލިމަޑުކަމުގެ ފަހަތުން ނުދުވާ ސިއްޙީ ނިޒާމެއް ޤާއިމްކުރުމަށް ސަރުކާރުން މަސައްކަތްކުރަމުންދާ ކަމަށެވެ. މިގޮތުން އާސަންދަ ނިޒާމަށް ހަރުދަނާ ބަދަލުތައް ގެނައުމުގެ މުހިންމުކަން ވަޒީރު ފާހަގަކުރެއްވިއެވެ. "އަޅުގަނޑުމެން މިގެންނަ ބަދަލުތަކަކީ ރައްޔިތުންނަށް ބުރައެއްނެތި، ދެމެހެއްޓެނިވި ގޮތެއްގައި ސިއްޙީ ނިޒާމު ކުރިއަށް ގެންދިއުމަށްޓަކައި ކުރެވޭ މަސައްކަތްތަކެއް. އެހެންވީމާ، މިކަމާ ގުޅޭގޮތުން ރައްޔިތުން ކަންބޮޑުވާން ޖެހޭނެ ކަމަކަށް އަޅުގަނޑު ނުދެކެން," ވަޒީރު ވިދާޅުވިއެވެ. އާސަންދަ ނިޒާމަށް ގެނެވޭ ބަދަލުތަކުގެ ތަފްސީލު އަންނަ ހަފްތާގައި ހާމަކުރައްވާނެ ކަމަށް ވަޒީރު ވިދާޅުވިއެވެ. އަދި މި ބަދަލުތަކަކީ ރައްޔިތުންގެ ދުޅަހެޔޮކަމަށް އިތުރު ފައިދާތަކެއް ލިބިގެންދާނެ ކަންކަން ކަމުގައި އެމަނިކުފާނު ފާހަގަކުރެއްވިއެވެ.