އީރާނާ ގުޅުންހުރި އުޅަނދުފަހަރު ހޮރްމޫޒް ކަނޑުއޮޅިން ދަތުރުކުރުން ހުއްޓުވުމަށް އެމެރިކާއިން ކަނޑުގެ ބްލޮކޭޑެއް ނުވަތަ ހުރަސްތަކެއް ކުރިމަތިކުރުމަށް ތައްޔާރުވުމާ ގުޅިގެން، ދުނިޔޭގެ ބާޒާރުގައި ސާފުނުކުރާ ތެލުގެ އަގު ފީފާއަކަށް 100 ޑޮލަރަށް ވުރެ މައްޗަށް މިއަދު އަނެއްކާވެސް އުފުލިއްޖެ އެވެ.
މި ނިންމުން އެމެރިކާއިން ނިންމާފައިވަނީ އީރާނާ އެކު ކުރެވުނު މަޝްވަރާތައް ނާކާމިޔާބުވުމާ ގުޅިގެންނެވެ.
މި ބަދަލާ އެކު ބްރެންޓް ކްރޫޑްގެ އަގު %7.3 މައްޗަށް ގޮސް، ފީފާއެއްގެ އަގު މިހާރު ހުރީ 102.16 ޑޮލަރަށެވެ. އަދި އެމެރިކާގެ ވެސްޓް ޓެކްސަސް އިންޓަމީޑިއޭޓްގެ އަގު %8.4 މަތިވެ، ފީފާއެއްގެ އަގު ވަނީ 104.69 ޑޮލަރަށް އަރާފަ އެވެ.
އެމްއެސްޓީ މާކީގެ އެނަލިސްޓް ސޯލް ކެވޮނިކް ފާހަގަކުރެއްވި ގޮތުގައި، ބާޒާރުގެ ހާލަތު މިހާރު ވަނީ ހަނގުރާމަ މެދުކަނޑާލުމުގެ ކުރިން އޮތް ނުރައްކާތެރި ދަރަޖައަށް ރުޖޫއަވެފަ އެވެ. އަދި މިކަމުގެ ސަބަބުން ދުވާލަކު 2 މިލިއަން ފީފާގެ ތެލުގެ ސަޕްލައިއަށް ބުރޫއަރާނެ ކަމަށް ބެލެވެ އެވެ.
އެމެރިކާގެ ރައީސް ޑޮނަލްޑް ޓްރަމްޕް ވަނީ މިއަދުން ފެށިގެން މި ބްލޮކޭޑް އަމަލީ ގޮތުން ހިންގަން ފަށާނެ ކަމަށް ވިދާޅުވެފަ އެވެ. އަދި ކުރިއަށް އޮތް އިންތިހާބާ ދިމާކޮށް ތެލުގެ އަގު މިގޮތުގައި މަތީގައި ހުރެދާނެ ކަމުގެ އިންޒާރު ވެސް އޭނާ އިއްޔެ ދެއްވި އެވެ.
އެމެރިކާގެ ސެންޓްރަލް ކޮމާންޑުން ބުނި ގޮތުގައި، އީރާނުގެ ބަނދަރުތަކަށް ވަންނަ އަދި ނުކުންނަ އުޅަނދުފަހަރަށް މި ފިޔަވަޅުތައް ހަމަހަމަކަމާ އެކު ތަންފީޒުކުރާނެ އެވެ. ނަމަވެސް އީރާނު ނޫން އެހެން ގައުމުތަކަށް ދަތުރުކުރާ އުޅަނދުފަހަރަށް މީގެން ހުރަހެއް ނޯންނާނެ އެވެ.
އީރާނުން އިންޒާރު ދީފައިވަނީ ހޮރްމޫޒް ކަނޑުއޮޅި ސަރަހައްދުގައި އެމެރިކާގެ އަސްކަރީ ހަރަކާތްތައް އިތުރުކުރުމަކީ ހަނގުރާމަ މެދުކަނޑާލުމުގެ އެއްބަސްވުމާ ހިލާފުވުން ކަމަށާއި މީގެ ސަބަބުން ކުރިމަތިލުންތަކެއް ހިނގުމުގެ ފުރުސަތު ބޮޑުވާނެ ކަމަށެވެ.
މި ބްލޮކޭޑްގެ ސަބަބުން ކަނޑުދަތުރުފަތުރަށް މިހާރު ވެސް ވަނީ އަސަރުކޮށްފަ އެވެ. ގިނަ އަދަދެއްގެ ތެޔޮ ޓޭންކަރުތައް މިހާރު ދަނީ ހޮރްމޫޒް ކަނޑުއޮޅިން ދަތުރުކުރުމުގެ ބަދަލުގައި އެ ސަރަހައްދުން ދުރަށް ދަތުރުކުރަމުންނެވެ.