އީރާނާ ދެކޮޅަށް އެމެރިކާއާއި އިސްރާއީލުން ދެމުންދާ އަސްކަރީ ހަމަލާތަކާ ގުޅިގެން އީރާނުން, މެދުއިރުމަތިން ތެޔޮ ސަޕްލައި ކުރަން ބޭނުންކުރާ މުހިންމު މަގެއް ކަމަށްވާ ހޮރްމުޒް ކަނޑުއޮޅި ބަންދުކޮށްފައި ބާއްވައިފިނަމަ ތެޔޮ ފީފާއެއްގެ އަގު 150 ޑޮލަރަށް އުފުލިދާނެ ކަމަށް ހަކަތައާ ބެހޭ އިގްތިސާދީ މާހިރު އެޑް ހިރްސް ވިދާޅުވެއްޖެއެވެ. ޔުނިވާސިޓީ އޮފް ހުސްޓަންގެ ލެކްޗަރާކަން ކުރައްވާ ހިރްސް ވިދާޅުވިގޮތުގައި ހޮރްމުޒް ކަނޑުއޮޅި މެދުވެރިކޮށް އުފުލާ ތެލުގެ ދެބައިކުޅަ އެއްބައި ހުއްޓުވައި އެމެރިކާގެ ޓޭންކަރުތަކަށްވެސް ކަނޑުއޮޅި ބޭނުން ނުކުރެވިއްޖެނަމަ، ވަކި މުއްދަތަކަށް ތެލުގެ އަގު އުފުލި ތެޔޮ ފީފާއެއްގެ އަގު 150 ޑޮލަަރަށް އުފުލިދާނެއެވެ. "އެލްއެންޖީ މާކެޓުން އޭގެ އަސަރު މިހާރުވެސް ފެނިއްޖެ، ފުރަތަމަ ދުވަހު އަގުތައް 40 ޕަސެންޓަށް އިތުރުވެ، ޔޫރަޕްގެ ގައުމުތަކުގައި ގުދުރަތީ ގޭހުގެ އަގު ހޯމަ-އަންގާރަ ދުވަހުގެ ތެރޭގައި ގާތްގަނޑަކަށް ދެގުނައަށް ވަނީ އިތުރުވެފައި," އޭނާ ވިދާޅުވިއެވެ. https://www.sun.mv/218725 "ޑީސަލްގެ އަގުތައް ވެސް ނިސްބަތުން އުފުލުނުތަން އަޅުގަނޑުމެންނަށް ފެނިފައިވޭ،" ގޭހަށް ބަރޯސާވެފައިވާ ބައެއް ގައުމުތަކުން ޕެޓްރޯލިއަމް ގަންނަން ފެށުމުން އެމެރިކާގެ ބައެއް ސްޓޭޓްތަކުގެ ކުރިއަށް ހުރި އޯޑަރުތަކަށް އަސަރުކޮށްފައިވާކަން ފާހަގަކުރައްވައި ހިރްސް ވިދާޅުވިއެވެ. އެކަމުގެ ސަބަބުން އެމެރިކާއާއި އިނގިރޭސިވިލާތުގެ ސްޓޭޓްތަކަށް ވަރަށް ބޮޑު އަސަރެއް ކުރާނެ ކަމަށާއި އެމެރިކާގެ ރައީސް ޑޮނަލްޑް ޓްރަމްޕް ޙާއްސަކަށް ކުރިއަށްއޮތް މިޑްޓާމް އިންތިޚާބަށް އަސަރު ކުރާނެ ކަމަށްވެސް ހިރްސް ވިދާޅުވިއެވެ. އީރާނާއެކު އެމެރިކާއާއި އިސްރާއީލުގެ ހަނގުރާމަ ދިގުދެމިގެންދާނެ ކަމުގެ ބިރު އޮތް މި ދަނޑިވަޅުގައި ތެލުގެ އަގު މިހާރުވެސް އަންނަނީ އުފުލެމުންނެވެ. ތެލާއި ގޭހުގެ އަގު ބޮޑުވެއްޖެނަމަ މުދަލާއި ހިދުމަތްތައް އަގުބޮޑުވެދާނެ ކަމަށް ބުނެ ތަޖުރިބާކާރުން ވަނީ އިންޒާރު ދީފައެވެ. މިދިޔަ ހޮނިހިރު ދުވަހު އިސްރާއީލާއި އެމެރިކާއިން އީރާނަށް ހަމަލާ ދޭން ފެށިފަހުން ބްރެންޓް ކްރޫޑްގެ އަގު ވަނީ 12 ޕަސަންޓަށް އުފުލިފައެވެ. ހަމަނުޖެހުން ފެށުނު ފަހުން އިނގިރޭސިވިލާތުގެ ގޭހުގެ ބެންޗްމާކް އަގު ވަނީ 60 ޕަސަންޓަށްވުރެ މައްޗަށް ގޮސްފައެވެ. ހޮރްމުޒް ކަނޑުއޮޅި މެދުވެރިކޮށް ބޭނުންނަމަ ތެޔޮ ޓޭންކަރުތަކަށް ހުރަސް ކުރޭވޭނެ ކަމަށާއި ތެލާއި ގޭހުގެ ސަޕްލައިއަށް އީރާނުން ހުރަސްއަޅާނަމަ ކަނޑުއޮޅިން ދަތުރުކުރާ އުޅަނދުތަަކަށް އެމެރިކާއިން ހިމާޔަތް ދޭނެ ކަމަށް އަންގާރަ ދުވަހު ޓްރަމްޕް ވަނީ ވިދާޅުވެފައެވެ. ނަމަވެސް ތަޖުރިބާކާރުން އިންޒާރު ދޭ ގޮތުގައި އެ ޔަގީންކަން ކުންފުނިތަކުގެ ކަންބޮޑުވުންތަކަށް ލުއި ނުލިބިދާނެއެވެ. ކަނޑުއޮޅިން އުޅަނދުތައް ދަތުރުކުރާނެ ގޮތުގެ ތަފްސީލެއް ޓްރަމްޕް ނުދެއްވައެވެ. ހޮރްމުޒް ކަނޑުއޮޅި އަކީ ގަލްފާއި އަރަބި ކަނޑާ ގުޅުވައިދޭ ކޮރިޑޯއެކެވެ. މިއީ ދުނިޔޭގެ ތެޔޮ ޝިޕްމަންޓްތަކަށް އެންމެ މުހިންމު އެއް މަގެވެ. އެ ކަނޑުއޮޅިން ތެލުގެ ގާތްގަނޑަކަށް ފަސްބައިކުޅަ އެއްބައި ތެޔޮ އުފުލައެވެ. ދުނިޔޭގެ ބާޒާރުގައި ތެލުގެ އަގު އުފުލެމުން ދާއިރު, ރާއްޖޭގައި ވެސް ޕެޓްރޯލާއި ޑީސަލް ވިއްކާ އަގު އެސްޓީއޯއިން ވަނީ ރޭ ބޮޑު ކޮށްފައެވެ. އެގޮތުން ކުރިން 13.50 ރުފިޔާއަށް ޕެޓްރޯލް ލީޓަރެއް ވިއްކަމުންދިޔަ ނަމަވެސް، މިހާރު އެސްޓީއޯއިން ވިއްކާ ޕެޓްރޯލް ލިޓަރެއްގެ އަގަކީ 16.01 ރުފިޔާއެވެ. މިއީ ލިޓަރަކުން 2.51 ރުފިޔާ ނުވަތަ ގާތްގަނޑަކަށް 18.6 އިންސައްތައިގެ ބޮޑުވުމެކެވެ. ކުރިން 13.92 ރުފިޔާއަށް ޑީސަލް ލީޓަރެއް ލިބެން ހުރި ނަމަވެސް، މިހާރު ޑީސަލް ލިޓަރެއްގެ އަގު އެސްޓީއޯއިން ވަނީ 17.54 ރުފިޔާއަށް އުފުލައިފައެވެ. މިއީ ލިޓަރަކުން 3.62 ރުފިޔާ ނުވަތަ ގާތްގަނޑަކަށް 26 އިންސައްތައިގެ އިތުރުވުމެކެވެ. މިއީ ފަހުގެ ތާރީޚެއްގައި އެއްފަހަރާ ތެލުގެ އަގަށް މިހާ ބޮޑު ބަދަލެއް އައި ފުރަތަމަ ފަހަރެވެ. ރައީސް ޑރ. މުޙައްމަދު މުއިއްޒާއި އިކޮނޮމިކް މިނިސްޓަރު މުޙައްމަދު ސައީދު ވަނީ ހަނގުރާމައިގެ ހާލަތު ގޯސްނަމަ ވެސް ރާއްޖެއަށް ތެލާއި ކާޑު ލިބުމުގައި ދައްޗެއް ނެތް ކަމަށް މީގެ ކުރިން ވިދާޅުވެފައެވެ.