މާލޭ ކޮމާޝަލް ހާބަރުގެ ޓެރިފް ރޭޓުތައް ކަނޑައެޅުމުގައި މޯލްޑިވްސް ޕޯޓްސް ލިމިޓެޑް (އެމްޕީއެލް) އަށް ގެއްލުން ނުވާނެހެން ޓެރިފް ރޭޓުތައް ކަނޑައެޅުމަށް ރައްޔިތުންގެ މަޖިލީހުން މިއަދު ފާސްކޮށްފި އެވެ.
ވީ ކިހިނެއް؟ - ރައްޔިތުންގެ މަޖިލީހުގެ އިގުތިސާދީ ކޮމެޓީއަށް، ރާއްޖޭގެ ފްރެއިޓް ފޯވާޑިން ވިޔަފާރިތަކުގައި ހިނގާ ބައެއް ކަންކަމާ ގުޅިގެން ވިޔަފާރިތަކުން ހުށަހަޅާފައިވާ ޝަކުވާތަކާ ގުޅިގެން އެކަން ދިރާސާކޮށް ނިންމި ގޮތުގެ ރިޕޯޓު މިއަދު މަޖިލީހުގެ ތަޅުމުން ވަނީ ފާސްކޮށްފަ އެވެެ. އެގޮތުން:
އެ ރިޕޯޓް ފާސްވީ 40 މެންބަރުންގެ ވޯޓާއެކު
މަޖިލީހުން އެ މައްސަލަ ބަލަން ފެށީ 2020ގެ އޮގަސްޓުގައި
އެ ޝަކުވާތައް ކޮމެޓީ އިން ބަލާ ނިންމާފައިވަނީ މި އަހަރުގެ އޮގަސްޓު މަހު
ވިޔަފާރި ހަރަކާތް ރެޖިސްޓާ ކުރުމުގެ ގަވައިދުގައިވާ ފްރެއިޓް ފޯވާޑިންގެ ހިދުމަތްތަކާ ބެހޭ ބައިގައި ބަޔާންކޮށްފައިވާ ކޮންޓުރޯލު އަގުތަކަށްވުރެ ބޮޑުކޮށް ބައެއް ފަރާތްތަކުން އަގު ނަގާކަމުގެ ހަތަރު ޝަކުވާއެއް އިކޮނޮމިކް މިނިސްޓްރީ އަށް ހުށަހަޅާފައިވާ ކަމަށް އެ ރިޕޯޓުގައި ފާހަގަކޮށްފައިވެ އެވެ
އެ ގަވައިދަށް އަމަލު ކުރަން ފެށި ފަހުން ފްރެއިޓް ފޯވާޑިންގެ ދާއިރާގައި ދިމާވާ ގިނަ މައްސަލަތަކަށް ހައްލު ލިބިފައިވީ ނަމަވެސް، ހިދުމަތްދޭ ބައެއް ކުންފުނިތަކުން އިތުރަށް ފައިސާ ނަގާކަމުގެ ޝަކުވާ ކުންފުނިތަކުން ކޮމެޓީ އަށް ވެސް ހުށަހަޅާފައިވާ ކަމަށް ބުނެފައި ވެއެވެ.
މައްސަލަ ހައްލުކުރުމަށް ކޮމިޓީން ހުށަހަޅާފައިވާ ކަންކަން:
ބައެއް ފްރައިޓް ފޯވާޑިން ކުންފުނިތަކުން ގަވައިދާ ހިލާފަށް ފީތައް ނަގާތީ، އެކަމަށް ހޭލުންތެރިކުރުމަށް ޓްރާންސްޕޯޓު އޮތޯރިޓީ އަށާއި އިކޮނޮމިކް މިނިސްޓްރީ އަށް ލަފާ ދިނުން
ޝިޕިން އެޖެންސީއާ ބެހޭ ގަވައިދާއި ފްރެއިޓް ފޯވާޑިން ހިދުމަތްތަކާ ބެހޭ ގަވައިދުގައި ފުށުއެރުންތަކެއް ހުރި ކަމަށް ޓްރާންސްޕޯޓު އޮތޯރިޓީ އަށް ފާހަގަވެފައި ވާތީ، އެ ފުށުއެރުންތައް އިސްލާހު ކުރުމަށް ލަފާ ދިނުން
އެމްޕީއެލް އިން މާލޭ ވިޔަފާރި ބަނދަރުން ނަގާ ފީތައް ގެއްލުން ނުވާހެނެން ރިވައިސްކުރުމަށް ލަފާދިނުން
ގުޅުން ހުރި މައްސަލައެއް - އެމްޕީއެލް އަށް ދައްކަން ޖެހޭ ކަމަށް ބުނެ ތަފާތު ނަންނަމުގައި ފްރައިޓް ފޯވާޑިން އެޖެންސީތަކުން ފީތައް ނަގަމުން ދާތީ އެމްޕީއެލް އިން ވަނީ އެކުންފުނިން ފޯރުކޮށްދޭ ހިދުމަތްތަކުން ނަގާ ފީތައް އެކި ފަހަރު މަތިން އާންމު ކޮށްފަ އެވެ. އިތުރު ފީތައް ނަގާ މައްސަލާގައި އެމްޕީއެލް އިން މީގެ ކުރިން ބުނީ:
އޭޕީސީއާރު، ޕޯޓް ކޮންޖެޝަން ޗާޖް، ޑީސީއެޗްޓީ އަދި އިކުއިޕްމަންޓް އިމްބެލެންސް ޗާޖްގެ ނަމުގައި ފީ ނެގިއަސް އެއީ އެމްޕީއެލުން ނަގާ ފީއެއް ނޫން ކަމަށް
އެނގުން މުހިއްމު - ކޮންޓްރޯލް ކޮށްފައިވާ އަގަށްވުރެ ބޮޑުކޮށް ގަވާއިދާ ހިލާފަށް ސީދާ ގޮތުންނާއި ނުސީދާ ގޮތުން އެއްވެސް ކަމަކަށް ކޮންސައިނީގެ އަތުން އެއްވެސް ފީއެއް ނަގައިފި ނަމަ ޖޫރިމަނާ ކުރެވޭނެ ކަމަށް ޝިޕިން އެޖެންސީއާ ބެހޭ ގަވައިދުގައި ބުނެފައިވެ އެވެ. އެގޮތުން ޖޫރިމަނާތައް ކަނޑައަޅާފައިވާ ގޮތަކީ:
ފުރަތަމަ ފަހަރަށް 1000 ރުފިޔާ 
ދެވަނަ ފަހަރަށް 10،000 ރުފިޔާ 
ދެ ފަހަރަށް ވުރެ އިތުރުވެއްޖެ ނަމަ، އިތުރުވާ ކޮންމެ ފަހަރަކަށް 100،000 ރުފިޔާ