ލޭ ރައްކާ ކުރާ ބްލަޑް ބޭންކުތަކުން ވަރަށް ބޮޑަށް ލޭ މަދުވެ، އަސާސީ ކަންކަމަށް ބޭނުންވާ މިންވަރަށް ވެސް ލޭ ނެތުމުން، ނެޝަނަލް ބްލަޑް ސަޕްލައި އެމަޖެންސީއެއް އިއުލާނުކޮށްފި އެވެ.
ލޭ މަދުވެ، އެމަޖެންސީ ހާލަތެއް މިދިޔަ ބުދަ ދުވަހު ކުރީ އިމަޖެންސީކޮށް ލޭ ބޭނުންވާ މީހުންނާއި ވިހެއުމުގެ ތެރޭގައި ލޭ ބޭނުންވާ މީހުންނާއި ކެންސަރުގެ ފަދަ ބަލިތަކުގައި ލޭ ބޭނުންވާ މީހުންނާއި ގަވާއިދުން ލޭ އަޅަންޖެހޭ މީހުންނަށް ބޭނުންވާ މިންވަރަށް ލޭ ނެތުމުންނެވެ.
"ލޭ ދިނުމަށް ޝަރުތު ހަމަވާ މީހުން، އެހެން ބަޔަކު ލޭ ދޭނެ ކަމަށް ބަލަން ނުތިއްބަވާ، ލޭ ހަދިޔާ ކުރަން އަވަސްވެ ގަންނަވާ،" ލޭ ހޯދަން މަސައްކަތް ކުރާ އަށް ޖަމިއްޔާއަކުން ނެރުނު ބަޔާނެއްގައި ބުނެފައިވެ އެވެ.
ލޭ ހަދިޔާ ކުރުމުގެ މައިގަނޑު ޝަރުތުތައް
ލޭގެ ރިޒާވް މިހާ ބޮޑަށް ދަށްވީ، އަލަށް ލޭ ހަދިޔާ ކުރާ މީހުން މަދުވުމާއި ސްކޫލް ބަންދާ ދިމާވުމުން ގަވާއިދުން ލޭ ހަދިޔާ ކުރާ މީހުންނަށް ވެސް ލޭ ނުދެވުމާއި ރޯގާ އާއި އެހެނިހެން ބަލިތަކާ ހުރެ ލޭ ހަދިޔާ ކުރަން ޝަރުތު ހަމަނުވުމާއި ހޮސްޕިޓަލްތަކުގައި އެޑްމިޓް ކުރާ މީހުން ގިނަވުމުން ކަމަށް، ލޭ ހޯދުމުގެ މަސައްކަތް ކުރާ ލޭ އެޕް އިން އިސްނަގައިގެން ނެރުނު ބަޔާނުގައި އިތުރަށް ބުނެފައިވެ އެވެ.
އެ ބަޔާން ނެރުނީ، ލޭ އެޕުގެ އިތުރުން މޯލްޑިވްސް ތެލެސީމިއާ ސޮސައިޓީ އާއި އެހީ ޖަމިއްޔާ އާއި ބްލަޑް ޑޮނާސް މޯލްޑިވްސް އާއި ރިޕަބްލިކް އޮފް ޑޮނާސް އާއި އަތުކުރި އޮޅާލަމާ ޖަމިއްޔާއިން ގުޅިގެންނެވެ.
މި ހަބަރަށް ހެލްތު މިނިސްޓްރީގެ ބަހެއް ހޯދަން މިއަދު މަސައްކަތް ކުރި ނަމަވެސް ކޮމެންްޓެއް ލިބޭ ގޮތް ވަނީ ނުވެފަ އެވެ.
ހޮސްޕިޓަލްތަކުގައި އެޑްމިޓް ކުރާ މީހުން ގިނަވެފައި ވަނީ ރާއްޖޭގެ ވައިގެ ކޮލިޓީ ވަރަށް ބޮޑަށް ދަށްވުން ކަމަށް އެ ބަޔާނުގައި ބުނެފައިވެ އެވެ. ވައި ނުސާފު މިންވަރު ވަރަށް ބޮޑަށް ގޯސްވެގެން ސަރުކާރުން ވަނީ އިއްޔެ ވެސް އެލާޓެއް ނެރަފަ އެވެ.
މިދިޔަ ޑިސެމްބަރު މަހުން ފެށިގެން ރާއްޖެ ވައި ނުސާފުވާން ފެށީ އުތުރު އިންޑިއާގެ ހިރަފުސްގަނޑު ވަޔާއެކު ރާއްޖެ ސަރަހަށް ދަތުރު ކުރުމުންނެވެ. ކޮންމެ އަހަރަކު ވެސް މި ދުވަސްވަރު އިންޑިއާގެ ހިރަފުސްގަނޑު ރާއްޖެ އަށް ދަތުރު ކުރެ އެވެ.