މޯލްޑިވްސް ޕޮލިސް ސާވިސްގެ ކައުންޓަރ ނާކޮޓިކްސް އިންޓެލިޖެންސާއި ޑްރަގް އެންފޯސްމަންޓް ގުޅިގެން އެޕްރީލް 1 ވަނަދުވަހު މާލޭގައި ހިންގި އޮޕަރޭޝަނުގައި ގިނަ އަދަދެއްގެ މަސްތުވާތަކެއްޗާއެކު 6 މީހަކު ހައްޔަރުކޮށްފައިވާކަމަށް މޯލްޑިވްސް ޕޮލިސް ސާވިސް ބުނެފިއެވެ.
ފުލުހުން ބުނެފައިވާގޮތުން، މި އޮޕަރޭޝަނަކީ، މަސްތުވާތަކެއްޗާއި ބަނގުރަލުގެ ނުރައްކަލުން މުޖުތަމައު ސަލާމަތްކުރުމަށްޓަކައި ދިވެހި ފުލުހުންގެ ޚިދުމަތުން ކުރިއަށްގެންދާ ސިލްސިލާ އޮޕަރޭޝަނެކެވެ. އަދި މިމައްސަލައާއި ގުޅިގެން ހައްޔަރުކޮށްފައިވާ މީހުން ހައްޔަރުކޮށްފައިވަނީ، ކޯޓުއަމުރެއްގެ ދަށުން މާލޭގެ ދެތަނެއް ބަލައިފާސްކުރިއިރު ގިނަ އަދަދެއްގެ މަސްތުވާތަކެތި ފެނުމުން ކަމަށްވެސް ފުލުހުން ބުނެފައިވެއެވެ.