މި ސަރުކާރަށް ރެއާއި ދުވާލު ވައްކަން ކުރުން ފިޔަވައި އިތުރު ކަމެއް ކުރަން ނޭގޭ ކަމަށް ވިދާޅުވެ ހަނިމާދޫ ދާއިރާގެ އެމްޑީޕީ މެންބަރު އަބްދުލްޣަފޫރު މޫސާ (ގަޕޯ) ރޭ ކިޔައިދެއްވީ މި ސަރުކާރުން ކުރަން ބުނެ ނުވި ކަންކަމުގެ ކުޑަ ލިސްޓެ ކެވެ.އެމްޑީޕީން ރޭ ބޭއްވި ކަންމަތީ އެއްވުމުގައި ވާހަކަދައްކަމުން ގަޕޯ ވިދާޅުވީ އޭނާގެ ދާއިރާގައި ބައެއް މަޝްރޫއުތައް ހިންގަން ސަރުކާރުން ވައުދުވެފައިވާއިރު، އޭގެއިން އެއްވެސް ކަމެއް މި ސަރުކާރުން ކުރާނެހާ ވެސް ކަމަކީ ރެއާއި ދުވާލު ވައްކަން ކުރުން ކަމަށެވެ."އަޅުގަނޑު ދާއިރާގައި ފިނޭގައި ވެސް މަގުހަދައިދޭން ބުނި. އެކަމެއް ނުވާނެ. ނުކުރެވޭނެ. ހަނިމާދޫގައި ހޮސްޕިޓަލެއް އަޅަން ބުނި. އެކަމެއް ވެސް ނުކުރެވޭނެ. ނާވައިދޫގައި ފަޅު ހިއްކައި ރިވެޓްމަންޓް ޖަހައިދޭން ބުނި. އެކަމެއް ނުވާނެ މި ސަރުކާރަކަށް،" ގަޕޯ ވިދާޅުވި އެވެ."އެއީކީ މި ސަރުކާރުން ދަންނަ ކަމެއް ނޫން. އެކަން ކުރާކަށް ނޭގޭނެ. އަޅުގަނޑު މިދަންނަވަނީ ނުވާނެއޭ. ވަރަށް ސާފުކޮށް މި ބުނަނީ ނުވާނެއޭ. މި މީހުންނަށް އެނގޭނެހާ ވެސް ކަމަކީ ރޭދުވާލު ވައްކަން ކުރުން. ހަމަ އެހެން އެއްވެސް ކަމެއް ކުރާކަށް ނޭގޭ."ޣަފޫރު ވިދާޅުވީ 110 ބިލިއަން ރުފިޔާ ދުއްވާލައިގެން މި ސަރުކާރަށް ކުރެވިފައި ހުރި ހަމަ އެކަނި ކަމަކީ އެއް ނަމްބަރު ފާލަން ހެދުން އެކަނި ކަމަށެވެ. ދެން ކުރީ ހުސް ވައްކަން ކަމަށް އޭނާ ވިދާޅުވި އެވެ. އަދި މި ސަރުކާރުން ދަނީ މި ގައުމު ލޫޓުވަމުން ކަމަށާއި އެހެންކަމުން ގައުމެއް ލޫޓުވަމުން ދާއިރު ބަލަން ތިބެގެން ނުވާނެ ކަމަށް ޣަފޫރު ވިދާޅުވި އެވެ.މި ސަރުކާރުން ސްޕްރީމް ކޯޓަށް އަތްބޭނި ފަހުން ފަހަރަކު މުއައްސަސާއެއް ހަލާކުކުރަމުން ދާނެކަން ދަންނަންޖެހޭ ކަމަށާއި އެގޮތުން މިއަދު މިއޮތީ މިޑިއާ ސަރުކާރުގެ ބާރުގެ ދަށަށް ގެނައުމުގެ މަސައްކަތް ކަމަށެވެ.މި ސަރުކާރުން ކުރަމުން މި ގެންދާ ކަންކަން ނުހުއްޓުވައި ފަހަތަށް ޖެހިގެން ތިބެއްޖެ ނަމަ ދެން މި ގައުމު އަތު ނުވާނޭ ކަމަށާއި މި ސަރުކާރު ހަމަމަގަށް އެޅުވުމަށް ނުކުންނަން އެބަޖެހޭ ކަމަށް އޭނާ ވިދާޅުވި އެވެ.މި ސަރުކާރަކީ ރައްޔިތުންނަށް ޖެހިފައި އޮތް ބޮޑު މުސީބާތެއްކަން ފާހަގަކުރައްވާ ގަޕޯ ވިދާޅުވީ މި މުސީބާތުން ދިވެހި ރައްޔިތުން ސަލާމަތްވާން ޖެހޭ ކަމަށެވެ."އަޅުގަނޑުމެން އިރާދަކުރެއްވިއްޔާ މި ގައުމު ހަމަ މަގަށް އަޅުވާނަން. މި ސަރުކާރުންވާ އެއްވެސް ވައުދަކީ އެއީ ފުއްދާނެ ވައުދެއްކަން ރައްޔިތުން ގަބޫލުކުރަން ހެޔޮވެސް ނުވާނެ. ރޯމާ ދުވާލު ރައްޔިތުންގެ ފައިސާއިން ވައްކަން ކުރަނީ. އެއީކީ ނޫން ރައްޔިތުންނަށް ވެރިކަން ކޮށްދިނުމަކީ. ރައްޔިތުންނަށް އެކޮށްދެނީ ބަލާވެރިކަމެއް. މީގެއިން އަޅުގަނޑުމެން ސަލާމަތްވާންޖެހޭ،" ގަޕޯ ވިދާޅުވި އެވެ.