ގެއްލުމުގެ ބަދަލު ނަގައިދިނުމަށް އެކުލަވާލި އުސޫލުގެ ދަށުން މިހާތަނަށް ސަރުކާރުން އެއްވެސް އަމިއްލަ ކުންފުންޏަކަށް ބަދަލު ދީފައި ނުވާ ކަމަށް ވިދާޅުވެ ރައީސް އޮފީހުގެ ތަރުޖަމާނު މިއުވާން މުހައްމަދު އިތުރުފުޅު ހައްދަވައިފި އެވެ.
ކޯޓުން ބޭރުން ބަދަލު ދިނުމަށް އުސޫލެއް އެކުލަވާލާފައިވާއިރު، ފާއިތުވީ ހަތަރު މަހުގެ ތެރޭގައި ބަދަލުގެ ގޮތުގައި އެކި ފަރާތްތަކަށް ދިން 101 މިލިއަނަކީ ކޯޓުން ބޭރުން ދިން ބަދަލު ކަން ފާހަގަކޮށްލެވެ އެވެ. އެހެންކަމުން މިހާތަނަށް އެ އުސޫލުގެ ދަށުން ކުންފުނިތަކަށް ފައިސާގެ އެއްވެސް ބަދަލެއް ނުދޭކަމަށް މިއުވާން ވިދާޅުވި ނަމަވެސް ފައިސާގެ ބަދަލު ދިންކަން ފިނޭންސް މިނިސްޓްރީން އެނގެ އެވެ.
އެގޮތުން މައުލޫމާތު ހޯދައި ލިބިގަތުމުގެ ހައްގުގެ ގާނޫނުގެ ދަށުން، ސަރުކާރުން ބަދަލު ދިން ކުންފުނިތަކުގެ ތަފްސީލު ހޯދަން ނޫހަކުން އެދުމުން ފިނޭންސް މިނިސްޓްރީން ވަނީ އެ މައުލޫމާތު ހާމަކުރަން ދެކޮޅު ހަދާފަ އެވެ. އެ މިނިސްޓްރީން ބުނީ އެ މައުލޫމާތު ހާމަ ނުކުރެވެނީ އެފަރާތްތަކާއެކު ވެފައިވާ އެއްބަސްވުމުގެ ދަށުން އެ މައުލޫމާތެއް އެހެން ފަރާތަކާ ހިއްސާ ނުކުރެވޭނެތީ ކަމަށެވެ.
ރައީސް އިބްރާހީމް މުހައްމަދު ސޯލިހުގެ ސަރުކާރުގެ ފުރަތަމަ އަހަރު ވެސް ބަދަލުގެ ގޮތުގައި އެކި ފަރާތްތަކަށް 1.5 ބިލިއަން ރުފިޔާ ދީފައިވެ އެވެ.