މެންޗެސްޓާ (އޮގަސްޓް 29) - އިނގިރޭސި ހަތަރު ވަނަ ޑިވިޝަނުގެ ޓީމެއް ކަމަށްވާ ގްރިމްސްބީ ޓައުން އަތުން ބަލިވެ، ވަޒީފާގެ ޕްރެޝަރު ބޮޑުވެފައިވާ މެންޗެސްޓާ ޔުނައިޓެޑްގެ ކޯޗުގެ މަގާމުގައި ހުރި، ރުބެން އަމޮރިމް އަށް އެ ކްލަބްގެ ވެރިންގެ އިތުބާރު އެބައޮތް ކަމަށް ރިޕޯޓްތައް ބުނެފި އެވެ.
މިދިޔަ ނޮވެމްބަރު މަހު، ސްޕޯޓިން ލިޒްބަން ދޫކޮށް، ޔުނައިޓެޑާ ހަވާލުވި، 40 އަހަރުގެ އަމޮރިމްއާ އެކު އެ ޓީމުން މިދިޔަ ސީޒަނުގައި އިނގިރޭސި ޕްރިމިއާ ލީގު ނިންމާލީ 15 ވަނައިގަ އެވެ. މިއީ، އެ ކްލަބްގެ ތާރީހުގައި ލީގުގައި އެންމެ ދަށް ސީޒަނެވެ. އަނެއްކޮޅުން، ޔުނައިޓެޑުން ތަށްޓެއް ހޯދައި، އަންނަ ސީޒަނުގެ ޗެމްޕިއަންސް ލީގަށް ކޮލިފައިވާން ފުރުސަތު އޮތް ޔޫރޮޕާ ލީގުގެ ފައިނަލުގައި ޓޮޓެންހަމް ހޮޓްސްޕާސް އަތުން ބަލިވީ އެވެ.
އާ ސީޒަނަށް ޓީމު ވަރުގަދަ ކުރަން 200 މިލިއަން ޑޮލަރަށް ވުރެ އިތުރަށް ހަރަދުކުރި ޔުނައިޓެޑުން މި ފަހަރުގެ އިނގިރޭސި ޕްރިމިއާ ލީގުގެ ސީޒަނުގައި ޓާގެޓްކުރާނީ ޔޫރަޕްގެ ފުޓްބޯޅަ މުބާރާތުގެ ޖާގައެއް ހޯދުމަށް ކަމަށް އަމޮރިމް ވަނީ ބުނެފަ އެވެ. އަދި، މި ސީޒަނުގައި ޔޫރަޕްގެ މުބާރާތެއް ކުޅެން ޔުނައިޓެޑް ތައްޔާރެއް ނޫންކަމަށް އަމޮރިމް ބުނެފައިވާއިރު، ސީޒަނުގައި ކުޅުނު ފުރަތަމަ ތިން މެޗުން ވެސް މޮޅެއް ނުލިބެ އެވެ. އިނގިރޭސި ޕްރިމިއާ ލީގުގައި އާސެނަލް އަތުން ބަލިވެ، ފުލަމާ އެއްވަރުވިއިރު، ލީގު ކަޕުން ކެޓީ ހަތަރު ވަނަ ޑިވިޝަނުގެ ގްރިމްސްބީ އަތުންނެވެ.
ގްރިމްސްބީ އަތުން ބަލިވި މެޗަށް ފަހު އަމޮރިމް ދިން އިންޓަވިއުގައި އެ ކްލަބްގެ ކުޅުންތެރިން ކުރި މަސައްކަތާއި ކުރި ކަންކަމަށް ފާޑުކިޔާފައިވާއިރު، ސަޕޯޓަރުންގެ ކިބައިން އެ ނަތީޖާ އަށް މާފަށް ވަނީ އެދިފަ އެވެ.
އިނގިރޭސި މީޑިއާތަކުން ވަނީ މި ނަތީޖާތަކާ އެކު، އަމޮރިމް އަށް ޔުނައިޓެޑްގެ ކޯޗުކަމުގެ ވަޒީފާ ގެއްލުމުގެ ފުރުސަތު ބޮޑުވެފައިވާ ކަމަށް ރިޕޯޓްކޮށްފަ އެވެ. އެކަމަކު، އިނގިރޭސި މީޑިއާ އަކަށް ޔުނައިޓެޑްގެ ސީނިއާ އޮފިޝަަލަކު ބުނެފައިވަނީ، އަމޮރިމް އަށް އަދިވެސް މެނޭޖްމަންޓުގެ އިތުބާރު އެބައޮތް ކަމަށެވެ.