އިންޑިއާގެ ކާމިޔާބު އެކްޓަރު އަކްޝޭ ކުމާރަކީ ވަރަށް ހުނަރުވެރި ފިލްމީ ތަރިއެއް ކަމަށާއި ނަމަވެސް ފިލްމު އިންޑަސްޓްރީގެ ގިނަ ބަޔަކު އެކަން ޤަބޫލުނުކުރާ ކަމަށް ފިލްމު ޕްރޮޑިއުސަރު އަދި ޑައިރެކްޓަރު ވިޕުލް ޝާހު ބުނެފިއެވެ. ދާދި ފަހުން މީޑިއާއަށް ދިން އިންޓަވިއުއެއްގައި ޑައިރެކްޓަރު ވިޕުލް ބުނެފައިވަނީ، އަކްޝޭއަށް ލިބިފައި ހުރި އެކްޓިން ހުނަރުގެ މޮޅުކަން ޚުދު އެކްޓަރަށް ވެސް ވަޒަންކޮށްނުލެވޭ ކަމަށެވެ. އަކްޝޭއާ އެކު ހަތަރު ފިލްމެއްގައި މަސައްކަތްކުރުމުގެ ފުރުސަތު ވިޕުލްއަށް ލިބުނު ކަމަށާއި އެއީ ކިހާ ކުޅަދާނަ އެކްޓަރެއްކަން އެނގުނީ އެ ދުވަސްވަރު ކަމަށް ވިޕުލް ވަނީ ބުނެފައެވެ. ބައެއް ފިލްމު ކްރިޓިކުން އަކްޝޭ ކުޅެފައިވާ ފިލްމުތަކަށް ފާޑުކިޔާފައިވީ ނަމަވެސް އެއީ ވަރަށް އުފެއްދުންތެރި މޮޅު ފިލްމުތަކެއް ސްކްރީނަށް ގެނެސްދިނުމުގެ ގާބިލުކަން ހުރި ތަރިއެއްގެ ގޮތުގައި ވިޕުލް ވަނީ ސިފަކޮށްފައެވެ. އަކްޝޭ ކުމާރު ފިލްމު ޑައިރެކްޓަރު ވިޕުލް ޝާހްއާ އެކު--ފޮޓޯ/ފިލްމުފެއަ ގިނަ ފިލްމު ޕްރޮޑިއުސަރުން އަކްޝޭ ސިފަކުރަނީ އެކްޝަން ހީރޯއެއްގެ ގޮތުގައި ކަމަށާއި އެހެންވެ އަކްޝޭ ފަހުން ބޭނުންވީ ކޮމެޑީ ފިލްމުތަކުން ފުރުސަތު ހޯދުމަށް ކަމަށް ބަތަލާ ޝެފާލީ ޝާހުގެ ފިރިމީހާ ވިޕުލް ވަނީ ބުނެފައެވެ. އެހެންނަމަވެސް، ކޮމެޑީ ޖޯންރާގެ ފިލްމުތަކަށްވުރެ ބޮޑަށް މުޖުތަމައުން ފެންނަ މައްސަލަތަކާ ގުޅުންހުރި ފިލްމުތައް އަދި އިންޑިއާގެ ތާރީޚާ ގުޅުންހުރި ފިލްމުތައް ސްކްރީނަށް ގެނެސްދިނުމަށް އަކްޝޭއަށް ވުރެ ވަކި އިތުރަށް މޮޅު އެކްޓަރަކު އިންޑަސްޓްރީގައި ނެތް ކަމަށް ވިޕުލް ބުނެފައިވެއެވެ. ވިޕުލް، އަކްޝޭއާ އެކު ކޮމެޑީ އަދި ތުރިލާ ފިލްމެއްގައި ވެސް މަސައްކަތްކުރިއިރު އެ ދެ ކެރެކްޓާއަށް އަކްޝޭ ބަދަލުވަނީ ވަރަށް އަވަސް އަވަހަށް މާބޮޑު ތައްޔާރީތަކެއްނުވެ ކަމަށް ޑައިރެކްޓަރު ވިޕުލް ވަނީ ބުނެފައެވެ. އެ ހުނަރު ލިބޭނީ ވަރަށް މޮޅު އެކްޓަރަކަށް ކަމަށާއި އެއީ ވަރަށް މަދުން ނޫނީ ފިލްމީ ތަރިންގެ ފަރާތުން ނުފެންނަ ކަންކަން ކަމަށް ވިޕުލް ވަނީ ބުނެފައެވެ. އަކްޝޭ އެންމެ ފަހުން ބެލުންތެރިންނަށް ފެނިފައިވަނީ މި އަހަރުގެ ޖޫން މަހު ރިލީޒްކުރި ފިލްމު "ހައުސްފުލް 5"އިންނެވެ. މި އަހަރު ރިލީޒްކުރި އަކްޝޭގެ ފާހަގަކޮށްލެވޭ ފިލްމުތަކުގެ ތެރޭ "ކޭސަރީ ޗެޕްޓަ 2" އަދި "ސްކައިފޯސް" ހިމެނެއެވެ.