ނ. ވިހަފަރު ފަޅުގައި އެއާޕޯޓު އެޅުމަށް 42 ހެކްޓަރުގެ ބިން ހިއްކުމުގެ މަސައްކަތް މިއަދު ފަށައިފިއެވެ. އެ މަސައްކަތް ފައްޓަވައިދެއްވީ، އިކޮނޮމިކް މިނިސްޓަރު މުހައްމަދު ސައީދާއި އެމްއޭސީއެލްގެ މެނޭޖިން ޑިރެކްޓަރު އިބްރާހީމް ޝަރީފެވެ. ވިހަފަރުގައި ބޭއްވި އެ ރަސްމިއްޔާތުގައި ރައީސް ޑރ. މުހައްމަދު މުއިއްޒު ބައިވެރިވެވަޑައިގެންނެވިއެވެ. މި މަޝްރޫއުގެ ދަށުން 42 ހެކްޓަރުގެ ބިން ހިއްކާއިރު، އެ ބިން ހިއްކަނީ 1.6 މީޓަރު އުސްމިނުގައެވެ. ވިހަފަރުގެ ބިން ހިއްކަން ފެށިއިރު، އެ ފަޅުގައި އެއާޕޯޓެއް އަޅާނެކަން ރައީސް އިއުލާނުކުރެއްވީ، މިދިޔަ އަހަރުގެ ކުރީކޮޅެވެ. މިދިޔަ ޖުލައި 22ގައި ނ.ހޮޅުދޫއަށް ވަޑައިގެން ރައީސް މުއިއްޒު ވިދާޅުވީ، ވިހަފަރު ފަޅުގައި ތަރައްގީކުރާ އެއާޕޯޓު، މި އަހަރުގެ ކުރީކޮޅު ފަށައި، ދޮޅު އަހަރުތެރޭ ނިންމާނެ ކަމަށެވެ. ނ. އަތޮޅަކީ، ފަތުރުވެރިކަން ވަރަށް ބޮޑަށް ކުރިއަރާފައިވާ އަތޮޅެއް ކަމަށް ވިދާޅުވެ، އެ މަނިކުފާނު އޭރު ވަނީ، ޖިއޯގްރަފީގެ ގޮތުން ބަލާއިރު އެއާޕޯޓެއް އެ ސަރަހައްދުގައި ގާއިމުކުރުމަކީ މުުހިންމު ކަމެއް ކަން ފާހަގަކުރައްވާފައެވެ. https://sun.mv/208934 ނ. އަތޮޅުގައި އޮންނަނީ އެންމެ އެއާޕޯޓެކެވެ. އެއީ، މާފަރު އިންޓަނޭޝަނަލް އެއާޕޯޓު ކަމަށްވާއިރު، އެ އެއާޕޯޓު ވެސް އިތުރަށް ތަރައްގީ ކުރައްވާނެ ކަމަށް ރައީސް އޭރު ވިދާޅުވެފައިވެއެވެ. ފާހަގަކުރެވޭ ގޮތުގައި، ރާއްޖޭގައި މިވަގުތު 18 އެއާޕޯޓެއް އޮންނައިރު، މި ސަރުކާރުގެ ސިޔާސަތަކީ ކޮންމެ ރަށަކުން ވެސް ގިނަވެގެން 30 މިނެޓުން ދެވޭ ހިސާބުގައި އެއާޕޯޓެއް އޮންނަކަން ކަށަވަރު ކުރުމެވެ. އެ ސިޔާސަތަށް ގިނަ ބައެއްގެ ފާޑުކިޔުން އަމާޒުވެފައި ވަނިކޮށް، އެއާޕޯޓު އެޅުމުގެ ބަދަލުގައި ކުދި މަތިންދާބޯޓުތަކަށް ރަށްރަށަށް ޖެއްސޭނެ ގޮތެއް ހޯދަން ސަރުކާރުން އަންނަނީ ދިރާސާކުރަމުން ކަމަށް ރައީސް ވަނީ ވިދާޅުވެފައެވެ.