ރ. އަލިފުށީ "އައިރިސް"ގޭގައި އިއްޔެ ހިނގި އަލިފާނުގެ ހާދިސާގައި، އެ ގޭގައި ދިރިއުޅެމުން އައި ދެ މީހުންނަށް ވަގުތީ ބޯހިޔާވަހިކަން ދީފިއެވެ. 'ސަން'އަށް މައުލޫމާތުދެމުން ނޭޝަނަލް ޑިޒާސްޓާ މެނޭޖްމަންޓް އޮތޯރިޓީ (އެންޑީއެމްއޭ)އިން ބުނީ، އައިރިސް ގޭގައި ދިރިއުޅެމުން އައި ދެ މީހަކު ކަމަށާއި، ރަށު ކައުންސިލާ ގުޅިގެން ދެ މީހުންނަށްވެސް ވަގުތީ ބޯހިޔާވަހިކަން ފޯރުކޮށްދީފައިވާ ކަމަށެވެ. އިއްޔެ ހިނގި އަލިފާނުގެ ހާދިސާގައި އައިރިސް ގެއަށް ބޮޑެތި ގެއްލުންތަކެއްވެ، ބޭނުންނުކުރެވޭ ވަރަށް ވަނީ އަނދައިފައެވެ. އެގޮތުން އެ ގޭގައި ހުރި ހިފައި ގެންގުޅޭ ތަކެއްޗާއި ފަރުނީޗަރު ވަނީ އަނދައިފައެވެ. އަދި އަލިފާނުގެ އަސަރު އެހާ ބޮޑަށް ފެތުރިގެން ދިއުމުގެ ސަބަބުން އެ ގެއަކީ މިހާރު މީހުންނަށް ނޫޅެވޭ ފަދަ ހާލަތެއްގައި ހުރި ގެއެކެވެ. މި ހާދިސާގައި އެއްވެސް މީހެއްގެ ފުރާނައަށް ނުވަތަ ހަށިގަނޑަށް އަނިޔާއެއް ލިބިފައި ނުވެއެވެ. https://sun.mv/220094 ނަމަވެސް މި ހާދިސާ ހިނގަން މެދުވެރިވި ސަބަބު އަދި މިހާތަނަށް ދެނެގަނެވިފައެއް ނުވެއެވެ. މީގެ އިތުރުން، އަލިފާނުގެ ހޫނާއި ހުޅުގަނޑުގެ ސަބަބުން އައިރިސްގެޔާ އިންވެގެން ހުރި "ދޯޅަބު" ގޭގެ ފާރަށްވެސް ވަނީ އެކިވަރުގެ ގެއްލުންތައް ލިބިފައެވެ. ނަމަވެސް ދޯޅަބު ގެއަށް އަލިފާންގަނޑު ފެތުރުން ވަނީ ކޮންޓްރޯލް ކުރެވިފައެވެ. އެންޑީއެމްއޭއިން މިހާރު އަންނަނީ، އަލިފުށީ ކައުންސިލާ ގުޅިގެން، އެ އާއިލާއަށް ބޭނުންވާ އިންސާނީ އެހީތެރިކަން ފޯރުކޮށްދިނުމުގެ އިންތިޒާމުތައް ހަމަޖައްސަމުންނެވެ. އެންޑީއެމްއޭއިން އާންމުކޮށް އަމަލުކުރާ އުސޫލުގެ މަތިން، މިފަދަ ކާރިސާތަކުގައި އެންމެ ފުރަތަމަ އިސްކަންދެނީ މީހުންގެ ފުރާނަ ސަލާމަތްކުރުމަށާއި، އެމީހުންނަށް ބޭނުންވާ އަސާސީ ހައްގުތައް ކަށަވަރުކޮށްދިނުމަށެވެ. އަދި މިކަމުގައި ރަށު ކައުންސިލްގެ ދައުރު ވަރަށް ބޮޑަށް ފާހަގަކުރެވެއެވެ.