ކިއުބާއަށް ތެޔޮ ވިއްކައި ނުވަތަ އެ ނޫން ވެސް ގޮތަކުން ތެޔޮ ފޯރުކޮށްދޭ ގައުމުތަކުގެ މުދަލުން ޓެރިފް ނެގުމުގެ އުސޫލެއް ކަނޑައެޅުމަށް ރަސްމީ އަމުރެއްގައި އެމެރިކާގެ ރައީސް ޑޮނަލްޑް ޓްރަމްޕް ސޮއިކޮށްފައިވާ ކަމަށް ވައިޓް ހައުސްއިން ބުނެފިއެވެ. މި ފިޔަވަޅަކީ އެމެރިކާގެ ގައުމީ ސަލާމަތާއި ޚާރިޖީ ސިޔާސަތުގެ މަސްލަހަތު ހިމާޔަތްކުރުމަށް ކުރާ ކަމެއް ކަމަށް ވައިޓް ހައުސްގެ ފެކްޓް ޝީޓެއްގައި ބުނެފައިވެއެވެ. ބުރާސްފަތި ދުވަހު ޓްރަމްޕް ސޮއި ކުރެއްވި އެ އަމުރުގައި، ކިއުބާ ސަރުކާރަކީ އެމެރިކާގެ ގައުމީ ސަލާމަތަށް އާދަޔާ ޚިލާފަށް އޮތް ނުރައްކަލެއް ކަމަށް ސިފަކޮށްފައިވެއެވެ. އެ އަމުރުގައި ސެކްރެޓަރީ އޮފް ސްޓޭޓް މާކޯ ރޫބިއޯއާއި ކޮމާސް ސެކްރެޓަރީ ހަވާޑް ލުޓްނިކްއަށް ޓެރިފް ނިޒާމާއި އެއާ ގުޅުން ހުރި ފިޔަވަޅުތައް ތަންފީޒުކުރުމަށް ގަވާއިދުތަކާއި އިރުޝާދުތައް ނެރުން ހިމެނޭ ގޮތަށް އަޅަންޖެހޭ ހުރިހާ ފިޔަވަޅުތަކެއް އެޅުމުގެ ހުއްދަ ދީފައިވެއެވެ. ރަސްމީ އަމުރުގައިވާ ގޮތުން ކިއުބާ ނުވަތަ އެހެން ގައުމުތަކުން ވެސް އެމެރިކާގެ ޚާރިޖީ ސިޔާސަތާއި ގައުމީ ސަލާމަތުގެ އަމާޒުތަކާ އެއްގޮތަށް އަމަލުކޮށްފިނަމަ، ޓްރަމްޕް އެ ހުރަސްތަކަށް އިސްލާހު ގެންނެވުން އެކަށީގެންވެއެވެ. ޓްރަމްޕް ވަނީ ކިއުބާއާ ދެކޮޅަށް އެތައް ފަހަރަކު ވާހަކަދައްކަވާފައެވެ. އަދި، މާ ލަސް ނުވަނީސް ކިއުބާގެ ލީޑާޝިޕުން އެއްބަސްވުމެއް ހަދަން ޖެހޭނެ ކަމަށް ވެސް މި މަހުގެ ކުރީކޮޅު ވަނީ ވިދާޅުވެފައެވެ. ނަމަވެސް، އެއީ ކޮން ކަހަަލަ އެއްބަސްވުމެއް ކަމެއް ވިދާޅެއްނުވެއެވެ. ޓްރަމްްޕް ކިއުބާއަށް އިންޒާރުދެއްވާފައިވަނީ މި މަހުގެ ކުރީކޮޅު ވެނެޒުއެލާގެ ރައީސް ނިކޮލަސް މަދޫރޯއާއި އޭނާގެ އަނބިކަނބަލުން ވަގަށް ނެގި ފަހުންނެވެ. އޭގެ ފަހުން އެމެރިކާއިން ވެނެޒުއެލާގެ ތެލުގެ ސިނާއަތުގެ ކޮންޓްރޯލް ފައިދާ ހުރި ގޮތެއްގައި ނަގާފައިވާއިރު، ޓްރަމްޕް ވަނީ ކިއުބާއަށް ފޮނުވި ތެޔޮ ޝިޕްމަންޓްތައް ހުއްޓުވާނެ ކަމަށް ވައުދުވެވަޑައިގެންފައެވެ. އަދި، ކިއުބާ ވަރަށް އަވަހަށް ފެއިލްވާނެ ކަމަށާއި ވެނެޒުއެލާގެ ތެޔޮ ނުވަތަ އާމްދަނީ ކިއުބާއަށް ވަންނަ މިންވަރު މަދުކަމަށް ވެސް ޓްރަމްޕް ވިދާޅުވިއެވެ. ޓްރަމްޕްގެ އިންޒާރުތަކަށް ރައްދު ދެއްވަމުން ކިއުބާގެ ރައީސް މިގްއެލް ޑިއާޒް ކެނެލް މި މަހުގެ ކުރީކޮޅު ވިދާޅުވީ، 1962 ވަނަ އަހަރުން ފެށިގެން އެމެރިކާގެ ދަތިކުރުމުގެ ފިޔަވަޅުތަކުގެ ދަށުގައި އޮތް އަދި ގަވާއިދުން ތެލުގެ ދަތިކަން ކުރިމަތިވެ ކަރަންޓްގެ މައްސަލަ ކުރިމަތިވާ ކިއުބާއަށް އެއްވެސް ކަހަލަ އެއްބަސްވުމެއް ގާއިމުކުރުމަށް މަޖުބޫރު ކުރުމުގެ ބާރެއް އެމެރިކާއަށް ނެތް ކަމަށެވެ. "އެމެރިކާއާއި ކިއުބާއާ ދެމެދު އޮންނަ ގުޅުން، ކުރިއަށް ގެންދިއުމަށްޓަކައި ޢަދާވާތްތެރިކަމާއި އިންޒާރުތަކާއި އިގުތިސާދީ މަޖުބޫރުކުރުމުގެ ބަދަލުގައި ބިނާވެފައި އޮންނަޖެހޭނީ ބައިނަލްއަގުވާމީ ގާނޫނުތަކުގެ މައްޗަށް،" ޑިއާޒް ކެނެލް ވިދާޅުވިއެވެ. ޓެރިފް ނެގުމަށް ޓްރަމްޕް އަމުރު ނެރުއްވިއިރު، ކިއުބާއާ ދުރުހެލިވުމަށް އެމެރިކާއިން އަންނަނީ މެކްސިކޯއަށް ވެސް ޕްރެޝަރު ކުރަމުންނެވެ. ކިއުބާއަށް ތެލުގެ ބޮޑު ބައެއް ފޯރުކޮށްދެނީ ވެނެޒުއެލާއާއި މެކްސިކޯއިންނެވެ. ނަމަވެސް، ޖަނަވަރީ މަހުގެ ތިންވަނަ ދުވަހު އެމެރިކާއިން މަދޫރޯ ރަހީނުކުރި ފަހުން ވެނެޒުއެލާއަށް ތެޔޮ ފޮނުުވުން ވަނީ ހުއްޓާލާފައެވެ. ދަ ފައިނޭންޝަލް ޓައިމްސްއިން ބުނާ ގޮތުގައި ކިއުބާއަށް އިމްޕޯޓްކުރާ ތެލުގެ ގާތްގަނޑަކަށް 44 ޕަސެންޓް މެކްސިކޯއިން ފޯރުކޮށްދީފައިވާއިރު، މިދިޔަ މަހުގެ ނިޔަލަށް ވެނެޒުއެލާއިން ވަނީ 33 ޕަސެންޓް ސަޕްލައިކޮށްފައެވެ. ތެލުގެ ގާތްގަޑަކަށް 10 ޕަސެންޓް ލިބެނީ ރަޝިޔާއިން ކަމަށާއި އެއަށްވުރެ ކުޑަ އަދަދެއް އަލްޖީރިއާއިން ކިއުބާއަށް ފޯރުކޮށްދޭ ކަަމަށް ވެސް ކަމަށް ދަ ފައިނޭންޝަލް ޓައިމްސްއިން ބުނެފައިވެއެވެ.