ޔޫރަޕްގެ އިއްތިހާދު (އީޔޫ)ގެ ގައުމުތަކުގައި އުފައްދާ އާފަލުގައި އެކި ބާވަތުގެ ޕެސްޓިސައިޑް ނުވަތަ ސޫފާސޫފި މަރާ ބޭސްތައް ގިނަ އަދަދަކަށް ހުންނަ ކަމަށް ބުނެ، ތިމާވެށި ރައްކާތެރިކުރުމަށް މަސައްކަތްކުރާ ޖަމިއްޔާއަކުން ކަންބޮޑުވުން ފާޅުކޮށްފިއެވެ. "ޕެސްޓިސައިޑް އެކްޝަން ނެޓްވޯކް" (ޕޭން ޔޫރަޕް)އިން ކުރި ދިރާސާއަކަށް ފަހު، ބުނެފައިވަނީ ޔޫރަޕްގެ އާފަލުން "ޕެސްޓިސައިޑް ކޮކްޓެއިލް" ނުވަތަ އެކި ބާވަތުގެ ބޭސްތައް އެކުވެފައިވާކަން ފާހަގަކުރެވިފައިވާ ކަމަށެވެ. މިއީ 2005 ވަނަ އަހަރުން ފެށިގެން އީޔޫއިން ހައްލުކުރަން ވައުދުވެފައިވާ މައްސަލައެއްކަން އެ ޖަމިއްޔާއިން ހަނދާންކޮށްދީފައިވެއެވެ. މި ދިރާސާގައި ޔޫރަޕްގެ 13 ގައުމަކުން އުފެއްދި އާފަލުގެ 59 ސާމްޕަލެއް ތަހުލީލުކުރިއެވެ. މީގެ ތެރެއިން 93 އިންސައްތަ އާފަލުގައި މަދުވެގެން އެއް ބާވަތުގެ ޕެސްޓިސައިޑް ހުރިއިރު، 85 އިންސައްތަ އާފަލުގައި އެކި ބާވަތުގެ ބޭސްތައް އެކުލެވިގެންވެއެވެ. އެވްރެޖްކޮށް ކޮންމެ އާފަލެއްގައި ތިން ބާވަތުގެ ބޭސް ހުރިއިރު، ބައެއް ސާމްޕަލްތަކުން ހަތް ބާވަތުގެ ބޭސް ވެސް ފެނިފައިވެއެވެ. ޕޭން ޔޫރަޕުން ބުނީ މިކަމާ ގުޅޭ އިތުރު ދިރާސާތައް ކުރަންޖެހޭކަމަށް --- ފޮޓޯ: އީޔޫރެކްޓިވް ޕޭން ޔޫރަޕްގެ ޑިރެކްޓަރު މާޓިން ޑާމިން ވިދާޅުވީ، މިހާރު ޕެސްޓިސައިޑްތައް ޓެސްޓުކުރަނީ ވަކިވަކި ބާވަތްތަކުގެ ގޮތުގައި ކަމަށާއި ނަމަވެސް ގިނަ ބާވަތްތަކެއް އެކުވެގެން އިންސާނާގެ ހަށިގަނޑަށް ކުރާނެ "ޖުމުލަ އަސަރު" (ކުމިއުލޭޓިވް އިފެކްޓް) އަދި ދެނެގަނެވިފައިނުވާ ކަމަށެވެ. "މިހާރު އާފަލުތަކުގައި މި ހުންނަ މިކްސްޗަރަކީ ކެއުމަށް ރައްކާތެރި އެއްޗެއް ކަމެއް އަހަރެމެންނަކަށް ނޭނގޭ،" އޭނާ ވިދާޅުވިއެވެ. ކުރިން 2005 ވަނަ އަހަރު އީޔޫއިން ފާސްކުރި ގާނޫނެއްގައި ކާބޯތަކެތީގައި ހުންނަ ޕެސްޓިސައިޑްތަކުގެ ޖުމުލަ އަސަރު ބަލާނެ ގޮތްތަކެއް އެކުލަވައިލުމަށް ކަނޑައަޅާފައިވެއެވެ. ނަމަވެސް، ޔޫރަޕިއަން ފުޑް ސޭފްޓީ އޮތޯރިޓީ (އީއެފްއެސްއޭ)އިން މި ކަމަށް އެކަށީގެންވާ ނިޒާމެއް އަދިވެސް ގާއިމުކޮށްފައިނުވާތީ ޕޭން ޔޫރަޕުން ވަނީ ފާޑުކިޔާފައެވެ. މި ކަމާ ގުޅޭގޮތުން އީއެފްއެސްއޭއިން ބުނީ، މިފަދަ ދިރާސާއެއް ކުރުމަކީ ބޮޑެތި ޑޭޓާ ސެޓުތަކާއި އާ ސޮފްޓްވެއާތައް ބޭނުންވާ، ވަގުތު ނަގާނެ މަސައްކަތެއް ކަމަށެވެ. އަދި، މި ކަމާ ގުޅޭ ހުރިހާ ދިރާސާތަކެއް 2030 ވަނަ އަހަރާ ހަމައަށް ނިންމާލެވޭނެ ކަމަށް އެ އިދާރާއިން ލަފާކުރެއެވެ. މިދިޔަ އަހަރު އީޔޫއިން ވަނީ އާފަލު ފަދަ މޭވާތަކުގައި ހުންނަ 'އެސެޓަމިޕްރިޑް' ކިޔާ ބޭހެއްގެ މިންވަރު ދަށްކުރުމަށް ނިންމާފައެވެ. ނަމަވެސް، ދަނޑުވެރިން ވަނީ މި ނިންމުމުގެ ސަބަބުން އުފެއްދުންތެރިކަމަށް ހުރަސްއެޅޭނެ ކަމަށް ބުނެ ނުރުހުން ފާޅުކޮށްފައެވެ.