ޤަޠަރުން ދިން ހަދިޔާއެއް ގަބޫލުކުރި މައްސަލައަކާ ގުޅިގެން ޔޫރަޕިއަން ޔޫނިއަންގެ އިސް އޮފިޝަލެއް މަގާމުން ވަކިކޮށްފިއެވެ. ޔޫރަޕިއަން ޔޫނިއަން (އީޔޫ) ކޮމިޝަނަރުން ބުރާސްފަތި ދުވަހު ނިންމާފައިވަނީ އީޔޫގެ އިސް އޮފިޝަލެއް ކަމަށްވާ ހެންރިކް ހޮލޮލޭއާ އެކު އޮތް ކޮންޓްރެކްޓް ހުއްޓާލުމަށެވެ. އޭނާ މަގާމުން ވަކިކުރެވުނީ ޤަޠަރުގެ ފަރާތުން ހަދިޔާ ގަބޫލުކުރިކަމުގެ ތުހުމަތުތަކާ ގުޅިގެން ކުރި ތަހުގީގަކަށް ފަހެވެ. އެނގިފައިވާ ގޮތުގައި ހޮލޮލޭއާ ގުޅޭގޮތުން ތަހުގީގު ފެށީ 2023 ވަނަ އަހަރު ޔޫރަޕިއަން އެންޓި-ފްރޯޑް އޮފީސް (އޮލާފްއިން) ހޯދި ސިއްރު މައުލޫމާތުތަކާ ގުޅިގެންނެވެ. އެ ތަހުގީގުން ހޮލޮލޭ، ޤަޠަރާ ގުޅުންހުރި ބޮޑު ވައިގެ ދަތުރުފަތުރުގެ އެއްބަސްވުމަކާ ބެހޭ ސިއްރު މައުލޫމާތުތައް ބަދަލުކޮށްފައިވާކަން ވަނީ ހާމަވެފައެވެ. ފްރާންސްގެ މީޑިއާ ލިބެރަސިޔޯން ރިޕޯޓުކޮށްފައިވާ ގޮތުގައި މީނާ ވަނީ ހަދިޔާތައް ވެސް ގަބޫލުކޮށްފައެވެ. https://sun.mv/215097 އީޔޫ ކޮމިޝަންގެ އެގްޒެކެޓިވް ވައިސް ޕްރެޒިޑެންޓް ހެނާ ވީރުކުނެން ކޮމިޝަނަރުންގެ ކޮލެޖުގެ ބައްދަލުވުމެއްގައި މި ނިންމުން އިއުލާންކުރެއްވިއިރު، އެއްވެސް އިސް އޮފިޝަލެއްގެ ނަން ހާމައެއް ނުކުރައްވައެވެ. ނަމަވެސް، އީޔޫގެ ދެ އޮފިޝަލެއް ވަނީ މި މީހާއަކީ ކުރިން މޮބިލިޓީ އެންޑް ޓްރާންސްޕޯޓްގެ ޑިރެކްޓަރު ޖެނެރަލްގެ މަގާމު ފުރުއްވި ހޮލޮލޭކަން ކަށަވަރުކޮށްދެއްވާފައެވެ. ވީރުކުނެން ވިދާޅުވީ، "މައްސަލަ ދިމާވި މުވައްޒަފު ވަނީ ގަވާއިދުތަކާ ޚިލާފުވެފައި" ކަމަށެވެ. އަދި، ކޮމިޝަންގެ ކޮލެޖުން ނިންމާފައިވަނީ "ގަވާއިދާ އެއްގޮތްވާ ގޮތަށް އެކަށީގެންވާ ފިޔަވަޅުތައް އަޅަން" ކަމަށާއި، އެއީ ހޮލޮލޭގެ ކޮންޓްރެކްޓް ފެބްރުއަރީ މަހު ހުއްޓާލުމަށް ނިންމި ނިންމުން ކަމަށް އެއް އޮފިޝަލް ވިދާޅުވިއެވެ. ކުރިން 2024 ވަނަ އަހަރު އޮލާފްއިން ލަފާދިނުމުން، ކޮމިޝަނުން ފެށި އަމިއްލަ ތަހުގީގުން މިދިޔަ އަހަރު ހުއްދަނެތި ހަދިޔާ ޤަބޫލުކުރުމާއި، މަޞްލަޙަތު ފުށުއެރުންތަކާއި، ސިއްރު ހިފެހެއްޓުމުގެ ގަވާއިދުތަކާ ޚިލާފުވެފައިވާކަން ވަނީ ހާމަވެފައެވެ. އީޔޫގެ އެގްޒެކެޓިވްގައި ގިނަ ދުވަސްތަކެއް ވަންދެން މަސައްކަތް ކުރައްވާފައިވާ ހޮލޮލޭ، އެންމެ ފަހުން ހުންނެވީ ޑިރެކްޓަރޭޓް-ޖެނެރަލް ފޯ އިންޓަނޭޝަނަލް ޕާޓްނަރޝިޕްސްގައި 'ހޯސް ކްލާސް އެޑްވައިޒަރެއްގެ މަގާމުގައެވެ. މި މަގާމަށް ބަދަލުކުރުމާ އެކު އޭނާގެ މުސާރަ ވެސް ވަނީ ކުޑަކޮށްފައެވެ. މި މައްސަލާގައި ފިޔަވަޅު ނޭޅުމުން ކޮމިޝަނަށް ވަނީ ފާޑުކިޔުންތައް އަމާޒުވެފައެވެ. ޚާއްސަކޮށް، 2024 ވަނަ އަހަރުގެ ފަހުކޮޅު ޔޫރަޕިއަން ޕްރޮސެކިއުޓަރުން ވަނީ ކޮރަޕްޝަންގެ ތުހުމަތުތަކާ ގުޅިގެން ކްރިމިނަލް ތަހުގީގެއް ފެށުމުގެ މައިދާންތައް ހުރިކަން ފާހަގަކޮށްފައެވެ. އީޔޫގެ އެއް އޮފިޝަލެއް ވިދާޅުވީ، ކޮމިޝަނަށް ކްރިމިނަލް ތަހުގީގެއް ހިނގަމުންދާކަން އެނގިފައިނުވާތީ އަމިއްލަ ތަހުގީގު ކުރިއަށް ގެންދެވުނު ކަމަށެވެ. ހޮލޮލޭއާއި އީޔޫ ކޮމިޝަނުން މިކަމާ ގުޅޭގޮތުން އަދި ރަސްމީ އެއްވެސް އެއްޗެއް ބުނެފައެއް ނުވެއެވެ.