މާޒިޔާ ސްޕޯޓްސް އެންޑް ރެކްރިއޭޝަނުން 2014 ވަނަ އަހަރު ފުޓްބޯޅަ ސީޒަން ފަށައި، ކުއްލިިއަކަށް އެ ޓީމުގެ ކޯޗުގެ މަގާމު ބަދަލުކުރަން ޖެހުނެވެ. ރާއްޖޭގެ ފުޓްބޯޅައިގައި އެންމެ ކާމިޔާބު ކޯޗު، އަލީ ސުޒޭން، މާޒިޔާއާ ހަވާލުވެ، އެ ޓީމާ އެކު، ރަނގަޅު މަސައްކަތްތަކެއް ކުރުމަށް ބަރޯސާވާނެ، ޒުވާން ކުޅުންތެރިންތަކަކަށް ބެލިއިރު، ލޮލުގައި އަޅައިގަތް އެއް ކުޅުންތެރިއަކީ، ކްލަން ވެލެންސިއާ ދޫކޮށް މާޒިޔާ އަށް ބަދަލުވި މުހައްމަދު އިރުފާން (އިރޭ) އެވެ.
ރާއްޖޭގެ 23 އަހަރުން ދަށުގެ ގައުމީ ޓީމުގެ ކެޕްޓަންކަން ވެސް ކޮށްފައިވާ އިރޭ، އަށް ދުވަހު ނޫސް، "ހަވީރު" އިން ދިން އަހަރުގެ އެންމެ އުންމީދީ ފުޓްބޯޅަ ކުޅުންތެރިޔާގެ މަގާމު ލިބިފައިވަނީ، ސުޒޭންގެ ކޯޗުކަމުގައި މާޒިޔާގައި، ސީނިއާ ފުޓްބޯޅަ ކެރިއަރުގެ ވަރުގަދަ ބިންގަލެއް އެޅި ސީޒަނުގައި ދެއްކި ކުޅުމުގެ ސަބަބުންނެވެ. އޭގެ ސަބަބުން، ތަފާތު އެކި ކޯޗުންގެ ބެލުމުގެ ދަށުން ވެސް މާޒިޔާ އަށް ކުޅެ، ހަތަރު އަހަރު އެ ޓީމުގެ ވައިސް ކެޕްޓަނެއްގެ ގޮތުގައި، ހުރެ ކެޕްޓަން ބޭންޑް އަޅައިގެން ކުޅެފި އެވެ. ރާއްޖޭގެ ފުޓްބޯޅައިގައި ހޯދޭނެ ހުރިހާ ކާމިޔާބެއް ހޯދައިފި އެވެ.
މާޒިޔާ ދޫކޮށް ނިއު އަށް ބަދަލުވުމަށް ފަހު، އިރޭ، 31، "އަދަދު ސްޕޯޓްސް" އަށް ބުނީ، އަބަދުވެސް މާޒިޔާ އަށް އޭނާގެ ހިތުގައި އޮންނާނީ އިހުތިރާމާއި ޝުކުރު ކަމަށެވެ. ފަހުގެ ތާރީހެއްގައި، ރާއްޖޭގެ ފުރަތަމަ ޑިވިޝަނުގެ ކްލަަބަކަށް 12 އަހަރު ކުޅުމަކީ މަދު ކުޅުންތެރިއަކަށް ކުރެވިފައިވާ ކަމެކެވެ.
"މާޒިޔާގައި 12 އަހަރު ހޭދަކުރިއިރު، ހަތަރު އަހަރު ކެޕްޓަން ބޭންޑް އަޅައިގެން ކުޅެ، ފުޓްބޯޅައިގައި ހޯދޭނެ ހުރިހާ ކާމިޔާބެއް ރާއްޖޭން ލިބިއްޖެ، އެހެންވީމަ، މާޒިޔާ އަށް އަބަދުވެސް އެ ކަންކަމަށް ޝުކުރު ކުރަން، ހާއްސަކޮށް ކޮކީ (މާޒިޔާގެ ސީއީއޯ ހުސެއިން ޝާފިއު) އަށް،" 2018 ވަަނަ އަހަރުގެ ސާފް ޗެމްޕިއަންޝިޕް ކާމިޔާބުކުރި ޓީމުގައި ހިމެނޭ އިރޭ ބުންޏެވެ.
ނިއު ރޭޑިއަންޓްގެ ކޮންޓްރެކްޓްގައި ސޮއިކުރުމަށް ފަހު އިރޭ ފޮޓޯ އަކަށް ހުއްޓިލައިގެން.---- ފޮޓޯ: އަތޫފް އާތިފް / އަދަދު ސްޕޯޓްސް
ރާއްޖޭގެ އެންމެ ކާމިޔާބު ކްލަބް، ނިއު ރޭޑިއަންޓް ސްޕޯޓްސް ކްލަބަށް އެއް އަހަރުގެ ކޮންޓްރެކްޓެއްގައި ބަދަލުވި އިރޭ ބުނީ، ނިއުއާ ގުޅެން ނިންމީ ކެރިއަރަށް މި ވަގުތު ވިސްނައިފައި، އެންމެ ރަނގަޅު ގޮތް ކަމަށް ފެންނާތީ އާ ޗެލެންޖެއް ނެގުމަށް ކަމަށެވެ.
"އުންމީދަކީ ނިއުގައި ވެސް ކާމިޔާބީތަކެއް ހޯދުން، އަަބަދު ވެސް މަސައްކަތްކުރަނީ، އެ ކުޅޭ ޓީމަކަށް މުހިންމު ކުޅުންތެރިއަކަށް ވެގެން ކުރިއަށްދެވޭތޯ،" ތ. ތިމަރަފުށްޓަށް އުފަން، އިރޭ ބުންޏެވެ.
ނިއު އަށް ބަދަލުވިއިރު، އެ ޓީމުގެ ކޯޗަކަށް ސުޒޭން ހުރުމަކީ، އިރޭ އަށް އޮތް ހިތްހަމަޖެހުމެކެވެ. އޭނާގެ ކެރިއަރުގައި އެންމެ ކާމިޔާބު ދުވަސްތައް ހޭދަކޮށް، އެންމެ ގިނަ ކަންކަން ދަސްވީ ސުޒޭންގެ ފަރާތުން ކަމަށް އިރޭ ވަނީ ފާހަގަކޮށްފަ އެވެ.
ޑިފެންސިވް މިޑްފީލްޑަރެއްގެ މަގާމުގައި ކުޅުނު ކަމުގައި ވިޔަސް، އިމަޖެންސީ ހާލަތްތަކުގައި، މާޒިޔާގައި އިރޭ ވަނީ، ސެންޓްރަލް ޑިފެންޑަރަކަށް ވެސް ކުޅެފަ އެވެ. އިރޭ، މާޒިޔާ އަށް ކުޅުނުއިރު، އެ ޓީމަށް ވަނީ، ތަފާތު ނުވަ ފުލް ޓައިމް ކޯޗުން މަސައްކަތް ކޮށްފަ އެވެ. ކޮންމެ ކޯޗެއްގެ ޕްލޭނުގައި ވެސް މާޒިޔާ ޓީމުން ހޯދި ކާމިޔާބީތަކުގައި އިރޭގެ ހިއްސާ އެބައޮތެވެ.
އިރޭ ވަނީ މާޒިޔާގައި ހުރެ ފަސް ފަހަރު، ދިވެހި ޕްރިމިއާ ލީގާއި ޗެރިޓީ ޝީލްޑް، ދެ ފަހަރު އެފްއޭ ކަޕާއި ޕްރެޒިޑެންޓްސް ކަޕް އަދި އެއް ފަަހަރު މާލޭ ލީގާއި ލީގު ކަޕް ޗެމްޕިއަންކަން ހޯދައިފަ އެވެ. އަދި، 2015 ވަަނަ އަހަރު މާލޭގައި ކުޅުނު ޕީޕަލްސް ކަޕްގެ ރަނަަރަޕް ހޯދުމަކީ، ބައިނަލްއަގުވާމީ ލެވަލްގައި އިރޭ މާޒިޔާގައި ހުރެ ހާސިލްކުރި ކާމިޔާބީ އެކެވެ.