ﷲ ތަޢާލާ ލަޢްނަތް ލައްވަވާފައިވާ ޝައިޠޯނާ މީސްތަކުންނަށް ވަސްވާސްދޭނެކަމާއި ދޭކަން ކޮންމެ މުސްލިމަކުވެސް ޤަބޫލުކުރާނެއެވެ. ދެން ބައެއް މީހުން ކުރާ ސުވާލަކީ ވަސްވާސްދެނީ ކިހިނަކުންހެއްޔެވެ؟  
ޝައިޠޯނާ ވަސްވާސްދޭ ގޮތްތައް ވަރަށް ގިނައެވެ. މިޘާލަކަށް ތިބާއަށް ރީތި މީހަކު ލޮލަށް ދައްކުވައިގެން އޭނާ އާއި ގުޅުން ހިންގަން ޝައުޤުވެރިކުރުވައިފާނެއެވެ. ކަންފަތަށް އަޑެއް އިއްވައިގެންވެސް ފާފަކުރަން ޝައުޤުވެރިކުރުވައިފާނެއެވެ. އެންމެ ގިނައިން ވަސްވާސްދޭނީ ހިތަށެވެ. ހިތްލައްވައި ބުއްދިއަށް މެސެޖް ފޮނުވައިގެންނެވެ.  
ވީމާ އަހުރެމެން މުސްލިމުން އަބަދުވެސް ތިބެން ޖެހޭނީ މިފަދަ ހުރިހާ ކަންކަމަށް ވަރަށް ބޮޑަށް ފާރަވެރިވެގެންނެވެ. ޝައިޠޯނާގެ ވަސްވާސްތަކަށް ސަމާލުކަންދީގެންނެވެ. އެކަމަށްޓަކައި ފުރަތަމަވެސް ކުރަން އޮތް ޢަމަލަކީ ނަމާދުތައް ބަރާބަރަށް ކުރަމުން ގެންދިއުމެވެ. ފަރުޟު ނަމާދުތަކާއި ސުންނަތް ނަމާދުތައްކުރުމެވެ.  
ފަރުޟް ނަމާދުތަކާއި ސުންނަތް ނަމާދުތައްކޮށް އަދި ޤުރްއާން ކިޔަވާނަމަ އެމީހަކާއި ޝައިޠޯނުންތަކަށް ކައިރިވެސް ނުވެވޭކަމުގެ ހެކިތައް މިހާރުވެސް މިދަނީ ފެންނަމުންނެވެ. ދުނިޔޭގެ ބޮޑެތި ސިޙުރުވެރިންގެ އިޢުތިރާފްތަކުންނެވެ. އެމީހުން ބުނަމުން އެގެންދަނީ އެމީހުން ސިޙުރުހަދާފައި ފޮނުވާ އެންމެ ނުރައްކައުތެރި ޝައިޠޯނުންނަށްވެސް އެމީހުންގެ މައްޗަށް ބާރު ނުފޯރުވޭކަމަށެވެ. ވަކިވަރަކަށްވުރެ ކައިރިވެސް ނުވެވޭ ކަމަށެވެ. އަދި ބައެއް ޙާލަތްތަކުގައި ނުވެސް ފެންނަކަމަށެވެ.  
ވީމާ ވަސްވާސްދޭ ޝައިޠޯނުންތަކާއި ސިޙުރު ޖައްސުވަން އަންނަ އަންނަ ޝައިޠޯނުންތަކުގެ ކިބައިން ރައްކައުތެރިކަން ލިބިގަންނަންވެސް ކުރަން އެންމެ މުހިންމު ކަމަކީ ނަމާދުތައް ކުރުމާއި ޤުރްއާން ކިޔެވުމެވެ. ޛިކުރުތައް ކިޔަވަން ސަމާލުކަން ދިނުމެވެ.
 
- އިސްލާމީ ތިލަފަތުގެ ދަރުސަކުން