މިދިޔަ އަހަރުގެ ޖުލައި މަހު ތެރޭ ދަރުމާ ޕްރޮޑަކްޝަންސްއާއި ސިކްޔާ އެންޓަޓެއިންމަންޓް ގުޅިގެން ގެނެސްދިން ފިލްމު "ކިލް"ގެ ޑައިރެކްޓަރު ނިކިލް ނާގޭޝް ބަޓް ހޮލީވުޑްގެ ފިލްމެއް އުފައްދަން ތައްޔާރުވަމުން އަންނަ ކަމަށް ރިޕޯޓުތައް ބުނެފިއެވެ. ފިލްމީ ޚަބަރުތައް ބުނާގޮތުން ނިކިލް ގެނެސްދޭ ހޮލީވުޑް ފިލްމަކީ މަޝްހޫރު ޔުނިވާސަލް ސްޓޫޑިއޯސްއާ ގުޅިގެން އުފައްދާ ފިލްމެކެވެ. ފިލްމު "ކިލް"އަށް ފަހު ބެލުންތެރިން ނިކިލްގެ ފިލްމަކަށް ދިގު އިންތިޒާރެއް ކުރަމުން އަންނައިރު ހޮލީވުޑްގެ ސްޓޫޑިއޯއަކާ ގުޅިގެން ނިކިލް ގެނެސްދޭ އާ ފިލްމުގައި ހޮލީވުޑްގެ ތަރިން ވެސް ހިމެނޭ ކަމަށް ރިޕޯޓުތައް ބުނެއެވެ. ފިލްމީ ޚަބަރުތައް ގެނެސްދޭ ބޮލީވުޑްހަންގާމާގައި ބުނެފައިވާ ގޮތުގައި މި ފިލްމުގައި ހިމެނޭނީ ހޮލީވުޑް ޓޮޕް ތަރިންނެވެ. ޑައިރެކްޓަރު ނިކިލްގެ ފިލްމު "ކިލް"ގެ މަންޒަރެއް--ފޮޓޯ/ބޮލީވުޑްހަންގާމާ ހޮލީވުޑްގެ މަޝްހޫރު ޔުނިވާސަލް ސްޓޫޑިއޯގެ އިސްވެރިންނާ އެކު ނިކިލް ވަނީ އަލަށް ފަށާ ފިލްމާ ގުޅޭގޮތުން މަޝްވަރާ ބައްދަލުވުންތަކެއް ވެސް ކުރިއަށްގެންގޮސްފައެވެ. މިއީ ނިކިލްގެ ކެރިއަރުގައި އޭނާ އުފައްދާ އެންމެ ވަރުގަދަ އެކްޝަން ފިލްމަށްވާނެ ކަމަށާއި މި ފިލްމުގެ ސަބަބުން ބައިނަލްއަގުވާމީ ޗާޓުތަކަށް ނިކިލްގެ ނަން އަރަން މާގިނަ ދުވަހެއް ނުވާނެ ކަމަށް ރިޕޯޓުތައް ބުނެއެވެ. މި ފިލްމަށް ނިކިލް ގެންނަން ބޭނުންވާ ހޮލީވުޑްގެ ތަރިންގެ ނަންތައް މިހާތަނަށް އިއުލާނުކޮށްފައިނުވާއިރު ފިލްމުގެ މަސައްކަތް އަންނަ އަހަރު ފަށާނެ ކަމަށް ރިޕޯޓުތައް ބުނެއެވެ. ނިކިލް މިހާރު މަސައްކަތް ކުރަމުން އަންނަނީ ޑައިރެކްޓަރު މުރާދު ހެތާނީއާ އެކު ގެނެސްދޭ ފިލްމެއްގައެވެ. މި ފިލްމުގެ މަސައްކަތް އޮތީ ޕްރީ-ޕްރޮޑަކްޝަން މަރުހަލާގައެވެ. ނިކިލް އެންމެ ފަހުން ގެނެސްދިން ފިލްމުތަކުގެ ތެރޭ 2023 ވަނަ އަހަރު ރިލީޒްކުރި ފިލްމު "އަޕޫރުވާ" ވެސް ހިމެނެއެވެ. މި ފިލްމުގެ ލީޑް ރޯލް ކުޅެފައިވަނީ ބަތަލާ ތާރާ ސުތާރިއާއެވެ.